ಸೀನು ತಡೆದಾಗ ಉದಯ ಕಾಲದ ಸೂರ್ಯನನ್ನು ನೋಡುವುದೂ ಸೇರಿದಂತೆ ಪೀನಸ ನಿವಾರಕ ಚಿಕಿತ್ಸೆಗಳು, ವಾಂತಿ ತಡೆಯುವುದರಿಂದ ಉದ್ಭವಿಸಿದ ಕಾಯಿಲೆಗಳಿಗೆ ವಮನ ಕರ್ಮ, ಸ್ನೇಹನಸ್ಯ, ಲಂಘನ, ವ್ಯಾಯಾಮ, ಶುಕ್ರ ತಡೆದು ಉದಾವರ್ತವಾದಾಗ ಸಮರ್ಪಕ ಲೈಂಗಿಕ ಕ್ರಿಯೆ, ಹಾಲು ಅನ್ನ ಸೇವನೆ, ಅಭ್ಯಂಗ, ನಿರೂಹ ಬಸ್ತಿಗಳು ಪರಿಹಾರದಲ್ಲಿ ಸೇರಿವೆ. ಹಸಿವಾದಾಗ ಆಹಾರ ಸೇವನೆ ಮಾಡದೆ ಉಂಟಾದ ಉದಾವರ್ತದಲ್ಲಿ ಸವಿರುಚಿಯ ಹಿತಕರ ಷಡ್ರಸ ಭೋಜನವನ್ನು ಮಿತಪ್ರಮಾಣದಲ್ಲಿ ಮಾಡುವುದರೊಂದಿಗೆ ಸ್ನೇಹನ ಚಿಕಿತ್ಸೆ ಪೂರಕವಾಗಿರುತ್ತದೆ. ಬಾಯಾರಿಕೆ ತಡೆದು ಹುಟ್ಟಿಕೊಂಡ ಉದಾವರ್ತ ಉಪಶಮನಕ್ಕೆ ಸಿಹಿ ಅನ್ನಪಾನ, ದ್ರಾಕ್ಷಾರಸ, ಏದುಸಿರಿನಿಂದಾದ ಉದಾವರ್ತದಲ್ಲಿ ವಿಶ್ರಾಂತಿ, ಪಥ್ಯಾಹಾರ ಸೇವನೆಯೇ ಮುಖ್ಯವಾಗುತ್ತದೆ. ನಿದ್ರೆಯನ್ನು ತಡೆದು ಬಂದ ಉದಾವರ್ತದಲ್ಲಿ ಎಮ್ಮೆಯ ಹಾಲು, ಎಳ್ಳೆಣ್ಣೆಯಿಂದ ಅಭ್ಯಂಗ, ಸರಿಯಾದ ನಿದ್ರೆಯೇ ಸೂಕ್ತ ಪರಿಹಾರ. ಜೋಳದ ತಿಳಿನೀರು, ಹೆಸರುಬೇಳೆ ಕಟ್ಟು, ಖರ್ಜೂರ, ದ್ರಾಕ್ಷಿಹಣ್ಣು, ನಿಂಬೆಹಣ್ಣು, ಕೊತ್ತಂಬರಿ, ಓಮ, ಲವಂಗ, ಹಿಂಗು, ಬೆಳ್ಳುಳ್ಳಿ, ಒಂಟೆಯ ಹಾಲು, ಶುಂಠಿ, ಕಾಳುಮೆಣಸು, ತರಕಾರಿಗಳು, ಹಾಲಿನ ಉತ್ಪನ್ನಗಳು ಹಿತಕರ ಆಹಾರಗಳಲ್ಲಿ ಸೇರಿವೆ.
