ಗಡಿಯಲ್ಲಿರುವ ಹೆದ್ದಾರಿಯಲ್ಲಿ ವಾಯುಪಡೆ ವಿಮಾನಗಳು ತುರ್ತಾಗಿ ಇಳಿಯಲು ವ್ಯವಸ್ಥೆ ಮಾಡಲಾಗಿದ್ದು, ಶತ್ರು ಪಾಳಯಕ್ಕೆ ಇದೊಂದು ಸ್ಪಷ್ಟ ಸಂದೇಶವಾಗಿದೆ. ಗಡಿಯಾಚೆಯಿಂದ ಯಾವುದೇ ದುಸ್ಸಾಹಸ ನಡೆಸಿದರೆ ತುರ್ತಾಗಿ ಎದುರಿಸಲು ಏರ್ಸ್ಟ್ರಿಪ್ ನೆರವಾಗಲಿದೆ. ಯುದ್ಧದಂಥ ಸಮಯದಲ್ಲಿ ತುರ್ತಾಗಿ ಹೆದ್ದಾರಿಯನ್ನೇ ಕಾರ್ಯಾಚರಣೆಗೆ ಬಳಸುವುದು ಇದರ ಉದ್ದೇಶವಾಗಿದೆ. ಇದು ಮೂರು ಕಿ.ಮೀ. ಉದ್ದದ ರಸ್ತೆ-ಕಮ್ಏರ್ ಸ್ಟ್ರಿಪ್ ನಿರ್ಮಾಣ ಮಾಡಲಾಗಿದೆ. ಗಡಿ ತಂಟೆ ಕೆದಕುವ ಪಾಕಿಸ್ತಾನ ಮತ್ತು ಚೀನಾಕ್ಕೆ ಇದೊಂದು ಎಚ್ಚರಿಕೆಯ ಗಂಟೆ ಎಂದು ವಿಶ್ಲೇಷಿಸಲಾಗಿದೆ. ತುರ್ತು ಇಳಿಕೆ ಸೌಕರ್ಯದ (ಇಎಲ್ಎಫ್) ಮೇಲೆ ವಿಮಾನದ ವೈವಿಧ್ಯಮಯ ಕಾರ್ಯಾಚರಣೆಗಳನ್ನು ಉಭಯ ಸಚಿವರು ವೀಕ್ಷಿಸಿದರು. ಸುಖೋಯ್-30ಎಂಕೆಐ ಫೈಟರ್ ಜೆಟ್ ಕೂಡ ಇಎಲ್ಎಫ್ ಮೇಲೆ ಅಣಕು ಲ್ಯಾಂಡಿಂಗ್ ನಡೆಸಿತು. ಮೂರೂ ಪಡೆಗಳ ಮಹಾ ದಂಡ ನಾಯಕ (ಸಿಡಿಎಸ್) ಬಿಪಿನ್ ರಾವತ್, ಐಎಎಫ್ ಮುಖ್ಯಸ್ಥ ಆರ್.ಕೆ. ಭದೌರಿಯಾ ಕೂಡ ವೀಕ್ಷಿಸಿದರು.
