ಥಾಯ್ಲೆಂಡ್‌ಗೆ ಹೊರಡುವ ಭಾರತೀಯರಿಗೆ ಅಲರ್ಟ್: ರಾಯಭಾರ ಕಚೇರಿಯಿಂದ ಮಹತ್ವದ ಸೂಚನೆ!

Thailand

Published on:

03 Jul 2026, 6:44 am

ಪ್ರಮುಖ ಮುಖ್ಯಾಂಶಗಳು

ಥಾಯ್ಲೆಂಡ್‌ಗೆ ಪ್ರಯಾಣಿಸುತ್ತಿದ್ದೀರಾ? ಭಾರತೀಯರಿಗೆ ಹೊಸ ಮಾರ್ಗಸೂಚಿ
ವೀಸಾ-ಮುಕ್ತ ಪ್ರವೇಶ ಅಂತ್ಯ; ಭಾರತೀಯರಿಗೆ ಥಾಯ್ಲೆಂಡ್ ಪ್ರಯಾಣದ ಹೊಸ ನಿಯಮಗಳು
ಥಾಯ್ಲೆಂಡ್-ಕಾಂಬೋಡಿಯಾ ಗಡಿ ಪ್ರದೇಶಕ್ಕೆ ಹೋಗದಂತೆ ಭಾರತೀಯರಿಗೆ ಸೂಚನೆ

ನವದೆಹಲಿ: ಥಾಯ್ಲೆಂಡ್‌ಗೆ(Thailand) ಪ್ರಯಾಣಿಸುವ ಭಾರತೀಯ ನಾಗರಿಕರಿಗೆ ಬ್ಯಾಂಕಾಕ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿ 11 ಅಂಶಗಳ ಪ್ರಯಾಣ ಸಲಹೆ (Travel Advisory) ಪ್ರಕಟಿಸಿದೆ.

ಥಾಯ್ಲೆಂಡ್-ಕಾಂಬೋಡಿಯಾ ಗಡಿ ಪ್ರದೇಶದಲ್ಲಿ ಉದ್ವಿಗ್ನತೆ ಮುಂದುವರಿದಿರುವ ಹಿನ್ನೆಲೆಯಲ್ಲಿ ಆ ಭಾಗಗಳಿಗೆ ತೆರಳದಂತೆ ಸೂಚನೆ ನೀಡಲಾಗಿದೆ. ಇದೇ ವೇಳೆ ಥಾಯ್ಲೆಂಡ್‌ನಲ್ಲಿ ಭಾರತೀಯರಿಗೆ ಜಾರಿಯಲ್ಲಿದ್ದ ವೀಸಾ-ಮುಕ್ತ (Visa-Free) ಪ್ರವೇಶ ವ್ಯವಸ್ಥೆ ಅಂತ್ಯಗೊಂಡಿರುವುದರಿಂದ ಹೊಸ ವೀಸಾ ಹಾಗೂ ಪ್ರವೇಶ ನಿಯಮಗಳನ್ನು ಕಡ್ಡಾಯವಾಗಿ ಪಾಲಿಸುವಂತೆ ರಾಯಭಾರ ಕಚೇರಿ ತಿಳಿಸಿದೆ.

ಭಾರತೀಯರು ಥಾಯ್ಲೆಂಡ್‌ಗೆ ತೆರಳುವ ಮೊದಲು ಹಾಗೂ ಅಲ್ಲಿಗೆ ತಲುಪಿದ ನಂತರ ಜಾರಿಯಲ್ಲಿರುವ ವಲಸೆ ನಿಯಮಗಳನ್ನು ಅನುಸರಿಸಬೇಕು. ಅಗತ್ಯ ದಾಖಲೆಗಳನ್ನು ಹೊಂದಿರದಿದ್ದರೆ ಪ್ರವೇಶ ಪ್ರಕ್ರಿಯೆಯಲ್ಲಿ ತೊಂದರೆ ಉಂಟಾಗುವ ಸಾಧ್ಯತೆ ಇದೆ ಎಂದು ರಾಯಭಾರ ಕಚೇರಿ ಎಚ್ಚರಿಕೆ ನೀಡಿದೆ.

ಪಾಸ್‌ಪೋರ್ಟ್, ಡಿಜಿಟಲ್ ಆಗಮನ ಕಾರ್ಡ್ ಕಡ್ಡಾಯ

ಥಾಯ್ಲೆಂಡ್‌ಗೆ ಆಗಮಿಸುವ ದಿನಾಂಕದಿಂದ ಕನಿಷ್ಠ ಆರು ತಿಂಗಳ ಅವಧಿಯವರೆಗೆ ಪಾಸ್‌ಪೋರ್ಟ್ ಮಾನ್ಯವಾಗಿರಬೇಕು. ಜೊತೆಗೆ ಎಲ್ಲ ವಿದೇಶಿ ಪ್ರಯಾಣಿಕರು ಪ್ರಯಾಣ ಆರಂಭಿಸುವ ಮೊದಲು ಆನ್‌ಲೈನ್ ಮೂಲಕ ಥಾಯ್ಲೆಂಡ್ ಡಿಜಿಟಲ್ ಅರೈವಲ್ ಕಾರ್ಡ್ (TDAC) ಭರ್ತಿ ಮಾಡಿ, ವಲಸೆ ತಪಾಸಣೆಗೆ ಅಗತ್ಯವಿರುವ ಕ್ಯೂಆರ್ ಕೋಡ್ ಪಡೆಯಬೇಕು ಎಂದು ಸೂಚಿಸಲಾಗಿದೆ.

ಹಣ, ಟಿಕೆಟ್ ಮತ್ತು ಹೋಟೆಲ್ ದಾಖಲೆ ಕೊಂಡೊಯ್ಯಿರಿ

ಪ್ರವಾಸಿಗರು ತಮ್ಮ ಬಳಿ ಸಾಕಷ್ಟು ಹಣವಿರುವ ಪುರಾವೆ, ಹಿಂದಿರುಗುವ ಅಥವಾ ಮುಂದಿನ ಪ್ರಯಾಣದ ವಿಮಾನ ಟಿಕೆಟ್ ಹಾಗೂ ಹೋಟೆಲ್ ಬುಕ್ಕಿಂಗ್ ದೃಢೀಕರಣ ಪತ್ರಗಳನ್ನು ಕಡ್ಡಾಯವಾಗಿ ಹೊಂದಿರಬೇಕು. ವಲಸೆ ಅಧಿಕಾರಿಗಳು ಈ ದಾಖಲೆಗಳನ್ನು ಕೇಳಬಹುದು ಎಂದು ಸಲಹೆಯಲ್ಲಿ ತಿಳಿಸಲಾಗಿದೆ.

ವೀಸಾ ಆನ್ ಅರೈವಲ್ (VOA) ಅಥವಾ ಇತರೆ ಅನುಮತಿಗಳಡಿ ಪ್ರಯಾಣಿಸುವವರು ಕನಿಷ್ಠ 20,000 ಥಾಯ್ ಬಹ್ತ್ (ಸುಮಾರು ₹57,300) ನಗದು ಹೊಂದಿರುವುದು ಸೂಕ್ತ ಎಂದು ರಾಯಭಾರ ಕಚೇರಿ ತಿಳಿಸಿದೆ.

ಉದ್ಯೋಗಕ್ಕಾಗಿ ತೆರಳುವವರಿಗೆ ವಿಶೇಷ ಸೂಚನೆ

ಥಾಯ್ಲೆಂಡ್‌ನಲ್ಲಿ ಉದ್ಯೋಗ ಪಡೆದಿರುವವರು ಪ್ರವಾಸಿ ವೀಸಾ ಅಥವಾ ವೀಸಾ ಆನ್ ಅರೈವಲ್ ಮೂಲಕ ದೇಶ ಪ್ರವೇಶಿಸಬಾರದು ಎಂದು ರಾಯಭಾರ ಕಚೇರಿ ಸ್ಪಷ್ಟಪಡಿಸಿದೆ. ಉದ್ಯೋಗಕ್ಕಾಗಿ ತೆರಳುವವರು ಭಾರತದಿಂದಲೇ ಸೂಕ್ತ ಉದ್ಯೋಗ ವೀಸಾ ಪಡೆದು ಪ್ರಯಾಣಿಸಬೇಕು. ಪ್ರವಾಸಿ ವೀಸಾದಡಿ ಉದ್ಯೋಗ ಮಾಡುವುದು ಥಾಯ್ಲೆಂಡ್‌ನ ವಲಸೆ ಕಾನೂನುಗಳ ಉಲ್ಲಂಘನೆಯಾಗಲಿದೆ ಎಂದು ಎಚ್ಚರಿಸಲಾಗಿದೆ.

ಟ್ರಾನ್ಸಿಟ್ ಪ್ರಯಾಣಿಕರಿಗೂ ಸೂಚನೆ

ಥಾಯ್ಲೆಂಡ್ ವಿಮಾನ ನಿಲ್ದಾಣಗಳ ಮೂಲಕ ಬೇರೆ ದೇಶಗಳಿಗೆ ಪ್ರಯಾಣಿಸುವವರು ಅಂತಿಮ ಗಮ್ಯಸ್ಥಾನದ ವೀಸಾ, ದೃಢೀಕೃತ ಮುಂದಿನ ವಿಮಾನ ಟಿಕೆಟ್ ಸೇರಿದಂತೆ ಅಗತ್ಯ ದಾಖಲೆಗಳನ್ನು ಹೊಂದಿರಬೇಕು ಎಂದು ರಾಯಭಾರ ಕಚೇರಿ ತಿಳಿಸಿದೆ. ಈ ದಾಖಲೆಗಳು ಇದ್ದರೆ ಟ್ರಾನ್ಸಿಟ್ ಪ್ರಕ್ರಿಯೆ ಸುಗಮವಾಗಲಿದೆ ಎಂದು ಸಲಹೆಯಲ್ಲಿ ಉಲ್ಲೇಖಿಸಲಾಗಿದೆ.

ವೀಸಾ-ಮುಕ್ತ ಪ್ರವೇಶಕ್ಕೆ ತೆರೆ

2024ರಿಂದ ಭಾರತೀಯ ಪಾಸ್‌ಪೋರ್ಟ್ ಹೊಂದಿದವರಿಗೆ ನೀಡಲಾಗುತ್ತಿದ್ದ ವೀಸಾ-ಮುಕ್ತ ಪ್ರವೇಶ ಯೋಜನೆಯನ್ನು ಥಾಯ್ಲೆಂಡ್ ಸರ್ಕಾರ ಸ್ಥಗಿತಗೊಳಿಸಿದೆ. ಇದರೊಂದಿಗೆ ಭಾರತೀಯರು ಈಗ ಜಾರಿಯಲ್ಲಿರುವ ಹೊಸ ವೀಸಾ ಹಾಗೂ ಪ್ರವೇಶ ನಿಯಮಗಳನ್ನು ಅನುಸರಿಸಿ ಪ್ರಯಾಣಿಸಬೇಕಾಗಿದೆ,(ಏಜೆನ್ಸೀಸ್).

Thailand