ಇದು ರೋಣ ತಾಲೂಕಿನ ಹೊಳೆಆಲೂರಿನಲ್ಲಿ ಮೂವರು ಮಕ್ಕಳೊಂದಿಗೆ ಆತ್ಮಹತ್ಯೆ ಮಾಡಿಕೊಳ್ಳಲು ಯತ್ನಿಸಿದ ಘಟನೆ ಕುರಿತು ಬಾಲಕಿ ನಿತ್ಯಶ್ರೀ ಬಿಚ್ಚಿಟ್ಟ ಕರಾಳತೆ. ಬುಧವಾರ ನಸುಕಿನಲ್ಲಿ ಉಮಾ ಸಂಗಮೇಶ ಶೆಲ್ಲಿಕೇರಿ (44) ಎಂಬ ಮಹಿಳೆ ಮೂವರು ಮಕ್ಕಳನ್ನು ಕರೆದುಕೊಂಡು ಮಲಪ್ರಭಾ ನದಿ ಬಳಿ ತೆರಳಿದ್ದರು. ಈಕೆಗೆ ನಾಲ್ವರು ಹೆಣ್ಣುಮಕ್ಕಳು. ಒಬ್ಬಾಕೆ ಧಾರವಾಡದಲ್ಲಿ ಪಿಯುಸಿ ಓದುತ್ತಿದ್ದಾಳೆ. ಉಳಿದ ಮೂವರು ಮಕ್ಕಳ ಸಮೇತ ಆತ್ಮಹತ್ಯೆ ಮುಂದಾಗಿದ್ದಳು. 7ನೇ ತರಗತಿ, 1ನೇ ತರಗತಿಯಲ್ಲಿ ಕಲಿಯುವ ಹೆಣ್ಣುಮಕ್ಕಳು ಸಾಯಲು ಬರಲ್ಲ ಎಂದು ತಾಯಿಯ ಜತೆಗೆ ತಕರಾರು ತೆಗೆದಿದ್ದಾರೆ. ಆತ್ಮಹತ್ಯೆ ಬೇಡ ಎಂದು ಸೀರೆ ಹಿಡಿದು ಜಗ್ಗಿದ್ದಾರೆ. ಆಗ ಸೀರೆ ಕಿತ್ತುಬಂದಿದೆ. ಆದ್ರೂ ಮನಕರಗದ ತಾಯಿ, 2 ವರ್ಷದ ಹೆಣ್ಣುಮಗುವನ್ನು ಬಗಲಲ್ಲಿ ಎತ್ತಿಕೊಂಡು ಹೊಳೆಆಲೂರ- ಬದಾಮಿ ಸಂಪರ್ಕ ಸೇತುವೆ ಕೆಳಗೆ ನದಿಗೆ ಹಾರಿದ್ದಳು. ತಾಯಿಯ ಕೈಯಿಂದ ತಪ್ಪಿಸಿಕೊಂಡು ಮನೆಗೆ ಓಡಿ ಬಂದ ಮಕ್ಕಳಿಬ್ಬರು ಗ್ರಾಮಸ್ಥರಿಗೆ ವಿಚಾರ ತಿಳಿಸಿದ್ದರು. ಸುದ್ದಿ ತಿಳಿಯುತ್ತಿದ್ದಂತೆ ಸ್ಥಳಕ್ಕೆ ದೌಡಾಯಿಸಿದ ಗ್ರಾಮಸ್ಥರು, ಪೊಲೀಸರು ಮತ್ತು ಅಗ್ನಿಶಾಮಕ ಸಿಬ್ಬಂದಿ ತಾಯಿ-ಮಗುವಿಗಾಗಿ ಶೋಧ ಕಾರ್ಯ ನಡೆಸಿದರು.
