‘ಘೋಸ್ಟ್’ ಕುರಿತು ಮಾತನಾಡಿದ ಶ್ರೀನಿ, ‘ನಾನು ಪ್ರತಿ ಸಿನಿಮಾ ಮಾಡಿದಾಗಲೂ, ಯಾಕೆ ಬೇರೆಯವರನ್ನು ನಿರ್ದೇಶನ ಮಾಡುವುದಿಲ್ಲ ಎಂದು ಎಲ್ಲರೂ ಕೇಳುತ್ತಿದ್ದರು. ನಾನು ಸಿನಿಮಾ ಮಾಡಿದರೆ ಶಿವರಾಜ್ ಕುಮಾರ್ ಅಭಿನಯದಲ್ಲಿ ಮಾತ್ರ ಎಂದು ಎಲ್ಲರಿಗೂ ಹೇಳುತ್ತಿದ್ದೆ. ಅವರಿಗಾಗಿ ಒಂದು ಸ್ಕ್ರಿಪ್ಟ್ ಮಾಡಿಕೊಂಡು ಅವರಿಗೆ ಹೇಳಿದೆ. ಅವರು ಕಥೆ ಕೇಳಿ ಬಹಳ ಇಷ್ಟರು. ಆಮೇಲೆ ನಾಲ್ಕೈದು ದಿನಗಳಲ್ಲಿ ಚಿತ್ರವೇ ಘೋಷಣೆಯಾಯ್ತು. ಈ ಸಿನಿಮಾ ಹೀಗೆಯೇ ಮೂಡಿಬರಬೇಕು ಎಂದು ಸಾಕಷ್ಟು ಹೋಮ್ವರ್ಕ್ ಮಾಡಿಕೊಂಡು, ಚಿತ್ರೀಕರಣ ಶುರು ಮಾಡಿದೆವು. ಮೊದಲು ಇಷ್ಟು ದೊಡ್ಡ ಸಿನಿಮಾ ಆಗುತ್ತದೆ ಅಂತ ಅಂದುಕೊಂಡಿರಲಿಲ್ಲ. ಸಂದೇಶ್ ನಾಗರಾಜ್ ಅವರು ನಿರ್ಮಾಣದ ಜವಾಬ್ದಾರಿ ವಹಿಸಿಕೊಂಡಾಗ ದೊಡ್ಡದಾಯ್ತು’ ಎನ್ನುತ್ತಾರೆ ಶ್ರೀನಿ.
