ಐಸಿಸ್​ ಉಗ್ರರ ನಂಟು: ದೇಶದ 6 ರಾಜ್ಯದಲ್ಲಿ 13 ಕಡೆ NIA ದಾಳಿ: ಕರ್ನಾಟಕದಲ್ಲಿ ಮೂವರ ವಶ

ಬೆಂಗಳೂರು: ಐಸಿಸ್ ಉಗ್ರ ಸಂಘಟನೆ ಜತೆ ನಂಟಿನ ಪ್ರಕರಣ ಸಂಬಂಧ ಕರ್ನಾಟಕ ಸೇರಿ ದೇಶದ 6 ರಾಜ್ಯಗಳಲ್ಲಿ ಎನ್​ಐಎ ಅಧಿಕಾರಿಗಳು ದಾಳಿ ನಡೆಸಿದ್ದು, ಹಲವರನ್ನ ವಶಕ್ಕೆ ಪಡೆದಿದ್ದಾರೆ. ತುಮಕೂರಲ್ಲಿ ಓರ್ವ ವಿದ್ಯಾರ್ಥಿ, ಭಟ್ಕಳದಲ್ಲಿ ಸೋಹೋದರರಿಬ್ಬರನ್ನ ವಶಕ್ಕೆ ಪಡೆದು ಕರೆದೊಯ್ದಿರುವ ಎನ್​ಐಎ ತಂಡ, ವಿಚಾರಣೆ ಮುಂದುವರಿಸಿದೆ.

6 ರಾಜ್ಯಗಳಲ್ಲಿ ಒಟ್ಟು 13 ಕಡೆ ದಾಳಿ ನಡೆಸಿ ಎನ್​ಐಎ ಶೋಧಕಾರ್ಯ ನಡೆಸಿದೆ. ಕರ್ನಾಟಕದ ತುಮಕೂರು ಮತ್ತು ಭಟ್ಕಳದಲ್ಲಿ, ಮಧ್ಯಪ್ರದೇಶದ ಭೂಪಾಲ್ ಮತ್ತು ರಾಯ್ ಸೇನ್​ನಲ್ಲಿ, ಗುಜರಾತ್​ನ ಬರೂಚ್, ಸೂರತ್, ನವಸಾರಿ, ಅಹ್ಮದಾಬಾದ್​ನಲ್ಲಿ, ಬಿಹಾರದ ಅರಾರಿಯದಲ್ಲಿ, ಮಹಾರಾಷ್ಟ್ರದ ಕೊಲ್ಲಾಪುರ ಮತ್ತು ನಾಂದೇಡ್​ನಲ್ಲಿ, ಉತ್ತರ ಪ್ರದೇಶದ ದಿಯೋಬಂಡ್​ನಲ್ಲಿ ದಾಳಿ ನಡೆಸಿದ್ದು, ಮಹತ್ವದ ದಾಖಲೆಗಳನ್ನು ಪತ್ತೆ ಹಚ್ಚಲಾಗಿದೆ. ಎನ್​ಐಎ ಅಧಿಕಾರಿಗಳು ತನಿಖೆ ಮುಂದುವರಿಸಿದ್ದಾರೆ.

ತುಮಕೂರಿನ ಎಚ್​ಎಂಎಸ್​ ಯುನಾನಿ ಕಾಲೇಜಿನಲ್ಲಿ ವಿದ್ಯಾಭ್ಯಾಸ ಮಾಡುತ್ತಿದ್ದ ಮಹಾರಾಷ್ಟ್ರ ಮೂಲದ ಮೆಡಿಕಲ್​ ವಿದ್ಯಾರ್ಥಿ ಸಾಜೀದ್​ ಎಂಬಾತನನ್ನು ಎನ್​ಐಎ ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ. ಈತ ತುಮಕೂರಿನ ಸದಾಶಿವನಗರದ 7ನೇ ಮುಖ್ಯರಸ್ತೆಯಲ್ಲಿ 8 ತಿಂಗಳ‌ ಹಿಂದಷ್ಟೇ ಮನೆ ಬಾಡಿಗೆ ಪಡೆದು ವಾಸವಿದ್ದ. ಉತ್ತರ ಕನ್ನಡ ಜಿಲ್ಲೆ ಭಟ್ಕಳದ ಮನೆಯೊಂದರ ಮೇಲೂ ದಾಳಿ ಮಾಡಿರುವ ಎನ್​ಐಎ ಅಧಿಕಾರಿಗಳು ಅಬ್ದುಲ್ ಮುಖ್ತದರ್(30) ಎಂಬಾತನ ವಶಕ್ಕೆ ಪಡೆದಿದ್ದಾರೆ. ಈತನ ಸಹೋದರನನ್ನೂ ವಿಚಾರಣೆಗೆ ಕರೆದೊಯ್ದಿದ್ದಾರೆ.

https://www.vijayavani.net/a-nia-conducts-searches-in-tumkur-and-bhatkala-activities-of-isis-module-case/

https://www.vijayavani.net/a-siddaramotsava-davanagere-story/

https://www.vijayavani.net/a-marriage-after-30-years-of-death-ghosts-marriage-dakshina-kannada/