ಹೀಗಾಗಿ, ಚೀನಾ ನಿರ್ವಿುಸಲು ಹೊರಟಿರುವ ಅಣೆಕಟ್ಟೆ ಮತ್ತು ಜಲವಿದ್ಯುತ್ ಯೋಜನೆ ಹಲವು ಆಯಾಮಗಳಲ್ಲಿ ತೀವ್ರ ಕಳವಳಕಾರಿಯಾಗಿದೆ. ಮುಖ್ಯವಾಗಿ, ಅಣೆಕಟ್ಟಿನ ಕೆಳಭಾಗದಲ್ಲಿರುವ ಭಾರತ ಮತ್ತು ಬಾಂಗ್ಲಾದೇಶದ ಲಕ್ಷಾಂತರ ಜನರ ಬದುಕಿಗೆ ತೊಂದರೆಯಾಗುವ ಭೀತಿ ಇದೆ. ಅಲ್ಲದೆ, ಸ್ಥಳೀಯ ಪರಿಸರದ ಮೇಲೆ ಅದು ವ್ಯತಿರಿಕ್ತ ಪರಿಣಾಮ ಬೀರಲಿದ್ದು, ನೈಸರ್ಗಿಕ ಸಂರಚನೆಗೂ ಧಕ್ಕೆ ಒದಗಲಿದೆ. ಅಲ್ಲದೆ, ನದಿ ನೀರಿನ ಹರಿವಿನ ಮೇಲೆ ಕ್ರಮೇಣ ಚೀನಾವೇ ನಿಯಂತ್ರಣ ಸಾಧಿಸುವ ಸಾಧ್ಯತೆ ಇದ್ದು, ಇದು ಹೊಸದೊಂದು ಜಲವಿವಾದಕ್ಕೆ ಕಾರಣವಾಗುತ್ತದೆ. ಒಂದು ವೇಳೆ, ಭಾರಿ ಪ್ರಮಾಣದ ನೀರನ್ನು ಹೊರಬಿಟ್ಟರೆ, ಅಣೆಕಟ್ಟು ಪ್ರದೇಶದ ಕೆಳ ಭಾಗದಲ್ಲಿ ವಾಸಿಸುವ ಜನರ ಬದುಕು ಮೂರಾಬಟ್ಟೆಯಾಗುತ್ತದೆ. ಅಣೆಕಟ್ಟು ನಿರ್ಮಾಣ ಇಂಜಿನಿಯರಿಂಗ್ ಸವಾಲುಗಳನ್ನು ಎದುರಿಸಲಿದ್ದು, ಚೀನಾ ಇಂಥ ದುಸ್ಸಾಹಸದಿಂದ ಹಿಂದೆ ಸರಿಯುವುದು ಒಳಿತು.
