ಅನಿವಾರ್ಯವಾಗಿ ಮತ್ತೆ ಕಾರವಾರಕ್ಕೆ ಮರಳುವ ಹೊತ್ತಿಗೆ ಚಂದ್ರಹಾಸ ಅಗೇರರ ಪ್ರಾಣಪಕ್ಷಿಯೇ ಹಾರಿಹೋಗಿದೆ. ಈ ಪೆಟ್ಟು ಸಾಲದೆಂಬಂತೆ ಆಂಬುಲೆನ್ಸ್ನವರು 6 ಸಾವಿರ ರೂ. ಡೀಸೆಲ್ ವೆಚ್ಚವನ್ನು ವಸೂಲಿ ಮಾಡಿದ್ದಾರೆ. ಅದನ್ನೂ ಆ ಕುಟುಂಬದವರು ದಾನಿಗಳ ನೆರವಿನಿಂದ ಪಾವತಿಸಿದ್ದಾರೆ. ಸುಮಾರು 12 ತಾಸುಗಳ ಕಾಲ ಜೀವ ಕೈಯಲ್ಲಿ ಹಿಡಿದುಕೊಂಡು ಐದು ಆಸ್ಪತ್ರೆಗಳ ಕದ ತಟ್ಟಿ, ಅತಿ ತುರ್ತು ಚಿಕಿತ್ಸೆ ಅಗತ್ಯವಿದ್ದಾಗಲೂ ಆಂಬುಲೆನ್ಸ್ನಲ್ಲಿ 600 ಕಿಮೀಗಳಷ್ಟು ದೂರ ಕ್ರಮಿಸಿಯೂ ಚಿಕಿತ್ಸೆ ಸಿಗದೇ ಇದ್ದುದು ಇಡೀ ವ್ಯವಸ್ಥೆಯ ಅಣಕ. ಆಸ್ಪತ್ರೆಗಳ ಸಿಬ್ಬಂದಿಯ ವರ್ತನೆಯಂತೂ ಅಮಾನವೀಯತೆಯ ಪರಾಕಾಷ್ಠೆ. ಈ ಪ್ರಕರಣವನ್ನು ರಾಜ್ಯ ಸರ್ಕಾರ ಗಂಭೀರವಾಗಿ ಪರಿಗಣಿಸಬೇಕು. ತುರ್ತು ಸಂದರ್ಭಗಳಲ್ಲಿ ಆಸ್ಪತ್ರೆಗಳು ತಕ್ಷಣ ರೋಗಿಯನ್ನು ದಾಖಲು ಮಾಡಿಕೊಂಡು ಚಿಕಿತ್ಸೆ ನೀಡುವಂತಹ ವ್ಯವಸ್ಥೆ ಜಾರಿಗೆ ಬರಬೇಕು.
