ಮಹಮ್ಮದ್ ರಫೀ ಪಾಶ ಅವರು ಕಳೆದ 15 ವರ್ಷಗಳಿಂದ ಐಎಎಸ್, ಕೆಎಎಸ್ ಅಭ್ಯರ್ಥಿಗಳಿಗೆ ಮಾರ್ಗದರ್ಶನ ಮಾಡುತ್ತಿದ್ದಾರೆ. ಅದರಲ್ಲೂ, ಕನ್ನಡ ಮಾಧ್ಯಮದ ಪರೀಕ್ಷಾರ್ಥಿಗಳಿಗೆ ಮಹಮ್ಮದ್ ರಫೀ ಪಾಶಾ ಅವರು ಸಿದ್ಧಪಡಿಸಿರುವ ಪುಸ್ತಕಗಳು ತುಂಬ ಉಪಯುಕ್ತವಾಗಿವೆ. ಇವರ ಯಶೋಮಾರ್ಗ-ಐ.ಎ.ಎಸ್/ಕೆ.ಎ.ಎಸ್ ಮುಖ್ಯ ಪರೀಕ್ಷೆಯ ಕೈಪಿಡಿ’ ಎಂಬ ಸಂಪುಟವನ್ನೂ ಸಪ್ನಾ ಬುಕ್ ಹೌಸ್ ಪ್ರಕಟಿಸಿದೆ. ‘ಇಂದಿನ ಕರ್ನಾಟಕ’ ಕೃತಿಯು ಒಟ್ಟು 15 ಅಧ್ಯಾಯಗಳನ್ನು ಒಳಗೊಂಡಿದೆ. ‘ಉದಯವಾಗಲಿ ನಮ್ಮ ಚೆಲುವ ಕನ್ನಡನಾಡು’, ‘ಕರ್ನಾಟಕ ವಿಧಾನಸಭೆಯ ಭವ್ಯ ಇತಿಹಾಸ’, ‘ಮೇಲ್ಮನೆ ಎಂಬ ಅನುಭವ ಮಂಟಪ- ವಿಧಾನ ಪರಿಷತ್ತು’, ‘ಮಹಿಳಾ ಮೀಸಲಾತಿ ಮತ್ತು ಸಾಮಾಜಿಕ ನ್ಯಾಯ’, ‘ಚುನಾವಣೆ ಸುಧಾರಣೆಗಳು’, ‘ಒಂದು ರಾಜ್ಯ ಹಲವು ಜಗತ್ತು (ಪ್ರವಾಸೋದ್ಯಮ)’ ಅಧ್ಯಾಯಗಳಂತೂ ಅಭ್ಯರ್ಥಿಗಳಿಗೆ ಇತಿಹಾಸ ಮತ್ತು ವರ್ತಮಾನವನ್ನು ಪರಿಣಾಮಕಾರಿಯಾಗಿ ಕಟ್ಟಿಕೊಡುತ್ತವೆ. ಶಾಸಕಾಂಗ ವ್ಯವಸ್ಥೆಯ ಕಾರ್ಯಾಚರಣೆ ಹಾಗೂ ಅದರ ವೈಶಿಷ್ಟ್ಯದ ಹಲವು ಆಯಾಮಗಳ ಬಗ್ಗೆ ಬೆಳಕು ಚೆಲ್ಲುತ್ತದೆ.
