ಹಾಸನ: ನಟ ಪುನೀತ್ ರಾಜ್ಕುಮಾರ್ ನಿಧನರಾಗಿ 11 ದಿನ ಆದರೂ ಅವರು ಇನ್ನಿಲ್ಲ ಎಂಬ ನೋವು ಮಾತ್ರ ಕೋಟ್ಯಂತರ ಅಭಿಮಾನಿಗಳ ಮನದಲ್ಲಿ ಕಿಂಚಿತ್ತೂ ಕಡಿಮೆ ಆಗಿಲ್ಲ. ಅಪ್ಪು ಅವರ ಸಮಾಧಿ ಬಳಿ ಪ್ರತಿನಿತ್ಯ ಅಸಂಖ್ಯಾತ ಜನರು ಬಂದು ನಮಿಸುತ್ತಾ ಕಂಬನಿ ಮಿಡಿಯುತ್ತಲೇ ಇದ್ದಾರೆ. ರಾಜ್ಯಾದ್ಯಂತ ಪ್ರತಿ ಊರು, ಏರಿಯಾದಲ್ಲೂ ಪುನೀತ್ ಭಾವಚಿತ್ರ ಇಟ್ಟು ಶ್ರದ್ಧಾಂಜಲಿ ಸಲ್ಲಿಸಲಾಗುತ್ತಿದೆ. ದೀಪ ಬೆಳಗಿ ಭಾವುಕರಾಗುತ್ತಿದ್ದಾರೆ. 'ಮತ್ತೆ ಹುಟ್ಟಿ ಬನ್ನಿ ಅಪ್ಪು', 'ಲವ್ ಯೂ ಅಪ್ಪು', 'ಮಿಸ್ ಯೂ ಅಪ್ಪು', 'ಪುನೀತ್ ಅಗಲಿಕೆ ನೋವು ಕಾಡುತ್ತಲೇ ಇದೆ', 'ದೇವರೇ, ನೀನೆಷ್ಟು ಕ್ರೂರಿ?'... ಎಂಬಿತ್ಯಾದಿ ಹೃದಯಸ್ಪರ್ಶಿ ಬರಹದೊಂದಿಗೆ ಪುನೀತ್ ಅಭಿಮಾನಿಗಳು ಸಾಮಾಜಿಕ ಜಾಲತಾಣದಲ್ಲಿ ಫೋಟೋಗಳನ್ನು ಶೇರ್ ಮಾಡಿಕೊಳ್ಳುತ್ತಲೇ ಇದ್ದಾರೆ. ಅಪ್ಪು ಅಭಿನಯದ ಸಿನಿಮಾದ ವಿಡಿಯೋ ತುಣುಕುಗಳನ್ನು ಅಪ್ಲೋಡ್ ಮಾಡಿಕೊಳ್ಳುತ್ತಾ ಭಾವುಕರಾಗುತ್ತಲೇ ಇದ್ದಾರೆ.
