ಅದು ಎಷ್ಟರಮಟ್ಟಿಗೆ ಎಂದರೆ ಬಂಗಾಲದ ಜನಪ್ರಿಯ ಬಾಳೆದಿಂಡಿನ ಖಾದ್ಯ ಮೊಚಾರ್ ಘೊಂಟೊ ಆಲೂಗಡ್ಡೆಯನ್ನು ತನ್ನ ಜೊತೆ ಸೇರಿಸಿಕೊಂಡು ಅಪ್ಡೇಟ್ ಆಯಿತು. ಮಾಂಸಾಹಾರಿಗಳು ಕೊಲ್ಕೊತ್ತಾದ ಬಿರ್ಯಾನಿ ಸವಿದಿದ್ದರೆ ಅದರಲ್ಲಿ ಆಲೂಗಡ್ಡೆಯ ಉಪಸ್ಥಿತಿಯನ್ನು ಖಂಡಿತ ಗಮನಿಸಿರುತ್ತೀರಿ. ಇದೇ ಮಾತು ಅಲ್ಲಿನ ಕೆಲವು ಮೀನಿನ ಖಾದ್ಯಗಳಿಗೂ ಅನ್ವಯವಾಗುತ್ತದೆ. ಆಲೂ ಪರೋಟಾ, ದಮ್ ಆಲೂ, ಬಟಾಟೆ ಭಾಜಿ ಇವೆಲ್ಲ ಭಾರತೀಯ ಖಾದ್ಯಗಳ ಪಟ್ಟಿಯಲ್ಲಿ ಇತ್ತೀಚೆಗೆ ಸೇರ್ಪಡೆಯಾಗಿರುವ ತಿನಿಸುಗಳು. ಇಲ್ಲಿ ಗಮನಿಸಬೇಕಾಗಿರುವ ಮತ್ತೊಂದು ಸಂಗತಿಯೆಂದರೆ ಭಾರತದಲ್ಲಿ ನಾವು ಆಲೂಗಡ್ಡೆಗೆ ಕರೆಯುವ ಹೆಸರುಗಳು. ಅಮೆರಿಕ ಮೂಲದ ಮತ್ತು ಅಲ್ಲಿ ಹೆಚ್ಚು ಬಳಸುವ ಸಿಹಿಗೆಣಸಿನ ಹೆಸರು ಇಪೊಮೊ ಬಟಾಟ. ಹೀಗಾಗಿ ಈ ಹೆಸರು ಆಲೂಗಡ್ಡೆಗೂ ಅಂಟಿಕೊಂಡಿತು. ಪೋರ್ಚುಗೀಸ್ನಲ್ಲಿಯೂ ಇದರ ಹೆಸರು ಬಟಾಟ. ಹೀಗಾಗಿ ಪೋರ್ಚುಗೀಸರ ಮೂಲಕ ಭಾರತ ಪ್ರವೇಶಿಸಿದ ಈ ತರಕಾರಿ ಗೋವಾ, ಮಹಾರಾಷ್ಟ್ರ ಮತ್ತು ಕರ್ನಾಟಕವೂ ಸೇರಿದಂತೆ ಕೊಂಕಣ ಪ್ರದೇಶದಲ್ಲಿ ಪೋರ್ಚುಗೀಸರಿಂದ ಹೆಸರನ್ನೂ ಬಳುವಳಿಯಾಗಿ ಪಡೆದು ಬಟಾಟೆಯೆಂದೇ ಕರೆಯಲ್ಪಡುತ್ತದೆ. ಆಲೂ ಎಂಬುದಕ್ಕೆ ಸಂಸ್ಕೃತ ಮತ್ತು ಪ್ರಾಕೃತದಲ್ಲಿ ಗೆಡ್ಡೆ ಎಂದು ಅರ್ಥ. ಹೀಗಾಗಿ ಅದು ಆ ಭಾಷೆಗಳಿಂದ ಎರವಲು ಪಡೆದು ಕನ್ನಡ ಮತ್ತು ಹಿಂದಿಯೂ ಸೇರಿದಂತೆ ಉಳಿದ ಭಾರತೀಯ ಭಾಷೆಗಳಲ್ಲಿ ಬಳಸಲ್ಪಡುತ್ತಿದೆ.
