Shivarajkumar Interview - ಹುಡುಗಿ ಲುಕ್​, ಕಿಚ್ಚನ ಜತೆ ಕ್ಲ್ಯಾಶ್​, ದರ್ಶನ್​ ಪುತ್ರನ ಭೇಟಿ ಬಗ್ಗೆ ಮಾತು

""45' ನಿರಾಸೆಯಂತೂ ಮಾಡುವುದಿಲ್ಲ ಎಂಬ ಗ್ಯಾರಂಟಿ ಕೊಡುತ್ತೇನೆ' ಎನ್ನುವ ಶಿವಣ್ಣ, "ಪ್ರೇಕ್ಷಕರು ತುಂಬ ಎಂಜಾಯ್​ ಮಾಡುತ್ತಾರೆ, ಕೊನೆಗೆ ಒಂದೊಳ್ಳೆ ಸಂದೇಶವನ್ನೂ ಕೊಂಡೊಯ್ಯುತ್ತಾರೆ. ಚಿತ್ರದಲ್ಲಿ ಒಂದು ಸುಂದರ ಸೀಕ್ರೆಟ್​ ಇದೆ. ಜನರಿಗೆ ಇಷ್ಟವಾಗುವ ಭರವಸೆ ಇದೆ. ನಾನು ಚಿತ್ರರಂಗಕ್ಕೆ ನಾಯಕನಾಗಿ ಬಂದು 41 ವರ್ಷಗಳಾಗಿವೆ. ಜೀವನದಲ್ಲಿ ಎಲ್ಲವನ್ನೂ ನೋಡಿದ್ದೇನೆ. ಅಪ್ಪಾಜಿ ಅವರ ಸಮಯದಿಂದಲೂ ಸಿನಿಮಾ ನೋಡಿದ್ದೇನೆ. ಈ ಚಿತ್ರದಲ್ಲಿ ಒಂದು ಶಕ್ತಿ ಇದೆ ಅದು ಜನರಿಗೆ ಇಷ್ಟವಾಗುತ್ತದೆ. ಚಿತ್ರದಲ್ಲಿ ಹೊಸ ಪ್ರಪಂಚವನ್ನೇ ನೋಡಬಹುದು. ನಾನು ರಿಲೀಸ್​ಗೂ ಮುನ್ನ ಸಿನಿಮಾ ನೋಡುವುದಿಲ್ಲ. "ಜೋಗಿ', "ಟಗರು', "ವಜ್ರಕಾಯ', "ಭಜರಂಗಿ'.. ಹೀಗೆ ಯಾವ ಚಿತ್ರವನ್ನೂ ನೋಡಿರಲಿಲ್ಲ. ಆದರೆ, "45' ಡಬ್ಬಿಂಗ್​ ಮಾಡುವಾಗ ತುಂಬ ಕುತೂಹಲ ಉಂಟಾಗುತ್ತಿತ್ತು. ಸಾಮಾನ್ಯವಾಗಿ ನಾನು ಒಂದೇ ದಿನದಲ್ಲಿ ಡಬ್ಬಿಂಗ್​ ಮುಗಿಸುತ್ತೇನೆ. ಆದರೆ, "45'ಗೆ ಮೂರು ದಿನ ತೆಗೆದುಕೊಂಡೆ. ಡಬ್ಬಿಂಗ್​ ಮುಗಿಸಿ ಚಿಕಿತ್ಸೆಗೆ ಅಮೆರಿಕಗೆ ತೆರಳಬೇಕಿತ್ತು. ಅದರ ನಡುವೆಯೂ ನಿಧಾನವಾಗಿ ಡಬ್ಬಿಂಗ್​ ಮಾಡುತ್ತಾ ಈ ಉಪೇಂದ್ರ, ರಾಜ್​ ಬಿ.ಶೆಟ್ಟಿ ಅವರಿರುವ ಸನ್ನಿವೇಶಗಳನ್ನು ನೋಡುತ್ತಾ ಎಂಜಾಯ್​ ಮಾಡುತ್ತಿದ್ದೆ' ಎಂದು ಹೇಳಿಕೊಳ್ಳುತ್ತಾರೆ.

ಇನ್ನು ಟ್ರೇಲರ್​ ಕೊನೆಯಲ್ಲಿ ಭರತನಾಟ್ಯ ನೃತ್ಯಗಾರ್ತಿ ಲುಕ್​ನಲ್ಲಿ ಕಾಣಿಸಿಕೊಂಡಿರುವ ಶಿವಣ್ಣ, "ನನ್ನ ಪ್ರಕಾರ ಪಾತ್ರದ ವಿಷಯ ಬಂದಾಗ ಇಮೇಜ್​ ನೋಡಬಾರದು. ನಾವಿರೋದೇ ಭೂಮಿ ತಾಯಿ ಮೇಲೆ, ಹೆತ್ತವಳು ತಾಯಿ, ಹೆಂಡತಿ, ತಂಗಿ, ಅಕ್ಕ, ಮಗಳು... ಸ್ತ್ರೀಶಕ್ತಿಯ ನಡುವೆಯೇ ಬದುಕುತ್ತಿದ್ದೇವೆ. ಅಂತಹ ಶಕ್ತಿಯ ವೇಷ ಹಾಕುವುದೇ ಅದೃಷ್ಟ' ಎನ್ನುತ್ತಾರೆ.

ಕಿಚ್ಚ ಸುದೀಪ್​ ನಟಿಸಿರುವ "ಮಾರ್ಕ್​' ಮತ್ತು "45' ಎರಡು ಚಿತ್ರಗಳೂ ಒಂದೇ ದಿನ ಬಿಡುಗಡೆಯಾಗುತ್ತಿದ್ದು, ಬಾಕ್ಸಾಫಿಸ್​ ಕ್ಲ್ಯಾಶ್​ ಬಗ್ಗೆ ಶಿವರಾಜಕುಮಾರ್​, "ಕ್ರಿಸ್ಮಸ್​ ಮತ್ತು ಹೊಸ ವರ್ಷದ ಸಂದರ್ಭದಲ್ಲಿ ಸಾಲು ರಜೆಗಳಿರುವ ಕಾರಣ, ಎಷ್ಟೇ ಚಿತ್ರಗಳು ರಿಲೀಸ್​ ಆದರೂ, ಸಮಸ್ಯೆಯಿಲ್ಲ. "ಘೋಸ್ಟ್​' ರಿಲೀಸ್​ ಸಮಯದಲ್ಲೂ ನಾಲ್ಕೈದು ಚಿತ್ರಗಳು ಬಿಡುಗಡೆಯಾಗಿದ್ದವು. ಇದೀಗ "45' ಜತೆ ಸುದೀಪ್​ ಅವರ "ಮಾರ್ಕ್​' ಬರುತ್ತಿದೆ. ಸಾಲು ರಜೆಗಳು ಸಿಗುವುದೇ ಅಪರೂಪ. ಹೀಗಾಗಿ ಅವರು ಬರುವುದು ಬೇಡ ಎಂದು ಹೇಳಲು ಸಾಧ್ಯವೇ? ಖಂಡಿತ ಇಲ್ಲ. ನಮ್ಮ, ಅವರ ಎರಡು ಚಿತ್ರಗಳಿಗೂ ಈ ರಜೆಗಳಿಂದ ಒಳ್ಳೆಯದಾಗುತ್ತದೆ' ಎಂದು ಭರವಸೆ ವ್ಯಕ್ತಪಡಿಸುತ್ತಾರೆ.

ಕೆಲ ದಿನಗಳ ಹಿಂದಷ್ಟೇ ಕೆಂಗೇರಿ ಸಮೀಪ "ಡ್ಯಾಡ್​' ಚಿತ್ರದ ಶೂಟಿಂಗ್​ ಸಮಯದಲ್ಲಿ ನಟ ದರ್ಶನ್​ ಪುತ್ರ ವಿನೀಶ್​, ಶಿವರಾಜ್​ಕುಮಾರ್​ರನ್ನು ಭೇಟಿಯಾಗಿದ್ದರು. ಭೇಟಿಯ ವಿಡಿಯೋ ವೈರಲ್​ ಆಗಿತ್ತು. ಆ ಭೇಟಿಯ ಬಗ್ಗೆ ಇದೇ ಮೊದಲ ಬಾರಿಗೆ ಮಾತನಾಡಿದ ಶಿವಣ್ಣ, "ನಾನು ಶೂಟಿಂಗ್​ ಮಾಡುತ್ತಿದ್ದೆ. ವಿನೀಶ್​ ಅಲ್ಲೆ ನಿಂತಿದ್ದ. ಸಡನ್ನಾಗಿ ನೋಡಿದೆ ನನಗೆ ಬೇಸರವಾಯಿತು. ಮನಸ್ಸಿಗೆ ತುಂಬ ನೋವಾಯಿತು. ನನ್ನ ಬಳಿ ಬಂದು ಹೇಗಿದ್ದೀರ ಅಣ್ಣ ಅಂತ ವಿಚಾರಿಸಿದ. ನನಗೆ ಆತ ನನ್ನ ಬಗ್ಗೆ ಕೇರ್​ ಮಾಡಿದ್ದು ಮನಸ್ಸಿಗೆ ನಾಟಿತು. ನೀನು ಹೇಗಿದ್ದೀಯಾ ವಿನೀಶ್​? ಚೆನ್ನಾಗಿ ಓದು, ಚೆನ್ನಾಗಿರು. ಅಮ್ಮ ಹೇಗಿದ್ದಾರೆ? ತಲೆ ಕೆಡಿಸಿಕೊಳ್ಳಬೇಡ, ಎಲ್ಲವೂ ಸರಿಹೋಗುತ್ತದೆ. ದೇವರ ಮೇಲೆ ಭಾರ ಹಾಕಿ ಆರಾಮಾಗಿರಿ ಅಂತ ಅವನಿಗೆ ಧೈರ್ಯ ಹೇಳಿದೆ. ದರ್ಶನ್​ಗೆ ಹೀಗೇಕಾಯಿತು ಅಂತ ಯಾರಿಗೂ ಗೊತ್ತಿಲ್ಲ. ಹೀಗಾಗಲಿ ಅಂತ ಯಾರೂ ಬಯಸುವುದಿಲ್ಲ. ದರ್ಶನ್​ ಅವರ ತಂದೆಯ ಸಮಯದಿಂದಲೂ ನಾವು ಎಲ್ಲರೂ ಒಂದು ಕುಟುಂಬದಂತೆ ಇದ್ದವರು. ಅವರ ಬಗ್ಗೆ ಕಾಳಜಿ ಅಂತೂ ಇದ್ದೇ ಇದೆ' ಎನ್ನುತ್ತಾರೆ.