ಯಾವುದೇ ಪಕ್ಷದ ಸರ್ಕಾರವಿರಲಿ ಇಂಥ ಸಂದರ್ಭದಲ್ಲಿ ಅತ್ಯಂತ ಜವಾಬ್ದಾರಿಯುತವಾಗಿ, ಸಂವೇದನಾಶೀಲವಾಗಿ ನಡೆದುಕೊಳ್ಳಬೇಕು. ಏಕೆಂದರೆ, ಇದು ದೇಶದ ಸಮಗ್ರತೆ, ಏಕತೆಗೆ ಸಂಬಂಧಿಸಿದ ಪ್ರಶ್ನೆ. ಇಲ್ಲಿನ ಪ್ರಜೆಯಾಗಿ, ಸೌಲಭ್ಯಗಳನ್ನು ಬಳಸಿಕೊಂಡು ಬದುಕು ಕಟ್ಟಿಕೊಂಡಿರುವವರು ಶತ್ರುರಾಷ್ಟ್ರದ ಪರವಾಗಿ ಮಾತನಾಡುತ್ತಾರೆ, ಆ ರಾಷ್ಟ್ರಕ್ಕೆ ಜೈಕಾರ ಹಾಕುತ್ತಾರೆ ಎಂಬ ಘಟನೆಯೇ ತೀವ್ರ ಖಂಡನಾರ್ಹ. ಇಂಥ ರಾಷ್ಟ್ರವಿರೋಧಿ ಮಾನಸಿಕತೆಯನ್ನು, ಕೃತ್ಯವನ್ನು ಯಾವುದೇ ಕಾರಣಕ್ಕೂ ಸಹಿಸಿಕೊಳ್ಳಬಾರದು. ಜವಾಬ್ದಾರಿಯುತ ಸ್ಥಾನದಲ್ಲಿ ಇರುವವರು ಸಂಯಮದಿಂದ, ಎಚ್ಚರದಿಂದ ಪ್ರತಿಕ್ರಿಯಿಸಬೇಕೆ ಹೊರತು ಜನರ ಭಾವನೆಗಳಿಗೆ ಘಾಸಿಯಾಗುವಂಥ ಹೇಳಿಕೆಗಳನ್ನು ನೀಡಬಾರದು. ವಿಧಾನಸೌಧದಲ್ಲಿ ನಡೆದ ಘಟನೆಯನ್ನು ಕಾಂಗ್ರೆಸ್ ಮತ್ತು ಬಿಜೆಪಿ ನಡುವಿನ ಸಂಘರ್ಷ ಎಂದು ಭಾವಿಸಬಾರದು ಮತ್ತು ರಾಜಕಾರಣಿಗಳು ಹಾಗೆ ಬಿಂಬಿಸಲೂ ಬಾರದು. ದೇಶಕ್ಕೆ ಸಂಬಂಧಿಸಿದ ವಿಷಯಗಳು ಬಂದಾಗ ಘನತೆ, ಗೌರವವನ್ನು ಕಾಪಾಡಿಕೊಂಡು ನ್ಯಾಯಯುತ ಮೌಲ್ಯಗಳನ್ನು ರಕ್ಷಿಸಬೇಕೆ ಹೊರತು, ಆರೋಪಿಗಳ ರಕ್ಷಣೆ ಮಾಡಕೂಡದು.
