ನವದೆಹಲಿ: ಕೃಷಿಗೆ ಸಂಬಂಧಿಸಿದ ಸುಧಾರಣಾ ಕ್ರಮಗಳಿಂದ ರೈತರ ಆದಾಯ ಹೆಚ್ಚಳವಾಗಿದೆ. ಸೆಪ್ಟೆಂಬರ್ನಲ್ಲಿ ಜಾರಿಗೆ ಬಂದ ಮೂರು ಕೃಷಿ ಕಾಯ್ದೆಗಳು ಕೃಷಿ ಮತ್ತು ಅದಕ್ಕೆ ಸಂಬಂಧಿಸಿದ ಕ್ಷೇತ್ರದ ಮಧ್ಯೆ ಇದ್ದ ಅಡೆತಡೆಯನ್ನು ನಿವಾರಿಸಿದ್ದು, ಬೇಸಾಯಗಾರರಿಗೆ ಹೊಸ ಮಾರುಕಟ್ಟೆ ಕಲ್ಪಿಸಿವೆ. ಜತೆಗೆ ಆಧುನಿಕ ತಂತ್ರಜ್ಞಾನದ ನೆರವನ್ನು ನೀಡಿ, ಹೆಚ್ಚಿನ ಹೂಡಿಕೆ ಒದಗಿಸಿಕೊಡಲಿವೆ ಎಂದು ಪ್ರಧಾನಿ ನರೇಂದ್ರ ಮೋದಿ ಹೇಳಿದ್ದಾರೆ. ಉದ್ದಿಮೆಗಳ ಮಧ್ಯೆ ಅನಗತ್ಯವಾಗಿ ಗೋಡೆಗಳಿದ್ದರೆ ಯಾವ ಉದ್ಯಮವೂ ಬೆಳವಣಿಗೆ ಕಾಣುವುದಿಲ್ಲ. ಒಂದು ವಲಯದಲ್ಲಾಗುವ ಪ್ರಗತಿ ಆ ಕ್ಷೇತ್ರಕ್ಕೆ ಮಾತ್ರ ಸೀಮಿತವಾಗಿರುವುದಿಲ್ಲ. ಅದು ಮುಖ್ಯಕ್ಷೇತ್ರಕ್ಕೆ ಸಂಬಂಧಿಸಿದ ಉಪಕ್ಷೇತ್ರದಲ್ಲಿ ಪರಿವರ್ತನೆಗೆ ಕಾರಣವಾಗುತ್ತದೆ. ಹೊಸ ಕಾಯ್ದೆಯು ಕೃಷಿ ಮೂಲ ಸೌಕರ್ಯ, ಆಹಾರ ಸಂಸ್ಕರಣೆ, ಗೋದಾಮು, ಶೈತ್ಯಾಗಾರ ವಲಯಗಳಲ್ಲಿ ಇದ್ದ ಗೋಡೆಯನ್ನು ತೆಗೆದು ಹಾಕುವುದರ ಜತೆಗೆ ಇವುಗಳ ಮಧ್ಯೆ ಸೇತುವೆಯಾಗಿ ಪರಸ್ಪರ ಬೆಂಬಲ ಒದಗಿಸಿದೆ ಎಂದು ಮೋದಿ ತಿಳಿಸಿದ್ದಾರೆ. ಶನಿವಾರ ನಡೆದ ಭಾರತೀಯ ವಾಣಿಜ್ಯೋದ್ಯಮ ಸಂಘದ (ಫಿಕ್ಕಿ) 93ನೇ ವಾರ್ಷಿಕ ಸಮ್ಮೇಳನದ ವರ್ಚುವಲ್ ಭಾಷಣದಲ್ಲಿ ಅವರು ಮಾತನಾಡಿದರು.
