ಕರೊನಾ ಬಂದ ನಂತರ ಮಹಾನಗರಗಳಿಂದ ಲಕ್ಷಾಂತರ ಜನ ಮರಳಿ ಹಳ್ಳಿ ಸೇರಿದ್ದಾರೆ. ಅವರಲ್ಲಿ ಬಹುತೇಕರು ಕೃಷಿ ಅವಲಂಬಿಸುವ ಕಡೆ ಹೆಚ್ಚು ಆಕರ್ಷಿತರಾಗಿದ್ದಾರೆ. ಅವರನ್ನು ಬಳಸಿಕೊಳ್ಳುವುದು ಹಾಗೂ ಅವರಿಗೆ ನೆರವು ನೀಡುವುದು ರೈತಮಿತ್ರ ನೇಮಕದ ಉದ್ದೇಶ. ಪ್ರಧಾನಮಂತ್ರಿಗಳ ಆಶಯ ಕೂಡ ರೈತರ ಆದಾಯ ದ್ವಿಗುಣವಾಗ ಬೇಕೆಂಬುದಾಗಿದೆ. ಅದಕ್ಕೆ ತಕ್ಕಂತೆ ಕೃಷಿ ಕ್ಷೇತ್ರವನ್ನು ಸಜ್ಜುಗೊಳಿಸಬೇಕಾಗಿದೆ. ರೈತರಿಗೆ ಕಾಲಕಾಲಕ್ಕೆ ಬೇಕಾದ ಮಾಹಿತಿ ನೀಡುವುದು, ಸಮಗ್ರ ಕೃಷಿ ಪ್ರೋತ್ಸಾಹಿಸುವ ಕೆಲಸ ಆಗಬೇಕಾಗಿದೆ. ರೈತರಿಗೆ ತಾಂತ್ರಿಕ ನೆರವು, ಉತ್ತಮ ಬಿತ್ತನೆ ಬೀಜದ ಮಾಹಿತಿ ನಿಖರವಾಗಿರಬೇಕು. ಇಲಾಖೆಯಲ್ಲಿ ಅಧಿಕಾರಿಗಳು, ಸಿಬ್ಬಂದಿ ಸಂಖ್ಯೆ ಕಡಿಮೆ ಇದೆ. ಕೃಷಿ ವಿಷಯದಲ್ಲಿ ಡಿಪ್ಲೊಮಾ ಮಾಡಿರುವ ಸಾವಿರಾರು ವಿದ್ಯಾರ್ಥಿಗಳು ಹೋರಾಟದ ಮೂಲಕ ಹುದ್ದೆಗಾಗಿ ಸರ್ಕಾರದ ಮೇಲೆ ಒತ್ತಡ ತರುತ್ತಿದ್ದರು. ಹೀಗಾಗಿ ರೈತಮಿತ್ರ ನೇಮಕದ ಮೂಲಕ ಎರಡು ಸಮಸ್ಯೆಗಳಿಗೂ ಪರಿಹಾರ ಕಂಡುಕೊಳ್ಳುವುದು ಸರ್ಕಾರದ ಉದ್ದೇಶವಾಗಿದೆ.
