Priya Anand - ಕನ್ನಡವೇ ಪ್ರಿಯ, ಕನ್ನಡವೇ ಆನಂದ!

Priya Anand -

"ರಾಜಕುಮಾರ', "ಆರೇಂಜ್​', "ಜೇಮ್ಸ್​', "ಕರಟಕ ದಮನಕ' ಚಿತ್ರಗಳ ಬಳಿಕ ಕಾಲಿವುಡ್​ ಮೂಲದ ಬಹುಭಾಷಾ ನಟಿ ಪ್ರಿಯಾ ಆನಂದ್​, "ಬಲರಾಮನ ದಿನಗಳು' ಮೂಲಕ ಮತ್ತೆ ಕನ್ನಡಕ್ಕೆ ವಾಪಸ್ಸಾಗಿರುವುದು ಗೊತ್ತಿದೆ. "ಆ ದಿನಗಳು' ನಂತರ ಬರೋಬ್ಬರಿ 19 ವರ್ಷಗಳ ಬಳಿಕ ನಿರ್ದೇಶಕ ಕೆ.ಎಂ.ಚೈತನ್ಯ ಆ್ಯಕ್ಷನ್​-ಕಟ್​ ಹೇಳಿರುವ ಗ್ಯಾಂಗ್​ಸ್ಟರ್​ ಚಿತ್ರವಾದ ಕಾರಣ "ಬಲರಾಮನ ದಿನಗಳು' ಬಗ್ಗೆ ಪ್ರಾರಂಭದಿಂದಲೂ ಕುತೂಹಲವಿತ್ತು. ಚಿತ್ರದಲ್ಲಿ ವಿನೋದ್​ ಪ್ರಭಾಕರ್​ ನಾಯಕನಾಗಿದ್ದು, ಅವರಿಗೆ ಪ್ರಿಯಾ ಆನಂದ್​ ಜೋಡಿಯಾಗಿದ್ದಾರೆ. "ಕನ್ನಡದಲ್ಲಿ ನಾನು ಇದುವರೆಗೆ ನಟಿಸಿದ ಎಲ್ಲ ನಾಲ್ಕು ಚಿತ್ರಗಳೂ ಕಮರ್ಷಿಯಲ್​ ಸಿನಿಮಾ ಆಗಿದ್ದವು. "ಬಲರಾಮನ ದಿನಗಳು' ನನಗೆ ಮೊದಲ ರೆಟ್ರೋ ಶೈಲಿಯ ಗ್ಯಾಂಗ್​ಸ್ಟರ್​ ಚಿತ್ರ. ನನಗಿಲ್ಲಿ ಚೈತನ್ಯ ಸರ್​ ತುಂಬ ಒಳ್ಳೆ ಪಾತ್ರ ನೀಡಿದ್ದಾರೆ. ಇದು ಗ್ಯಾಂಗ್​ಸ್ಟರ್​ ಸಿನಿಮಾ ಅಂತ ಎಲ್ಲರಿಗೂ ಗೊತ್ತು. ಜತೆಗೆ ಆಗಲೇ "ಆ ದಿನಗಳು' ಕಲ್ಟ್​ ಹಿಟ್​ ಆಗಿತ್ತು. ಹೀಗಾಗಿಯೇ ಈ ಸಿನಿಮಾ ಬಗ್ಗೆ ಪ್ರೇಕ್ಷಕರಲ್ಲಿ ನಿರೀಕ್ಷೆ ಹೆಚ್ಚಿದೆ. ಹಾಗೇ ಚೈತನ್ಯ ಈ ಹೊಸ ಕಥೆಯನ್ನು ಹೇಗೆ ಮಾಡಿದ್ದಾರೆ ಎಂಬ ಕುತೂಹಲವೂ ಇದೆ. ಹೀಗಾಗಿ ಈ ಪ್ರಾಜೆಕ್ಟ್​ನಲ್ಲಿ ಕೆಲಸ ಮಾಡಲು ನಾನೂ ಎಕ್ಸೈಟೆಡ್​ ಆಗಿದ್ದೆ. ಬಲರಾಮನ ಕಥೆಯಿದು. ಹಾಗಂತ ನನ್ನದು ಗ್ಲಾಮರ್​ಗಾಗಿ ಹಾಗೆ ಬಂದು ಹೀಗೆ ಹೋಗುವ ಪಾತ್ರವಲ್ಲ. ಬಲರಾಮನ ಜರ್ನಿಯಲ್ಲಿ ನನ್ನ ಪಾತ್ರವೂ ಒಂದು ಪ್ರಮುಖ ಭಾಗ. ಹೀಗಾಗಿ ಹೆಚ್ಚು ಸ್ಕ್ರೀನ್​ ಸ್ಪೇಸ್​ ಕೂಡ ಇದೆ' ಎಂದು ಮಾಹಿತಿ ನೀಡುತ್ತಾರೆ.

"ಕನ್ನಡ ಚಿತ್ರರಂಗ ನನಗೆ ಅಚ್ಚುಮೆಚ್ಚು' ಎನ್ನುವ ಪ್ರಿಯಾ ಆನಂದ್​, "ಕನ್ನಡದಲ್ಲೂ ಕಥೆಗಳನ್ನು ಕೇಳುತ್ತಿದ್ದೇನೆ. ನನಗೆ ಈ ಚಿತ್ರರಂಗ ಇಷ್ಟ, ಕರ್ನಾಟಕದಲ್ಲಿ ಇರುವುದು ಇಷ್ಟ. ನನಗೆ ಕನ್ನಡ ಚಿತ್ರಗಳ ಸಮಯದಲ್ಲಿ ಅದ್ಭುತ ಅನುಭವಗಳಾಗಿವೆ. ಆದರೂ ನಾನು ಕನ್ನಡದಲ್ಲಿ ಹೆಚ್ಚು ನಟಿಸುತ್ತಿಲ್ಲ ನಿಜ. ಏಕೆಂದರೆ ವರ್ಷಕ್ಕೆ ಮೂರು ಸಿನಿಮಾ ಮಾಡಿ, ಯಾವ ಪೋಸ್ಟರ್​ ಯಾವ ಚಿತ್ರದ್ದು ಅಂತ ಜನ ಗೊಂದಲಕ್ಕೀಡಾಗುವ ಬದಲು ಒಳ್ಳೆ ಸಿನಿಮಾಗಳ ಮೂಲಕ ಜನರಿಗೆ ಹತ್ತಿರವಾಗಬೇಕು. ಅವರ ನೆನಪಿನಲ್ಲಿ ಉಳಿಯಬೇಕು. ಕನ್ನಡದಲ್ಲಿ ಕಮರ್ಷಿಯಲ್​ ಹೊರತುಪಡಿಸಿ ಆ್​ ಬೀಟ್​, ಅಥವಾ ಬೇರೆ ರೀತಿಯ ಸಿನಿಮಾ ಮಾಡಲು ಇಷ್ಟಪಡುತ್ತೇನೆ' ಎಂದು ಹೇಳಿಕೊಳ್ಳುತ್ತಾರೆ.

ನಟ ವಿನೋದ್​ ಪ್ರಭಾಕರ್​ ಜತೆ ಕೆಲಸ ಮಾಡಿದ ಅನುಭವ ಹಂಚಿಕೊಂಡ ಪ್ರಿಯಾ, "ವಿನೋದ್​ ಅವರು ಸರಳವಾದರೂ ಅದ್ಭುತ ವ್ಯಕ್ತಿ. ತಾವಾಯಿತು ತಮ್ಮ ಕೆಲಸವಾಯಿತು ಅಂತ ಸುಮ್ಮನಿರುವುದಿಲ್ಲ. ಅವರು ಚಿತ್ರದ ಪ್ರತಿ ವಿಷಯದಲ್ಲೂ ಗಮನ ಹರಿಸುತ್ತಾರೆ. ಸಿನಿಮಾ ಬಗ್ಗೆ ತುಂಬ ಪ್ಯಾಷನ್​ ಇರುವ ನಟ. ಚೈತನ್ಯ ನಿರ್ದೇಶನ ಹೇಗಿದೆ? ವಿನೋದ್​ ತೆರೆಯನ್ನು ಹೇಗೆ ಆವರಿಸಿಕೊಳ್ಳುತ್ತಾರೆ? ಸಿನಿಮಾ ಹೇಗೆ ಮೂಡಿಬಂದಿದೆ? ಅಂತ ಜನರಲ್ಲಿ ಕುತೂಹಲವಿದ್ದರೆ, ನಮ್ಮ ಚಿತ್ರವನ್ನು ಜನ ಹೇಗೆ ಸ್ವೀಕರಿಸುತ್ತಾರೆ? ಎಂಬ ಕುತೂಹಲ ನನ್ನದು' ಎಂದು ನಗುತ್ತಾರೆ.