ಕಾಶ್ಮೀರ ಹಿಂಸೆಗೆ ಉಗ್ರರ ಟೂಲ್​ಕಿಟ್​!; ನಾಗರಿಕರ ಮೇಲೆ ದಾಳಿಗೆ ಐಎಸ್​ಐ ಯೋಜನೆ; ಭಯೋತ್ಪಾದಕರಿಗೆ 22 ಅಂಶಗಳ ಗುರಿ

ಶ್ರಿನಗರ: ಜಮ್ಮು-ಕಾಶ್ಮೀರದ ಆಯ್ದ ಅಲ್ಪಸಂಖ್ಯಾತರ ಮೇಲೆ ನಡೆಯುತ್ತಿರುವ ದಾಳಿ ಮತ್ತು ಹತ್ಯೆಯ ಹಿಂದೆ ಪಾಕಿಸ್ತಾನದ ಬೇಹುಗಾರಿಕಾ ಸಂಸ್ಥೆ ಐಎಸ್​ಐ ಇರುವುದು ಸ್ಪಷ್ಟವಾಗಿದೆ. ಎಲ್ಲೆಲ್ಲಿ ಮತ್ತು ಹೇಗೆ ದಾಳಿ ನಡೆಸಬೇಕು ಎಂದು ಐಎಸ್​ಐ ನೀಲಿನಕ್ಷೆ ಸಿದ್ಧಪಡಿಸಿದ್ದು, ಅದರ ಟೂಲ್ಕಿಟ್​ನಲ್ಲಿ 22 ಅಂಶಗಳ ಗುರಿಯನ್ನು ನೀಡಿರುವುದು ಬಯಲಾಗಿದೆ. ಟೂಲ್ಕಿಟ್​ನಲ್ಲಿ ಉಲ್ಲೇಖಿಸಿರುವ ಅಂಶಗಳು ಅಸ್ಪಷ್ಟ ಎನಿಸಬಹುದು. ಆದರೆ, ದೀರ್ಘಾವಧಿಯಲ್ಲಿ ಪರಿಣಾಮಕಾರಿ ಮತ್ತು ಪ್ರಯೋಜನಕಾರಿ ಆಗಲಿದೆ ಎಂದು ಐಎಸ್​ಐ ಅಡಿ ಟಿಪ್ಪಣಿಯಲ್ಲಿ ತಿಳಿಸಿದೆ.

ಮುಂಚೂಣಿ ನೆಲೆಗಳಿಗೆ ನರವಾಣೆ ಭೇಟಿ: ಜಮ್ಮು-ಕಾಶ್ಮೀರದ ಗಡಿ ನಿಯಂತ್ರಣ ರೇಖೆಯ (ಎಲ್​ಒಸಿ) ಹಲವು ಮುಂಚೂಣಿ ನೆಲೆಗಳಿಗೆ ಭೂಸೇನೆಯ ಮುಖ್ಯಸ್ಥ ಜನರಲ್ ಎಂ.ಎಂ. ನರವಾಣೆ ಮಂಗಳವಾರ ಭೇಟಿ ನೀಡಿದ್ದಾರೆ. ಸ್ಥಳೀಯ ಪರಿಸ್ಥಿತಿ, ಒಳನುಸುಳುವಿಕೆ ತಡೆಯಲು ಕೈಗೊಂಡಿರುವ ಕ್ರಮಗಳನ್ನು ಅವರು ಪರಿಶೀಲಿಸಿದ್ದಾರೆ. ವೈಟ್ ನೈಟ್ ಕೋರ್ ಪಹರೆ ಇರುವ ಪ್ರದೇಶಕ್ಕೂ ಅವರು ಭೇಟಿ ನೀಡಿದ್ದಾರೆ.

ಒಂಟಿ ತೋಳದ ದಾಳಿ: ನಾಗರಿಕರು ಮತ್ತು ವಲಸೆ ಕಾರ್ವಿುಕರ ಮೇಲೆ ನಡೆಯುತ್ತಿರುವ ದಾಳಿಯನ್ನು ಗಮನಿಸಿದರೆ ಇದು ‘ಒಂಟಿ ತೋಳ’ದ ದಾಳಿ ಎಂದು ರಾಷ್ಟ್ರೀಯ ತನಿಖಾ ಸಂಸ್ಥೆ (ಎನ್​ಐಎ) ಹೇಳಿದೆ. ಈ ದಾಳಿಕೋರರು ಒಂಟಿಯಾಗಿ ಬಂದು ತಮ್ಮ ನಾಯಕರ (ಹ್ಯಾಂಡಲರ್) ಆಣತಿಯಂತೆ ಗುರಿ ಸಾಧಿಸುತ್ತಿದ್ದಾರೆ ಎಂದು ಎನ್​ಐಎ ತಿಳಿಸಿದೆ. ತನಿಖೆ ವೇಳೆ ‘ಕಾಶ್ಮೀರಿ ಫೈಟ್’ ಎಂಬ ಬ್ಲಾಗ್ ಪತ್ತೆಯಾಗಿದೆ. ಇದರಲ್ಲಿ ಸ್ಥಳೀಯರಲ್ಲದವರಿಗೆ ಎಚ್ಚರಿಕೆ ನೀಡುವ ಬರಹ ಇದ್ದು, ಕೂಡಲೇ ಕಾಶ್ಮೀರ ಕಣಿವೆಯನ್ನು ತೊರೆಯುವಂತೆ ಸೂಚಿಸಲಾಗಿದೆ. ಇದು ಸೆಪ್ಟೆಂಬರ್​ನಲ್ಲಿ ಪ್ರಕಟವಾಗಿದೆ. ಜಮ್ಮು-ಕಾಶ್ಮೀರದ ಪೊಲೀಸರ ಮನವಿ ಮೇರೆಗೆ ಕೇಂದ್ರ ಸರ್ಕಾರ ಈ ಬ್ಲಾಗ್ ಬ್ಲಾಕ್ ಮಾಡಿದೆ.

ಹೊರಬರದಂತೆ ಸೂಚನೆ: ಜಮ್ಮು-ಕಾಶ್ಮೀರದ ಪೂಂಛ್ ಮತ್ತು ರಾಜೌರಿಗಳಲ್ಲಿ ನಡೆಯುತ್ತಿರುವ ಉಗ್ರರ ನಿಗ್ರಹ ಕಾರ್ಯಾಚರಣೆ ಮಂಗಳವಾರ 9ನೇ ದಿನಕ್ಕೆ ಕಾಲಿಟ್ಟಿದ್ದು, ಜನರು ಮನೆಯಿಂದ ಹೊರಗೆ ಬಾರದಂತೆ ಭದ್ರತಾಪಡೆಗಳು ಸೂಚಿಸಿವೆ.

ಅಸ್ಸಾಂನಲ್ಲಿ ದಾಳಿ ಸಾಧ್ಯತೆ: ಮುಸ್ಲಿಮರನ್ನು ವಿಚಾರಣೆಗೆ ಗುರಿಪಡಿಸಲಾಗುತ್ತಿದೆ ಎಂದು ಪಾಕ್​ನ ಐಎಸ್​ಐ ಮತ್ತು ಅಲ್​ಖೆೈದಾ ಸಂಘಟನೆ ಅಸ್ಸಾಂನಲ್ಲಿ ದಾಳಿ ನಡೆಸುವ ಸಾಧ್ಯತೆ ಇದೆ ಎಂದು ರಾಜ್ಯ ಪೊಲೀಸ್ ಗುಪ್ತಚರ ಇಲಾಖೆ ಎಚ್ಚರಿಕೆ ನೀಡಿದೆ. ವಿಧ್ವಂಸಕರು ಆರ್​ಎಸ್​ಎಸ್ ಮುಖಂಡರನ್ನು ಗುರಿಯಾಗಿಟ್ಟಿಕೊಂಡಿರುವ ಸಾಧ್ಯತೆ ಇದ್ದು, ರಾಜ್ಯದಲ್ಲಿರುವ ಭದ್ರತಾ ಪಡೆಗಳ ನೆಲೆಗಳ ಮೇಲೂ ಕಣ್ಣಿಟ್ಟಿವೆ ಎಂದು ಹೇಳಿದೆ. ಸಮೂಹ ಸಾರಿಗೆ, ಧಾರ್ವಿುಕ ಸ್ಥಳಗಳು, ಜನರು ಸೇರುವ ಪ್ರದೇಶಗಳಲ್ಲಿ ಸ್ಫೋಟ ನಡೆಸುವ ಸಂಚು ನಡೆಸಿವೆ ಎಂದು ತಿಳಿಸಿದೆ. ಅಸ್ಸಾಂ ಮತ್ತು ಕಾಶ್ಮೀರದಲ್ಲಿ ಜಿಹಾದ್ ಘೋಷಿಸಿ ಎಂದು ಅಲ್​ಖೆೈದಾ ಸೂಚನೆ ನೀಡಿದೆ ಎಂದು ಅಸ್ಸಾಂನ ಸಹಾಯಕ ಪೊಲೀಸ್ ಮಹಾನಿರೀಕ್ಷರು ಹೊರಡಿಸಿರುವ ಕಟ್ಟೆಚ್ಚರದ ಸುತ್ತೋಲೆ ತಿಳಿಸಿದೆ.

23ಕ್ಕೆ ಅಮಿತ್ ಷಾ ಭೇಟಿ: ಕೇಂದ್ರ ಗೃಹ ಸಚಿವ ಅಮಿತ್ ಷಾ 23 ಮತ್ತು 24ರಂದು ಜಮ್ಮು-ಕಾಶ್ಮೀರಕ್ಕೆ ಭೇಟಿ ನೀಡಲಿದ್ದಾರೆ. ಕೇಂದ್ರಾಡಳಿತ ಪ್ರದೇಶದ ಭದ್ರತಾ ಪರಿಸ್ಥಿತಿಯನ್ನು ಅವಲೋಕಿಸುವ ಅವರು, ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಮತ್ತು ಕೇಂದ್ರೀಯ ಭದ್ರತಾ ಪಡೆಗಳ ಉನ್ನತ ಅಧಿಕಾರಿಗಳ ಜತೆ ಸಭೆ ನಡೆಸಲಿದ್ದಾರೆ. ಈ ಮಧ್ಯೆ, ಕಾಶ್ಮೀರದಲ್ಲಿ ನಾಗರಿಕರ ಮೇಲೆ ನಡೆಯುತ್ತಿರುವ ದಾಳಿ ವಿಷಯವಾಗಿ ಅಮಿತ್ ಷಾ - ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ಮಂಗಳವಾರ ಚರ್ಚೆ ನಡೆಸಿದ್ದಾರೆ.

ಟೂಲ್ಕಿಟ್​ನಲ್ಲಿರುವ ಅಂಶಗಳೇನು?

1. ಸ್ಥಳೀಯರಲ್ಲದ ಅಧಿಕಾರಿಗಳನ್ನು ಗುರಿಯಾಗಿಟ್ಟುಕೊಳ್ಳಿ.
2. ವಲಸೆ ಬಂದವರು, ದೀರ್ಘ ಕಾಲದಿಂದ ಕಾಶ್ಮೀರದಲ್ಲಿ ಇರುವವರು ಟಾರ್ಗೆಟ್
3. 1990ರ ದಶಕದಲ್ಲಿ ಕಾಶ್ಮೀರವನ್ನು ತೊರೆದ ಕಾಶ್ಮೀರಿ ಪಂಡಿತರು ಈಗ ವಾಪಸು ಬರಲು ಮುಂದಾಗುತ್ತಿದ್ದಾರೆ. ಅವರನ್ನು ಸ್ವಾಗತಿಸಬೇಡಿ, ಅವರೇ ಗುರಿ ಎಂಬುದನ್ನು ಮರೆಯಬೇಡಿ.
4. ಸ್ಥಳೀಯರಲ್ಲದ ಉದ್ಯೋಗಿಗಳು ಯಾವುದೇ ಸಂಸ್ಥೆ, ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದರೂ, ಯಾವುದೇ ಬಗೆಯ ವೃತ್ತಿಯಲ್ಲಿದ್ದರೂ ಅವರು ನಿಮ್ಮ ಟಾರ್ಗೆಟ್ ಆಗಿರಲಿ.
5. ಕಾಶ್ಮೀರದ ವಿರೋಧಿಗಳಾಗಿರುವ ಪ್ರತಿಯೊಬ್ಬ ಪೊಲೀಸ್ ಸಿಬ್ಬಂದಿಯ ಮನೆ ಮೇಲೆ ದಾಳಿ ನಡೆಸಿ.
6. ಪೊಲೀಸರಿಗೆ, ಭದ್ರತಾ ಪಡೆಗಳಿಗೆ ಮಾಹಿತಿ ನೀಡುವವರ ಮೇಲೆ ಪೆಟ್ರೋಲ್ ಬಾಂಬ್ ಹಾಕಿ.
7. ಸರ್ಕಾರಿ ಆಸ್ತಿ, ಅಭಿವೃದ್ಧಿ ಯೋಜನೆಗಳು, ಸೇತುವೆ, ಶಾಲಾ-ಕಾಲೇಜು, ಕ್ರೀಡಾ ಮೂಲ ಸೌಕರ್ಯಗಳನ್ನು ಟಾರ್ಗೆಟ್ ಮಾಡಿ.
8. ಹೊರಗಿನವರು ಎದುರಾದರೆ ಅವರಿಗೆ ಕಣಿವೆಯನ್ನು ಶೀಘ್ರ ಬಿಟ್ಟುಹೋಗುವಂತೆ ಎಚ್ಚರಿಕೆ ನೀಡಿ. ಅವರ ಮೇಲಾಗುವ ಪರಿಣಾಮಗಳನ್ನು ವಿವರಿಸಿ.
9. ಕಾಶ್ಮೀರಿಗಳ ಸ್ವಾತಂತ್ರ್ಯಕ್ಕೆ ಮತ್ತು ಅವರ ಕೆಲಸ-ಕಾರ್ಯಕ್ಕೆ ತಡೆಯೊಡ್ಡುವ ಆದೇಶ, ಸುತ್ತೋಲೆಗಳ ವಿರುದ್ಧ ಸರ್ಕಾರಿ ನೌಕರರು ಪ್ರತಿಭಟನೆ ನಡೆಸಬೇಕು.
10. ಕಾಶ್ಮೀರವನ್ನು ಅತಿಕ್ರಮಿಸಿರುವವರು ಅಥವಾ ಅವರ ಆಣತಿಯಂತೆ ಕೆಲಸ ಮಾಡುವವರು ಆಯೋಜಿಸುವ ಕ್ರೀಡಾಕೂಟ ಬಹಿಷ್ಕರಿಸಿ.
11. ಸರ್ಕಾರಿ ಅಥವಾ ಭದ್ರತಾಪಡೆಗಳ ಕಾರ್ಯಕ್ರಮದಲ್ಲಿ ಭಾಗಿಯಾಗುವವರ ಬಗ್ಗೆ ಕಠಿಣವಾಗಿ ನಡೆದುಕೊಳ್ಳಿ.
12. ಕಾಶ್ಮೀರವನ್ನು ಅತಿಕ್ರಮಿಸಿರುವವರ ಕೈಗೊಂಬೆಗಳಾಗಿರುವ ಶಿಕ್ಷಣ ಸಂಸ್ಥೆಗಳ ಮುಖ್ಯಸ್ಥರ ಮೇಳೆ ದಾಳಿ ಮಾಡಿ.
13. ಸರ್ಕಾರದ ಜತೆ ಸಹಯೋಗ ಹೊಂದಿರುವ ಮಾಧ್ಯಮಗಳನ್ನು ಬಹಿಷ್ಕರಿಸಿ.
14. ಕಾಶ್ಮೀರವನ್ನು ವಶದಲ್ಲಿ ಇರಿಸಿಕೊಂಡಿರುವ ಶಕ್ತಿಗಳಿಂದ ಅಂತರ ಕಾಯ್ದುಕೊಳ್ಳಿ. ಕಾಶ್ಮೀರಿ ವಿರೋಧಿ ಶಕ್ತಿಗಳನ್ನು ದೂರವಿಡಿ.(ವಿಶೇಷವಾಗಿ ಪೊಲೀಸರು) ಆಡಳಿತಗಾರರ ಜತೆ ಶಾಮೀಲಾಗಿರುವ ಪ್ರತಿಯೊಬ್ಬರನ್ನು ಮತ್ತು ಕಾಶ್ಮೀರದ ವಿರುದ್ಧ ಇರುವವರನ್ನು ಗುರುತಿಸಿ.
15. ಕಾಶ್ಮೀರದ ಮುಕ್ತಿಗಾಗಿ ಹೋರಾಟ ಮಾಡುತ್ತಿರುವವರು ತಮ್ಮ ಗುರಿಗಳನ್ನು ಆದ್ಯತೆಗೆ ಅನುಗುಣವಾಗಿ ಪರಿಗಣಿಸಬೇಕು.
16. ಸ್ಥಳೀಯರಲ್ಲದವರ ಮೇಲಿನ ಅವಲಂಬನೆಯಿಂದ ಸ್ಥಳೀಯರನ್ನು ದೂರ ಮಾಡಬೇಕು.
17. ಸ್ಥಳೀಯರಲ್ಲದವರು ಇಲ್ಲಿಗೆ ಬಂದು ಕಿರುಕುಳ, ದೌರ್ಜನ್ಯ ನಡೆಸುತ್ತಿದ್ದಾರೆ. ಸ್ಥಳೀಯರ ಮೇಲೆ ನಿಯಂತ್ರಣ ಸಾಧಿಸಲು ಪ್ರಯತ್ನಿಸುತ್ತಿದ್ದಾರೆ. ಹೀಗಾಗಿ ಜಮ್ಮು-ಕಾಶ್ಮೀರದಾಚೆಗೂ ನಮ್ಮ ಕಾರ್ಯಾಚರಣೆಯನ್ನು ವಿಸ್ತರಿಸಿ ಚುರುಕುಗೊಳಿಸಬೇಕಿದೆ.