ಹಳೇ ವಾಹನ ಗುಜರಿಗೆ: ಹೊಸ ನೀತಿಗೆ ಮೋದಿ ಚಾಲನೆ, ಸುಮಾರು 1 ಕೋಟಿ ವಾಹನ ಸ್ಕ್ರ್ಯಾಪ್

ಗಾಂಧಿನಗರ: ಆರ್ಥಿಕ ಅಭಿವೃದ್ಧಿ ಹಾಗೂ ಪರಿಸರಸ್ನೇಹಿ ಕ್ರಮವಾಗಿ ಕೇಂದ್ರ ಸರ್ಕಾರ ಘೋಷಣೆ ಮಾಡಿರುವ ಮಹತ್ವಾಕಾಂಕ್ಷೆಯ ‘ರಾಷ್ಟ್ರೀಯ ವಾಹನ ಗುಜರಿ ನೀತಿ’ ಶುಕ್ರವಾರ ಜಾರಿಗೆ ಬಂದಿದ್ದು, ಪ್ರಧಾನಿ ನರೇಂದ್ರ ಮೋದಿ ಇದಕ್ಕೆ ಚಾಲನೆ ನೀಡಿದ್ದಾರೆ.

ಹೊಸ ನೀತಿಯ ಪ್ರಕಾರ, ವಾಹನಗಳಿಗೆ ಫಿಟ್ನೆಸ್ ಪರೀಕ್ಷೆ ನಡೆಸಲಾಗುತ್ತದೆ. ಮೂರು ಬಾರಿ ಪರೀಕ್ಷೆಯಲ್ಲಿ ಫೇಲಾದ ಎಲ್ಲ ವಾಹನಗಳನ್ನು ಗುಜರಿಗೆ ಹಾಕಲಾಗುತ್ತದೆ. ವಾಹನ ಗುಜರಿಗೆ ಹಾಕಿ, ಹೊಸ ವಾಹನ ಖರೀದಿಸುವವರಿಗೆ ಸರ್ಕಾರ ನೋಂದಣಿ ಶುಲ್ಕ, ರಸ್ತೆ ತೆರಿಗೆ ಇನ್ನಿತರ ವಿನಾಯಿತಿಗಳನ್ನು ನೀಡಲಿದೆ. ಈ ನೀತಿಯಿಂದ, ಹಳೆಯ ವಾಹನಗಳಿಂದ ಉಂಟಾಗುವ ಮಾಲಿನ್ಯ ನಿಯಂತ್ರಣವಾಗುವ ಜತೆಗೆ, ವಾಹನ ಉದ್ಯಮಕ್ಕೂ ಉತ್ತೇಜನ ಸಿಗಲಿದೆ.

ನೋಂದಣಿ ಶುಲ್ಕ ಮನ್ನಾ: ಹಳೆಯ ವಾಹನವನ್ನು ಗುಜರಿಗೆ ಕೊಟ್ಟವರಿಗೆ ಸರ್ಕಾರ ಪ್ರಮಾಣಪತ್ರ ನೀಡುತ್ತದೆ. ಹೊಸ ವಾಹನ ಖರೀದಿಸಿ ಅದನ್ನು ನೋಂದಣಿ ಮಾಡಿಸುವಾಗ ಈ ಪ್ರಮಾಣಪತ್ರ ಕೊಟ್ಟರೆ ನೋಂದಣಿ ಶುಲ್ಕ ಮನ್ನಾ ಆಗಲಿದೆ. ರಸ್ತೆ ತೆರಿಗೆಯಲ್ಲೂ ವಿನಾಯಿತಿ ಸಿಗಲಿದೆ. ಹೊಸ ನೀತಿಯಿಂದ ದೇಶದಲ್ಲಿ 10,000 ಕೋಟಿ ರೂಪಾಯಿ ಹೂಡಿಕೆ ಆಗಲಿದ್ದು, ಸಾವಿರಾರು ಉದ್ಯೋಗ ಸೃಷ್ಟಿಯಾಗಲಿದೆ. ಕಳೆದ ವರ್ಷ 23,000 ಕೋಟಿ ರೂಪಾಯಿ ಮೌಲ್ಯದ ಗುಜರಿ ಉಕ್ಕನ್ನು ಭಾರತ ಆಮದು ಮಾಡಿಕೊಂಡಿದೆ. ಹೊಸ ನೀತಿಯಿಂದಾಗಿ ನಮ್ಮ ದೇಶದಲ್ಲೇ ಸಾಕಷ್ಟು ಪ್ರಮಾಣದ ಗುಜರಿ ಉಕ್ಕು ವೈಜ್ಞಾನಿಕ ರೀತಿಯಲ್ಲೇ ಮರುಬಳಕೆಗೆ ಸಿಗಲಿದೆ. ಇದರೊಂದಿಗೆ ಆಮದು ವೆಚ್ಚವು ತಗ್ಗಲಿದೆ. ಕೈಗಾರಿಕೆಯ ಬೇಡಿಕೆಯೂ ಪೂರೈಸಲಿದೆ ಎಂದು ಪ್ರಧಾನಿ ಮೋದಿ ವರ್ಚುವಲ್ ಕಾರ್ಯಕ್ರಮದಲ್ಲಿ ಮಾಹಿತಿ ನೀಡಿದ್ದಾರೆ.

ಬಿಡಿಭಾಗಗಳ ಮರುಬಳಕೆ: ಹಳೆಯ ವಾಹನಗಳನ್ನು ಸ್ಕ್ರಾ್ಯಪ್​ಗೆ ಹಾಕಿದಾಗ ಅವುಗಳಿಂದ ಪ್ರತ್ಯೇಕಿಸಲಾಗುವ ಸ್ಟೀಲ್, ಪ್ಲಾಸ್ಟಿಕ್, ರಬ್ಬರ್, ಅಲ್ಯೂಮಿನಿಯಂ ಮತ್ತು ಇತರೆ ಬಿಡಿಭಾಗಗಳನ್ನು ಆಟೊಮೊಬೈಲ್ ಬಿಡಿಭಾಗಗಳ ಉತ್ಪಾದನೆಯಲ್ಲಿ ಮರುಬಳಕೆ ಮಾಡಲಾಗುವುದು. ಇದರಿಂದ ಹೊಸ ವಾಹನಗಳ ಉತ್ಪಾದನೆಯ ವೆಚ್ಚ ಇಳಿಕೆಯಾಗಲಿದೆ. ಅದೇ ರೀತಿ, ವಾಹನಗಳಲ್ಲಿ ಹಸಿರು ಇಂಧನ, ವಿದ್ಯುತ್ ಬಳಕೆಗೆ ಸಂಬಂಧಿಸಿದ ಹೊಸ ಹೊಸ ತಂತ್ರಜ್ಞಾನ, ಆವಿಷ್ಕಾರಗಳಿಗೂ ಅವಕಾಶವಾಗಲಿದೆ. ಈ ಎಲ್ಲ ಬೆಳವಣಿಗೆಯಿಂದ ಕಚ್ಚಾತೈಲ ಆಮದಿಗೆ ತಗಲುವ 10 ಲಕ್ಷ ಕೋಟಿ ರೂಪಾಯಿ ಕಡಿಮೆಯಾಗಲಿದೆ ಎಂಬ ಅಂದಾಜಿದೆ.

ದೇಶಾದ್ಯಂತ ಸ್ಕ್ರ್ಯಾಪಿಂಗ್ ಸೆಂಟರ್ ಸ್ಥಾಪನೆ: ಸ್ಕ್ರ್ಯಾಪಿಂಗ್ ನೀತಿ ಅನುಷ್ಠಾನಕ್ಕೆ ದೇಶಾದ್ಯಂತ ಸರ್ಕಾರದ ಕಡೆಯಿಂದ ಮಾತ್ರವಲ್ಲದೆ, ಪಿಪಿಪಿ ಮಾದರಿ, ಖಾಸಗಿ ಪಾಲುದಾರಿಕೆ, ರಾಜ್ಯ ಸರ್ಕಾರಗಳ ನೆರವಿನೊಂದಿಗೆ ಸ್ಕ್ರ್ಯಾಪಿಂಗ್ ಸೆಂಟರ್​ಗಳನ್ನು ಸ್ಥಾಪಿಸಲಾಗುತ್ತದೆ. ಸ್ಕ್ರ್ಯಾಪ್ ಮಾಡುವಾಗ ವಾಹನಗಳ ಮೌಲ್ಯಮಾಪನ ಮಾಡಿ, ಆ ಮೊತ್ತವನ್ನು ವಾಹನ ಮಾಲೀಕರಿಗೆ ನೀಡಲಾಗುವುದು ಎಂಬ ಅಂಶವಿದೆ.

ಗುಜರಿ ನೀತಿ ಜಾರಿಯಿಂದ ವಾಹನ ಮಾರಾಟ ಹೆಚ್ಚಳವಾಗಿ ರಾಜ್ಯಗಳು ಮತ್ತು ಕೇಂದ್ರ ಸರ್ಕಾರಗಳ ಜಿಎಸ್​ಟಿ ಆದಾಯ 30,000 ಕೋಟಿ ರೂಪಾಯಿಯಿಂದ 40,000 ಕೋಟಿ ರೂಪಾಯಿ ತನಕ ಹೆಚ್ಚಳವಾಗಲಿದೆ. ಹಳೆಯ ವಾಹನ ಗುಜರಿಗೆ ಹಾಕಿದವರಿಗೆ ಹೊಸ ವಾಹನ ಖರೀದಿಸುವಾಗ ವಾಹನ ಉತ್ಪಾದಕರು ಶೇ. 5 ವಿನಾಯಿತಿ ಕೊಡಬೇಕು.

| ನಿತಿನ್ ಗಡ್ಕರಿ ಕೇಂದ್ರ ರಸ್ತೆ ಸಾರಿಗೆ ಸಚಿವ

ಹೊಸ ನೀತಿಯ ಮುಖ್ಯಾಂಶಗಳು

• ಮೂರು ಬಾರಿ ಫಿಟ್ನೆಸ್ ಟೆಸ್ಟ್ ಫೇಲ್ ಆದ ವಾಹನಗಳು ಕಡ್ಡಾಯವಾಗಿ ಗುಜರಿಗೆ
• ಸ್ವಯಂಪ್ರೇರಿತ ಸ್ಕ್ರ್ಯಾಪ್​ ನಿರ್ಧಾರವನ್ನೂ ಫಿಟ್ನೆಸ್ ಟೆಸ್ಟ್ ಆಧರಿಸಿಯೇ ನಿರ್ಧರಿಸಲಾಗುತ್ತದೆ
• ಹಳೆ ವಾಹನ ಗುಜರಿಗೆ ಹಾಕಿದ್ರೆ ಹೊಸ ವಾಹನ ಖರೀದಿಗೆ ಉತ್ತೇಜನ
• ಮಾಲಿನ್ಯಕಾರಕ ವಾಹನಗಳ ಮೇಲೆ ಹಸಿರು ತೆರಿಗೆ ಮತ್ತು ಇತರೆ ಸೆಸ್, ಭಾರಿ ಮೊತ್ತದ ದಂಡ
• ಭಾರತವನ್ನು ಜಗತ್ತಿನ ಆಟೊಮೊಬೈಲ್ ಕ್ಷೇತ್ರದ ಹಬ್ ಆಗಿ ರೂಪಿಸುವುದು
• ಆಟೋಮೊಬೈಲ್ ಕ್ಷೇತ್ರದ ವಹಿವಾಟು ಮತ್ತು ರಫ್ತು ಹೆಚ್ಚಿಸುವುದು
• ಕಚ್ಚಾ ತೈಲ ಆಮದು ಇಳಿಸುವುದು

ನೀತಿ ಅನುಷ್ಠಾನದಿಂದ ಏನಾಗಲಿದೆ?

• ಆಟೊಮೊಬೈಲ್ ಉದ್ಯಮ ವಹಿವಾಟು ಕನಿಷ್ಠ 30% ಹೆಚ್ಚಾಗಲಿದ್ದು, ಉದ್ಯೋಗ ಸೃಜನೆಯಾಗಲಿದೆ.
• 20 ವರ್ಷ ಮೇಲ್ಪಟ್ಟ 51 ಲಕ್ಷ ಹಳೆಯ ಲಘು ವಾಹನಗಳು ಮತ್ತು 15 ವರ್ಷ ಮೇಲ್ಪಟ್ಟ 34 ಲಕ್ಷ ಲಘು ವಾಹನಗಳು ಗುಜರಿ ಸೇರಲಿವೆ.
• 15 ವರ್ಷ ಮೇಲ್ಪಟ್ಟ ಮಾನ್ಯತೆ ಹೊಂದಿದ ಫಿಟ್ನೆಸ್ ಪ್ರಮಾಣಪತ್ರವಿಲ್ಲದ 17 ಲಕ್ಷ ಮಧ್ಯಮ, ದೊಡ್ಡ ಗಾತ್ರದ ವಾಹನಗಳು ಸ್ಕ್ರಾ್ಯಪ್ ಆಗಲಿವೆ.
• ಸ್ಕ್ರ್ಯಾಪ್​ ನೀತಿ ಅನುಷ್ಠಾನದ ಮೂಲಕ ದೇಶಾದ್ಯಂತ ಒಟ್ಟು ಒಂದು ಕೋಟಿಗೂ ಅಧಿಕ ವಾಹನಗಳು ಗುಜರಿಗೆ ಸೇರಲಿವೆ.
• ವಾಹನ ಕ್ಷೇತ್ರದ ವಹಿವಾಟು ಈಗಿನ 4.5 ಲಕ್ಷ ಕೋಟಿಯಿಂದ 10 ಲಕ್ಷ ಕೋಟಿ ರೂಪಾಯಿಗೆ ಏರಿಕೆ ನಿರೀಕ್ಷೆ, ವಾಹನ ರಫ್ತು ವಹಿವಾಟು 1.45 ಲಕ್ಷ ಕೋಟಿಯಿಂದ 3 ಲಕ್ಷ ಕೋಟಿ ರೂಪಾಯಿಗೆ ಏರಿಕೆ ಸಾಧ್ಯತೆ

https://www.vijayavani.net/lovers-pour-kerosene-over-them-within-a-car-and-lit-fire-to-commit-suicide/

https://www.vijayavani.net/these-three-stole-petrol-to-put-fire-then-stole-one-bike-to-escape/