ಕನ್ನಡವು ಎಲ್ಲ ಕ್ಷೇತ್ರಗಳಲ್ಲಿ ಪರಿಣಾಮಕಾರಿಯಾಗಿ ಬಳಕೆಯಾಗುತ್ತಿದೆ. ತಂತ್ರಜ್ಞಾನದಲ್ಲೂ ಯಶಸ್ವಿಯಾಗಿ ಅನುಷ್ಠಾನಿಸಲಾಗಿದ್ದು, ಮೊಬೈಲ್ ಫೋನ್ಗಳಲ್ಲಿ ಕನ್ನಡ ಕೀಲಿಮಣೆ ಬಳಸುವವರ ಸಂಖ್ಯೆ ಹೆಚ್ಚುತ್ತಿದೆ. ಆಪ್ಗಳಲ್ಲಿ ಸಹ ಕನ್ನಡದ ಬಳಕೆ ಸುಲಭಸಾಧ್ಯವಾಗಿದೆ. ಅಂದರೆ, ಪ್ರಬಲವಾದ ಇಚ್ಛಾಶಕ್ತಿಯೊಂದಿಗೆ ಭಾಷೆಯನ್ನು ಬಳಸಲು ಆರಂಭಿಸಿದರೆ, ಅದರ ಬೆಳವಣಿಗೆ ಖಂಡಿತ ಸಾಧ್ಯ ಎಂಬುದಕ್ಕೆ ಈ ನಿದರ್ಶನಗಳು ಸಾಕ್ಷಿ. ನ್ಯಾಯಾಲಯದ ಕಲಾಪಗಳಲ್ಲಿ ಕನ್ನಡ ಬಳಕೆಯಾಗಬೇಕು, ತೀರ್ಪು ಕನ್ನಡದಲ್ಲೇ ನೀಡಬೇಕು ಎಂಬ ಬೇಡಿಕೆ ಹಳೆಯದ್ದು. ಆದರೆ, ಅದಕ್ಕೀಗ ಸ್ಪಂದನೆಯ ರೂಪ ಸಿಗುತ್ತಿರುವುದು ಸಕಾರಾತ್ಮಕ ಬೆಳವಣಿಗೆ. ಆದರೆ, ಇದು ಕೇವಲ ಒಂದೆರಡು ಪ್ರಕರಣ ಅಥವಾ ತೀರ್ಪಗಳಿಗೆ ಸೀಮಿತವಾಗಬಾರದು ಎಂಬ ಆಶಯ ಕನ್ನಡಿಗರದ್ದು. ‘ಕನ್ನಡದ ಅವಸಾನ ಆಗಬಾರದು ಎನ್ನುವುದಾದರೆ ಕನ್ನಡಕ್ಕೆ ಮಾನ್ಯತೆ ಸಿಗಬೇಕು. ಸಾಂವಿಧಾನಿಕ ಸಂಸ್ಥೆಗಳಲ್ಲಿಯೂ ಕನ್ನಡದಲ್ಲಿ ವ್ಯವಹಾರ ನಡೆಯಬೇಕು’ ಎಂದು ನ್ಯಾ. ದೀಕ್ಷಿತರ ಆಶಯ ಸ್ವಾಗತಾರ್ಹ. ಇಷ್ಟೆಲ್ಲ ಜಾಗೃತಿ ಮತ್ತು ಅರಿವಿನ ಅಬ್ಬರದ ಮಧ್ಯೆಯೂ, ಕೆಲವರು ಕನ್ನಡದ ಬಳಕೆಯ ಬಗ್ಗೆ ಕೀಳರಿಮೆ ಹೊಂದಿರುವುದು ದುರದೃಷ್ಟಕರ. ಇಲ್ಲಿಯ ಜನರ ಭಾವನೆಗಳನ್ನು ಅರಿಯಲು, ಸ್ಪಂದಿಸಲು ರಾಜ್ಯಭಾಷೆಯಾದ ಕನ್ನಡವೇ ಹೆಚ್ಚು ಸಮರ್ಥ. ಹಾಗಾಗಿ, ಕನ್ನಡಕ್ಕೆ ಆತಂಕವಿದೆ ಎಂದು ಹಳಹಳಿಸುವ ಬದಲು ನ್ಯಾಯಾಂಗ, ವೈದ್ಯಕೀಯ, ಶಿಕ್ಷಣ ಸೇರಿದಂತೆ ಎಲ್ಲ ಕ್ಷೇತ್ರಗಳಲ್ಲಿ ಕನ್ನಡ ಇನ್ನೂ ಹೆಚ್ಚಿನ ಪ್ರಮಾಣದಲ್ಲಿ ಬಳಸುವಂತಾದರೆ ಕನ್ನಡದ ನಾಳೆಗಳು ನಿರಾಳ.
