ಬೆಂಗಳೂರು: ಶ್ರಾವ್ಯಾ ರಾವ್ ಹೆಸರಿನಿಂದ ಗುರುತಿಸಿಕೊಂಡಿದ್ದ ಕನ್ನಡದ ‘ರೋಸ್’ ನಟಿ ಇದೀಗ ಸಾತ್ವಿಕಾ ರಾವ್ ಎಂದು ಹೆಸರು ಬದಲಿಸಿಕೊಂಡಿದ್ದಾರೆ. ನಟ ಕಿಚ್ಚ ಸುದೀಪ್ ಮಾರ್ಗದರ್ಶನದ ಮೇರೆಗೆ ಹೆಸರು ಬದಲಿಸಿಕೊಂಡ ಬಳಿಕ ನಟಿಯ ಬದುಕೇ ಬದಲಾಗಿದ್ದು, ಕನ್ನಡ ಸೇರಿ ಪರಭಾಷೆಯಲ್ಲೂ ಬಿಜಿಯಾಗಿದ್ದಾರೆ. ಇದೀಗ ಸಿಂಪಲ್ ಸುನಿ ನಿರ್ದೇಶನದ ಕನ್ನಡದ ‘ಮೋಡ ಕವಿದ ವಾತಾವರಣ’ ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದು, ನಾಳೆ (ಜೂ. 26) ರಿಲೀಸ್ ಆಗುತ್ತಿದೆ. ಈ ಹಿನ್ನೆಲೆಯಲ್ಲಿ ಪಾತ್ರ ಮತ್ತು ಸಿನಿಮಾ ಜರ್ನಿ ಕುರಿತು ಸಾತ್ವಿಕಾ, ‘‘ಮೋಡ ಕವಿದ ವಾತಾವರಣ’ ಚಿತ್ರಕ್ಕೆ ಮೊದಲು ಬೇರೊಬ್ಬ ನಟಿಯನ್ನು ಆಯ್ಕೆ ಮಾಡಲಾಗಿತ್ತು. ಶೂಟಿಂಗ್ ತೆರಳುವ ಹಿಂದಿನ ದಿನವೇ ಅವರು ಸಿನಿಮಾದಿಂದ ಹಿಂದೆ ಸರಿದರು. ಆಗ ಚಿತ್ರದಲ್ಲಿ ನನಗೆ ಅವಕಾಶ ಸಿಕ್ಕಿತು. ಫೋನ್ನಲ್ಲಿಯೇ ಕಥೆ ಕೇಳಿದೆ. ಇಷ್ಟವಾದ ಕಾರಣ ಒಪ್ಪಿಕೊಂಡು ಮರುದಿನವೇ ಶೂಟಿಂಗ್ನಲ್ಲಿ ಭಾಗವಹಿಸಿದೆ. ಸುಮಾರು 40 ದಿನಗಳ ಕಾಲ ಚಿತ್ರೀಕರಣದಲ್ಲಿ ಭಾಗವಹಿಸಿದ್ದೇನೆ. ಇಲ್ಲಿ ನನ್ನದೇ ಹೆಸರಿನ ಪಾತ್ರದಲ್ಲಿ ನಾನು ನಟಿಸಿದ್ದೇನೆ. ವಾಸ್ತವವಾಗಿ ನಾನು ಇರುವುದಕ್ಕೂ ಆ ಪಾತ್ರಕ್ಕೂ ಅಜಗಜಾಂತರ ವ್ಯತ್ಯಾಸವಿದ್ದು, ‘ಮೋಡ ಕವಿದ ...’ ಸಾತ್ವಿಕಾ ತರ ನಿಜ ಜೀವನದ ಸಾತ್ವಿಕಾ ಖಂಡಿತ ಇಲ್ಲ. ಹಾಗಾಗಿ, ಆ ಪಾತ್ರಕ್ಕೆ ನಾನು ಒಗ್ಗಿಕೊಳ್ಳಬೇಕಿತ್ತು. ಮೊದಲು ಗೊಂದಲವಿದ್ದರೂ, ಕೊನೆಗೆ ಸುಮಾರು 60ಕ್ಕೂ ಹೆಚ್ಚು ದಿನ ವರ್ಕ್ಶಾಪ್ ಮಾಡಿದೆವು. ಸುನಿ ಸರ್ ಇಲ್ಲಿ ಪ್ರೇಮದ ವಿವಿಧ ಆಯಾಮಗಳನ್ನು ತಾಜಾತನದಿಂದ ಕಟ್ಟಿಕೊಡುತ್ತಿದ್ದಾರೆ. ಪ್ರೀತಿ ಎಂಬ ಎರಡು ಅಕ್ಷರದ ಪದದಲ್ಲಿ ತುಂಬ ವಿಚಾರಗಳಿವೆ. ತ್ಯಾಗ, ಕಾಳಜಿ, ಗೊಂದಲ, ಅಪಸ್ವರ.. ಹೀಗೆ ಹಲವು ಅಂಶಗಳನ್ನು ಆಪ್ತವಾಗುವಂತೆ ಇಲ್ಲಿ ಹೇಳಿದ್ದಾರೆ. ಈಗಾಗಲೇ ಸಿಂಗಾಪೂರ್ನಲ್ಲಿ ನಮ್ಮ ಚಿತ್ರದ ಪ್ರೀಮಿಯರ್ ಆಗಿದ್ದು, ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಅದೇ ರೀತಿ ರಾಜ್ಯದಲ್ಲೂ ಸಿನಿಮಾ ಸಕ್ಸಸ್ ಆಗುವ ಭರವಸೆಯಿದೆ’ ಎಂದು ಸಾತ್ವಿಕಾ ಖುಷಿ ಹಂಚಿಕೊಳ್ಳುತ್ತಾರೆ.
