ವೃದ್ಧಿಸಿದ ವಿಶ್ವಾಸ: ಸಚಿವ ಸಂಪುಟಕ್ಕೆ 10 ಹೊಸ ಶಾಸಕರ ಸೇರ್ಪಡೆಯಿಂದಾಗಿ ವಲಸಿಗರಲ್ಲಿ ವಿಶ್ವಾಸ ವೃದ್ಧಿಸಿದ್ದು, ಬಾಕಿ ಸ್ಥಾನಗಳ ಭರ್ತಿಯಿಂದ ಯಾವುದೇ ಸಮಸ್ಯೆಯಾಗದು. ಅಷ್ಟಕ್ಕೂ ಉಳಿದ ವಲಸಿಗರಲ್ಲಿ ವಿಶ್ವನಾಥ್, ಎಂ.ಟಿ.ಬಿ.ನಾಗರಾಜ್, ಆರ್.ಶಂಕರ್ ಮೇಲ್ಮನೆ ಸದಸ್ಯರಾಗುವ ತನಕ ಮಂತ್ರಿಯಾಗುವುದಕ್ಕೆ ಅವಕಾಶವಿಲ್ಲ. ಆರ್ಆರ್ ನಗರದ ಮುನಿರತ್ನ ಹಾಗೂ ಮಸ್ಕಿಯ ಪ್ರತಾಪಗೌಡ ಪಾಟೀಲ್ರ ಕ್ಷೇತ್ರಕ್ಕೆ ಇನ್ನೂ ಚುನಾವಣೆ ನಡೆದಿಲ್ಲ. ಜೂನ್ನಲ್ಲಿ ಮೇಲ್ಮನೆ ಕೆಲವು ಸದಸ್ಯ ಸ್ಥಾನಗಳು ತೆರವಾಗಲಿವೆ. ಅಲ್ಲಿಯವರೆಗೆ ಸಚಿವ ಸಂಪುಟದ ಆರು ಸ್ಥಾನಗಳನ್ನು ಖಾಲಿಯಿಟ್ಟುಕೊಳ್ಳುವುದು, ಮೂಲ ಶಾಸಕರ ಅಸಮಾಧಾನ ಮತ್ತೂ ಹೆಚ್ಚಿಸುವುದು ಸಾಧುವಲ್ಲ ಎನ್ನುವುದು ವರಿಷ್ಠರ ಯೋಚನೆಯಾಗಿದೆ. ಪಕ್ಷ ಅಧಿಕಾರಕ್ಕೆ ಬರಲು ಕಾರಣದವರಿಗೆ ಮಂತ್ರಿ ಮಾಡುವುದಕ್ಕೆ ಅಭ್ಯಂತರವಿಲ್ಲ. ಅದೇ ಕಾಲಕ್ಕೆ ಪಕ್ಷದ ಸಂಘಟನೆಗೆ ದುಡಿದವರು, ಹಿರಿಯರಿಗೂ ಮನ್ನಣೆ ನೀಡಬೇಕು ಎಂಬ ಅಸಮಾಧಾನಿತರ ವಾದವು ವರಿಷ್ಠರ ಗಮನಸೆಳೆದಿದೆ ಎಂದು ಮೂಲಗಳು ಹೇಳಿವೆ.
