ತಾಲೂಕಿನ ಕತ್ತರಿಘಟ್ಟದಲ್ಲಿ ಹಾಡಹಗಲೇ ನಡೆದಿರುವ ಘಟನೆ ತಾಲೂಕಿನಲ್ಲಿರುವ ತೋಟದ ಮನೆಗಳ ನಿವಾಸಿಗಳಲ್ಲಿ ಆತಂಕ ಮೂಡಿಸಿದೆ.
ಜುಲೈ 8ರಂದು ಕತ್ತರಿಘಟ್ಟ ಗ್ರಾಮದ ಹೊರಭಾಗದಲ್ಲಿ ತೋಟದಲ್ಲಿ ವಾಸವಿದ್ದ ಸುಶೀಲಮ್ಮ ಅವರು ಬೆಳಗ್ಗೆ 10 ಗಂಟೆಯಲ್ಲಿ ಮನೆಯಲ್ಲಿದ್ದರು. ಈ ವೇಳೆ 25 ರಿಂದ 30 ವರ್ಷದ ಅಪರಿಚಿತ ವ್ಯಕ್ತಿ ಮನೆಯ ಬಾಗಿಲು ಬಡಿದಿದ್ದಾನೆ, ಬಾಗಿಲು ತೆರೆದ ಸುಶೀಲಮ್ಮರನ್ನು ಊಪಿನಹಳ್ಳಿ ರಾಜಣ್ಣ ಅವರ ಮನೆ ಎಲ್ಲಿ ಎಂದು ಕೇಳಿದ್ದಾನೆ. ನನಗೆ ಗೊತ್ತಿಲ್ಲ, ನಮ್ಮ ಮನೆಯ ಹಿಂಭಾಗದಲ್ಲಿರುವ ಮನೆಯವರನ್ನು ಕೇಳಿ ಎಂದಿದ್ದಾರೆ. ತಕ್ಷಣವೇ ಮನೆಯಾಚೆ ನಿಂತಿದ್ದ ನಾಲ್ವರು ಮನೆಯೊಳಗೆ ಓಡಿಬಂದು ಸುಶೀಲಮ್ಮರನ್ನು ಹಿಡಿದುಕೊಂಡಿದ್ದಾರೆ. ಇದರಿಂದ ಗಾಬರಿಗೊಂಡ ಆಕೆ ಜೋರಾಗಿ ಕಿರುಚಿದ್ದಾರೆ. ಇದರಿಂದ ತಾವು ಸಿಕ್ಕಿಬೀಳಲಿದ್ದೇವೆ ಎಂದುಕೊಂಡ ಕಳ್ಳರು ಆಕೆಯ ಕುತ್ತಿಗೆ ಹಿಸುಕಿ, ಪಂಚೆಯಿಂದ ಕುತ್ತಿಗೆ ಸುತ್ತಿ ಉಸಿರುಗಟ್ಟಿಸಿ ಸಾಯಿಸಲು ಮುಂದಾಗಿದ್ದಾರೆ.
