ಪಾಲಕರು 2 ಡೋಸ್​ ಲಸಿಕೆ ಪಡೆದಿದ್ದರೆ ಮಾತ್ರ ಮಕ್ಕಳಿಗೆ ಶಾಲೆ ಪ್ರವೇಶ: ರಾಜ್ಯದಲ್ಲಿ ಟಫ್​ ರೂಲ್ಸ್​ ಜಾರಿ

ಬೆಂಗಳೂರು: ವಿಶ್ವವನ್ನೇ ತಲ್ಲಣಕ್ಕೆ ದೂಡಿರುವ ಕೋವಿಡ್​ ರೂಪಾಂತರಿ 'ಒಮಿಕ್ರಾನ್​' ಕರ್ನಾಟಕಕ್ಕೆ ಕಾಲಿಟ್ಟಿದ್ದು, ದೇಶದ ಜನರಲ್ಲಿ ಆತಂಕ ಮೂಡಿಸಿದೆ. ಸೋಂಕು ಹರಡುವಿಕೆ ತಡೆಯುವ ನಿಟ್ಟಿನಲ್ಲಿ ಇಂದು(ಶುಕ್ರವಾರ) ಸಿಎಂ ಬೊಮ್ಮಾಯಿ‌ ನೇತೃತ್ವದಲ್ಲಿ ಮಹತ್ವದ ಸಭೆ ನಡೆದಿದ್ದು, ಹಲವು ಕಟ್ಟುನಿಟ್ಟಿನ ನೂತನ ನಿಯಮಗಳನ್ನು ಜಾರಿ ಮಾಡಲಾಗಿದೆ. ಅದರಂತೆ ಪಾಲಕರು ಕರೊನಾ ವ್ಯಾಕ್ಸಿನ್​ನ 2 ಡೋಸ್​ ಅನ್ನೂ ಪಡೆದಿರಬೇಕು. ಇಲ್ಲವಾದರೆ ಅವರ ಮಕ್ಕಳು ಶಾಲೆಗಳಿಗೆ ಹೋಗುವಂತಿಲ್ಲ!

ಹೌದು, ಪೋಷಕರು 2 ಡೋಸ್​ ಲಸಿಕೆ ಪಡೆದಿದ್ದರೆ ಮಾತ್ರವೇ ಮಕ್ಕಳಿಗೆ ಶಾಲೆ-ಕಾಲೇಜುಗಳಿಗೆ ಪ್ರವೇಶ ನೀಡಲಾಗುತ್ತದೆ. ಶಾಲೆಗಳಲ್ಲಿ ಕೆಲಸ ಮಾಡುವವರೂ ಕಡ್ಡಾಯವಾಗಿ ವ್ಯಾಕ್ಸಿನ್​ ಪಡೆದಿರಬೇಕು. ಇನ್ನು ಶಾಲೆ- ಕಾಲೇಜುಗಳಲ್ಲಿ ತಾತ್ಕಾಲಿಕವಾಗಿ ಯಾವುದೇ ಸಮಾರಂಭ, ಸಾಂಸ್ಕೃತಿಕ ಕಾರ್ಯಕ್ರಮ ನಡೆಸುವಂತಿಲ್ಲ ಎಂದು ಸಭೆಯಲ್ಲಿ ನಿರ್ಣಯ ಕೈಗೊಳ್ಳಲಾಗಿದೆ. ಈ ಕುರಿತು ಸಭೆ ಬಳಿಕ ಆರ್​. ಅಶೋಕ್​ ಮಾಹಿತಿ ನೀಡಿದ್ದು, 18 ವರ್ಷದೊಳಗಿನ ಮಕ್ಕಳ ಎಲ್ಲ ಪಾಲಕರು ಕಡ್ಡಾಯವಾಗಿ ಲಸಿಕೆ ಪಡೆಯಬೇಕು ಎಂದರು. ಕ್ರಿಸ್​ಮಸ್, ಹೊಸ ವರ್ಷದ ಬಗ್ಗೆ ಮತ್ತೊಮ್ಮೆ ಸಭೆ ನಡೆಲಾಗುವುದು ಎಂದು ತಿಳಿಸಿದರು.

ರೂಲ್ಸ್​ ಫಾಲೋ ಮಾಡದಿದ್ರೆ ಬೀಳುತ್ತೆ ದಂಡ: ಮನೆಯಿಂದ ಹೊರಬರುವಾಗ ಮಾಸ್ಕ್​ ಹಾಕದಿದ್ದರೆ ಬೆಂಗಳೂರಲ್ಲಿ 250 ರೂಪಾಯಿ ದಂಡ, ಪಾಲಿಕೇತರ ಸ್ಥಳಗಳಲ್ಲಿ 100 ರೂ. ದಂಡ ವಿಧಿಸಲಾಗುತ್ತೆ. ಮದುವೆಗಳಲ್ಲಿ 500ಕ್ಕಿಂತ ಹೆಚ್ಚು ಮಂದಿ ಪಾಲ್ಗೊಳ್ಳುವಂತಿಲ್ಲ. ಮಾಲ್​, ಸಿನಿಮಾ ಸಿಬ್ಬಂದಿಗೂ ಎರಡು ಡೋಸ್​ ಕಡ್ಡಾಯ ಎಂದು ಹೊಸ ನಿಮಯದಲ್ಲಿ ಸೂಚಿಸಲಾಗಿದೆ. ಇತ್ತೀಚಿಗೆ ಕೆಲ ಶಾಲಾ-ಕಾಲೇಜುಗಳಲ್ಲಿ ಕರೊನಾ ಸ್ಫೋಟಗೊಂಡಿದ್ದು, ಸೋಂಕಿತ ಮಕ್ಕಳ ಸಂಖ್ಯೆ ಹೆಚ್ಚಾಗುತ್ತಿದೆ. ಪಾಲಕರು ಲಸಿಕೆ ಹಾಕಿಸಿಕೊಳ್ಳುವ ಜತೆಗೆ ಜಾಗ್ರತೆ ವಹಿಸಬೇಕು ಎಂದೂ ಸರ್ಕಾರ ಮನವಿ ಮಾಡಿದೆ.

https://www.vijayavani.net/a-silver-coine-for-voters-mysore-vidhana-parishat-election/

https://www.vijayavani.net/omicron-positive-case-in-karnataka-this-is-firs-case-in-india/