ಹೂವು ಮಾರುಕಟ್ಟೆಗೆ ಪ್ರತ್ಯೇಕ ಜಾಗದ ಕೂಗು

ಕಿರುವಾರ ಎಸ್​.ಸುದರ್ಶನ್​ ಕೋಲಾರ
ಕೋಲಾರ ಎಂಸಿಎಂಸಿ ಮಾರುಕಟ್ಟೆಗೆ ಹೆಚ್ಚುವರಿ ಜಾಗ ಕಲ್ಪಿಸಬೇಕು ಎಂದು ರೈತರು, ವ್ಯಾಪಾರಸ್ಥರು ಸರ್ಕಾರ, ಜಿಲ್ಲಾಡಳಿತವನ್ನು ಒತ್ತಾಯಿಸುತ್ತಿರುವ ಬೆನ್ನಲ್ಲೇ ಹೂವು ಮಾರುಕಟ್ಟೆಗೆ ಪ್ರತ್ಯೇಕ ಜಾಗ ಕಲ್ಪಿಸಬೇಕು ಎಂಬ ಕೂಗು ಎದ್ದಿದೆ.

ಜಿಲ್ಲೆಯಲ್ಲಿ 15 ಸಾವಿರಕ್ಕೂ ಅಧಿಕ ಹೂವು ಬೆಳೆಗಾರರಿದ್ದಾರೆ. ಕೋಲಾರ ನಗರದ ಹಳೇ ಬಸ್​ನಿಲ್ದಾಣದಲ್ಲಿ ಹೂವಿನ ವಹಿವಾಟು ನಡೆಯುತ್ತಿದ್ದು, ಜಾಗ ಕಿರಿದಾಗಿದೆ. ಇದರಿಂದಾಗಿ ರೈತರು ಹೂವನ್ನು ವಾಹನಗಳಲ್ಲಿ ತಂದು ಮಾರಾಟ ಮಾಡುವುದು ದೊಡ್ಡ ಸವಾಲಾಗಿದೆ. ಟೆಂಪೋ, ಗೂಡ್ಸ್​ ಆಟೋ, ದ್ವಿಚಕ್ರವಾಹನದಲ್ಲಿ ಹೂವು ತರುತ್ತಾರೆ. ಜಾಗ ಕಿರಿದಾಗಿರುವುದರಿಂದ ಸಮಯಕ್ಕೆ ಸರಿಯಾಗಿ ಮಾರಾಟ ಮಾಡಲು ಸಾಧ್ಯವಾಗುತ್ತಿಲ್ಲ.
ಹಳೇ ಬಸ್​ ನಿಲ್ದಾಣದಲ್ಲಿರುವ ಹೂವು ಮಳಿಗೆಗಳ ಎದುರಿನಲ್ಲಿ ಕೆಲವರು ಅನಧಿಕೃತವಾಗಿ ಹೂವಿನ ಅಂಗಡಿ ಇಟ್ಟುಕೊಂಡಿದ್ದಾರೆ. ಬಸ್​ ನಿಲ್ದಾಣದಲ್ಲಿರುವ ತಂಗುದಾಣದಲ್ಲೂ ಹೂವು ಮೂಟೆ ದಾಸ್ತಾನು ಮಾಡುವುದು ವಹಿವಾಟಿಗೆ ತೊಂದರೆಯಾಗಿದೆ. ಈ ಹಿನ್ನೆಲೆಯಲ್ಲಿ ಅನಧಿಕೃತ ವ್ಯಾಪರಸ್ಥರನ್ನು ಹಳೇ ಬಸ್​ ನಿಲ್ದಾಣ ಸಮೀಪದಲ್ಲಿರುವ ಖಾಲಿ ಜಾಗದಲ್ಲಿ ಅಂಗಡಿ ಇಟ್ಟುಕೊಳ್ಳಲು ಅವಕಾಶ ಕಲ್ಪಿಸಿದರೆ ಹೂವು ಮಾರುಕಟ್ಟೆಗೆ ಸೂಕ್ತ ಜಾಗವಾಗುತ್ತದೆ ಎಂಬುದು ವ್ಯಾಪಾರಿಗಳ ಅಭಿಪ್ರಾಯವಾಗಿದೆ.
ಬರದ ನಡುವೆಯೂ ಕೊಳವೆಬಾವಿಗಳಲ್ಲಿ ಲಭ್ಯವಿರುವ ಅಲ್ಪ ಪ್ರಮಾಣದ ನೀರಿನಲ್ಲೇ ಹೂವು ಬೆಳೆದು ರೈತರು ಮಾರುಕಟ್ಟ್ಟೆಗೆ ತರುತ್ತಾರೆ. 25ಕ್ಕೂ ಹೆಚ್ಚು ಹೂವು ವ್ಯಾಪಾರಸ್ಥರಿದ್ದು, ಕೋಲಾರ, ಶ್ರೀನಿವಾಸಪುರ, ಮುಳಬಾಗಿಲು, ಕೆಜಿಎ್​, ಬಂಗಾರಪೇಟೆ ರೈತರು ಹೂವು ತರುತ್ತಾರೆ. ಪ್ರಮುಖವಾಗಿ ಚಾಮಂಚಿ, ಬಟನ್​ ರೋಜಾ, ಮಲ್ಲಿಗೆ, ಕಾಕಡ, ಕನಕಾಂಬರ, ಚೆಂಡು ಹೂವು ಸೇರಿ ವಿವಿಧ ಜಾತಿಯ ಅಲಂಕಾರಿಕ ಹೂವಿನ ಮಾರಾಟ ನಡೆಯುತ್ತದೆ.
ನಗರಸಭೆಯಿಂದ ನಿರ್ಮಿಸಿರುವ ವಾಣಿಜ್ಯ ಮಳಿಗೆಗಳನ್ನು ವ್ಯಾಪಾರಸ್ಥರು ಬಾಡಿಗೆಗೆ ಪಡೆದು ಹೂವು ವ್ಯಾಪಾರ ನಡೆಸಿಕೊಳ್ಳುತ್ತಿದ್ದಾರೆ. ಪ್ರತಿದಿನ ಹೆಚ್ಚು ರೈತರು ಹೂವು ತರುವುದರಿಂದಾಗಿ ಬೀದಿಬದಿ ಇಟ್ಟಿರುವ ಅಂಗಡಿಗಳನ್ನು ತೆರವುಗೊಳಿಸಿ ಇಂದಿರಾ ಕ್ಯಾಂಟೀನ್​ ಪಕ್ಕದ ಖಾಲಿ ಜಾಗಕ್ಕೆ ಸ್ಥಳಾಂತರ ಮಾಡಿ, ಹೂವು ಮಾರುಕಟ್ಟೆಗೆ ಜಾಗ ಕಲ್ಪಿಸಬೇಕು ಎಂಬುದು ವ್ಯಾಪಾರಸ್ಥರ ಒತ್ತಾಯವಾಗಿದೆ.

• ಜಾಗದ ವ್ಯವಸ್ಥೆಗೆ ಒತ್ತಾಯ
  ಹೂವು ಮಾರಾಟಕ್ಕೆ ಜಿಲ್ಲೆಯಲ್ಲಿ ಸೂಕ್ತ ಮಾರುಕಟ್ಟೆ ಕಲ್ಪಿಸಿದರೆ ಬೆಳೆಗಾರರ ಸಂಖ್ಯೆಯೂ ಹೆಚ್ಚುತ್ತದೆ. ಹೂವು ಬೆಳೆಗಾರರ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಹೆಚ್ಚಾಗುತ್ತಿರುವ ಬಗ್ಗೆ ಸಂಬಂಧಪಟ್ಟ ಅಧಿಕಾರಿಗಳ ಗಮನಕ್ಕಿದ್ದರೂ ಜಾಗ ಕಲ್ಪಿಸಲು ಮುಂದಾಗುತ್ತಿಲ್ಲ. ಇರುವ ಜಾಗ ಒತ್ತುವರಿಯಾಗಿದ್ದು, ಅದನ್ನು ತೆರವುಗೊಳಿಸಿ ಮಾರುಕಟ್ಟೆಗೆ ವ್ಯವಸ್ಥೆ ಮಾಡಬೇಕು ಎಂದು ವ್ಯಾಪಾರಸ್ಥರು ಒತ್ತಾಯಿಸಿದ್ದಾರೆ.
• ತಂಗುದಾಣ ಖಾಲಿ ಮಾಡಿಸಿ
  ಹಳೇ ಬಸ್​ ನಿಲ್ದಾಣದಿಂದ ಬೆಂಗಳೂರು, ಮುಳಬಾಗಿಲು, ಶ್ರೀನಿವಾಸಪುರ, ಚಿಂತಾಮಣಿ, ಚಿಕ್ಕಬಳ್ಳಾಪುರಕ್ಕೆ ಹೋಗುವ ಖಾಸಗಿ ಬಸ್​ ನಿಲ್ಲುತ್ತವೆ. ಪ್ರಯಾಣಿಕರಿಗಾಗಿ ಇರುವ ತಂಗುದಾಣದಲ್ಲಿ ಚಿಲ್ಲರೆ ವ್ಯಾಪಾರಸ್ಥರು ಹೂವಿನ ಮೂಟೆ ಹಾಕಿಕೊಂಡಿರುತ್ತಾರೆ. ಇದರಿಂದಾಗಿ ಬಿಸಿಲಿನಲ್ಲೇ ಬಸ್​ಗಾಗಿ ಕಾಯುವ ಪರಿಸ್ಥಿತಿ ಎದುರಾಗಿದೆ. ತಂಗುದಾಣದ ಸುತ್ತ ಇರುವ ಅಂಗಡಿ ತೆರವುಗೊಳಿಸಿದರೆ ಬಸ್​ಗಳು ಹಾಗೂ ಮಾರುಕಟ್ಟೆಗೆ ಬರುವ ವಾಹನಗಳು ತಿರುವು ಮಾಡಿಕೊಳ್ಳಲು ಸುಲಭವಾಗುತ್ತದೆ.
• ಹಣ್ಣಿನ ಅಂಗಡಿಗಳಿಂದ ಸಂಚಾರಕ್ಕೆ ಅಡ್ಡಿ
  ಹಳೇ ಬಸ್​ ನಿಲ್ದಾಣದ ಪಕ್ಕದಲ್ಲೆ ನಗರಸಭೆ ಜಾಗ ಖಾಲಿಯಿದ್ದು, ಇದರಲ್ಲಿ ಕೆಲವರು ಅನಧಿಕೃತವಾಗಿ ಗ್ಯಾರೇಜ್​ ತೆರೆದಿದ್ದಾರೆ. ಇನ್ನು ಕೆಲ ಹಣ್ಣಿನ ವ್ಯಾಪಾರಿಗಳು ರಸ್ತೆ ಬದಿ ಅಂಗಡಿ ಇಟ್ಟುಕೊಂಡು ವಾಹನಗಳ ಸುಗಮ ಸಂಚಾರಕ್ಕೆ ಅಡ್ಡಿ ಉಂಟು ಮಾಡಿದ್ದಾರೆ. ಹಣ್ಣಿನ ಅಂಗಡಿಗಳನ್ನು ಖಾಲಿಜಾಗದ ಒಂದು ಕಡೆ ಇರಿಸಿಕೊಳ್ಳಲು ನಗರಸಭೆ ಅಧಿಕಾರಿಗಳು, ಪೊಲೀಸರು ಸೂಚಿಸಿದರೆ ವಾಹನಗಳ ಸಂಚಾರಕ್ಕೆ ಆಗುವ ಅಡ್ಡಿ ತಪ್ಪಿಸಬಹುದು. ಅಂತೆಯೇ, ಹಳೇ ಬಸ್​ ನಿಲ್ದಾಣದ ಭಾಗದಲ್ಲಿ ಇಟ್ಟುಕೊಂಡಿರುವ ಬಹುತೇಕ ಅಂಗಡಿ ಮಾಲೀಕರು ನಗರಸಭೆಗೆ ತೆರಿಗೆ ಪಾವತಿ ಮಾಡುವುದಿಲ್ಲ ಎಂಬ ಆರೋಪ ಇದೆ.
• ಹೊರ ರಾಜ್ಯದಲ್ಲೂ ಬೇಡಿಕೆ
  ಕೋಲಾರ ಜಿಲ್ಲೆಯ ರೈತರು ಬೆಳೆದು ಮಾರುಕಟ್ಟೆಗೆ ತರುವ ಚೆಂಡು ಹೂವು, ಮಲ್ಲಿಗೆ, ಸೇವಂತಿಗೆ, ಚಾಮಂಚಿ, ರೋಜಾ ಸೇರಿ ಹಲವು ಬಗೆಯ ಹೂವು ಕೇರಳ, ತಮಿಳುನಾಡು, ಆಂಧ್ರ, ತೆಲಂಗಾಣ, ದೆಹಲಿಗೆ ಸರಬರಾಜು ಆಗುತ್ತದೆ. ಇದರಿಂದಾಗಿ ಜಿಲ್ಲೆಯ ಹೂವುಗಳಿಗೆ ಬೇಡಿಕೆ ಇದೆ.

• ಹೂವು ವ್ಯಾಪಾರಸ್ಥರು ಅನುಭವಿಸುತ್ತಿರುವ ಕಷ್ಟಗಳ ಬಗ್ಗೆ ನಗರಸಭೆ ಅಧಿಕಾರಿಗಳ ಗಮನಕ್ಕೆ ತರಲಾಗಿದೆ. ಆದರೆ ಯಾವುದೇ ಪ್ರಯೋಜನವಾಗಿಲ್ಲ. ಹೂವು ಮಾರುಕಟ್ಟೆಗೆ ಬೇಡಿಕೆಯಿದ್ದು, ಅಧಿಕಾರಿಗಳು ಬೇಡಿಕೆ ಈಡೇರಿಸಲು ಮುಂದಾಗಬೇಕು.

• ಹೂ ವ್ಯಾಪಾರಿ, ಹಳೇ ಬಸ್​ ನಿಲ್ದಾಣ, ಕೋಲಾರ.