ಆಘಾತ ವ್ಯಕ್ತಪಡಿಸಿದ ಕೋರ್ಟ್: ಅರ್ಜಿದಾರ ಮಹಿಳೆ ಮೇ 25ರಂದು ಠಾಣೆಗೆ ಬಂದು ಮೌಖಿಕ ಹೇಳಿಕೆ ನೀಡಿದ್ದರು. ಪ್ರತಿದಿನ ಕುಡಿದು ಬಂದು ಪತಿ ನನ್ನ ಹಲ್ಲೆ ನಡೆಸುತ್ತಿದ್ದಾನೆ, ಇದೇ ಕಾರಣಕ್ಕೆ ಇಬ್ಬರ ನಡುವೆ ಜಗಳವಾಗುತ್ತಿದೆ ಎಂದು ತಿಳಿಸಿದ್ದರು. ಇದರಿಂದ, ಆಕೆಯ ಪತಿಯನ್ನು ಠಾಣೆಗೆ ಕರೆಸಿ, ಸಮಸ್ಯೆ ಬಗೆಹರಿಸಲು ಪ್ರಯತ್ನಿಸಲಾಯಿತು. ಆದರೆ, ಮಹಿಳೆ ಪತಿಯೊಂದಿಗೆ ತೆರಳಲು ಸಿದ್ಧಳಿರಲಿಲ್ಲ. ಆಕೆಯ ಪಾಲಕರೂ ಠಾಣೆಗೆ ಬರಲು ನಿರಾಕರಿಸಿದರು. ನಂತರ ಪುನರ್ವಸತಿ ಕೇಂದ್ರವನ್ನು ಸಂಪರ್ಕಿಸಿ, ಅಲ್ಲಿಗೆ ಕಳುಹಿಸಿಕೊಡಲಾಯಿತು ಎಂದು ಇನ್ಸ್ಪೆಕ್ಟರ್ ಪ್ರಮಾಣ ಪತ್ರದಲ್ಲಿ ತಿಳಿಸಿದ್ದರು. ಆದರೆ, ಪತಿಯೊಂದಿಗೆ ತೆರಳಲು ನಿರಾಕರಿಸಿದ 22 ವರ್ಷದ ಮಹಿಳೆ ಮತ್ತವಳ 3 ವರ್ಷದ ಮಗಳನ್ನು ವೇಶ್ಯಾವಾಟಿಕೆ ಸಂತ್ರಸ್ತರ ಪುನರ್ವಸತಿ ಕೇಂದ್ರಕ್ಕೆ ಕಳುಹಿಸಿರುವುದು ನಿಜಕ್ಕೂ ಆಘಾತಕಾರಿ ಎಂದು ಕೋರ್ಟ್ ಅಚ್ಚರಿ ವ್ಯಕ್ತಪಡಿಸಿದೆ.
