ಈ ಮಾರ್ಗದಲ್ಲಿ ಹೆಚ್ಚಾಗಿ ಕೋತಿಗಳನ್ನು ಹೊರತುಪಡಿಸಿದರೆ ಪ್ರಾಣಿ, ಪಕ್ಷಿಗಳು ಕಾಣ ಸಿಗುವುದಿಲ್ಲ. ಆದರೆ ಬೆಳಗ್ಗೆ ನವಿಲೊಂದು ರಸ್ತೆಗೆ ಬಂದಿತ್ತು. ಈ ವೇಳೆ ವಾಹನವೊಂದು ಆಗಮಿಸಿದೊಡನೆ ತನ್ನ ಮೈಮಾಟದೊಂದಿಗೆ ಗರಿಗೆದರಿ ಲವಲವಿಕೆಯಿಂದ ಹೆಜ್ಜೆ ಹಾಕುತ್ತಾ ಕಾಡಿನತ್ತ ಓಟ ಕಿತ್ತಿದೆ. ಈ ದೃಶ್ಯ ತೆರಳುತ್ತಿದ್ದವರಿಗೆ ಮುದ ನೀಡಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಹಾಗೆಯೇ ಶ್ರೀ ಮಲೆಮಹದೇಶ್ವರಸ್ವಾಮಿ ದಕ್ಷಿಣ ದ್ವಾರ ಹನೂರು ಕ್ಷೇತ್ರ ಫೇಸ್ಬುಕ್ ಖಾತೆಯಲ್ಲಿ ಈ ದೃಶ್ಯವನ್ನು ಹಂಚಿಕೆ ಮಾಡಿರುವುದರ ಜತೆಗೆ ಕಾಡುಪ್ರಾಣಿಗಳು ನಾಡಿನತ್ತ ಮುಖ ಮಾಡುತ್ತಿರುವುದು ಹಾಗೂ ಅತಿಯಾದ ವಾಹನಗಳ ವೇಗದಿಂದ ಪ್ರಾಣಿಗಳು ಮೃತಪಡುತ್ತಿರುವುದರ ಸಂಬಂಧ ಅಗತ್ಯ ಸಲಹೆ, ಸೂಚನೆಯ ವಿವರಣೆಯನ್ನು ಹಂಚಿಕೆ ಮಾಡಲಾಗಿದೆ.
