ಪುಣೆಯಲ್ಲಿ ಮಾರ್ಚ್ 26ರಂದು ನಡೆದ ಬೆಂಕಿ ಅವಘಡ ಪ್ರಕರಣದ ತನಿಖೆ ನಡೆಯುತ್ತಿದ್ದು ಇದೊಂದು ಪ್ರತ್ಯೇಕಿತ ಘಟನೆ ಎಂಬುದು ಪ್ರಾಥಮಿಕ ಅಂದಾಜಿನಿಂದ ಗೊತ್ತಾಗಿದೆ ಎಂದು ಕಂಪನಿ ತಿಳಿಸಿದೆ. ಆದರೂ ಮುಂಜಾಗ್ರತಾ ಕ್ರಮವಾಗಿ ಆ ನಿರ್ದಿಷ್ಟ ಬ್ಯಾಚ್ನ ಎಲ್ಲ ಸ್ಕೂಟರ್ಗಳನ್ನು ಪರಿಶೀಲಿಸಲಾಗುತ್ತದೆ. ಹಾಗಾಗಿ 1,441 ವಾಹನಗಳನ್ನು ಸ್ವಯಂಪ್ರೇರಿತವಾಗಿ ವಾಪಸ್ ಪಡೆಯಲು ಕ್ರಮಕೈಗೊಳ್ಳಲಾಗಿದೆ ಎಂದು ಹೇಳಿಕೆಯೊಂದರಲ್ಲಿ ಓಲಾ ವಿವರಿಸಿದೆ. ಸರ್ವಿಸ್ ಎಂಜಿನಿಯರ್ಗಳು ಸ್ಕೂಟರ್ಗಳನ್ನು ಪರಿಶೀಲಿಸಲಿದ್ದಾರೆ. ಬ್ಯಾಟರಿ ವ್ಯವಸ್ಥೆ, ಥರ್ಮಲ್ ವ್ಯವಸ್ಥೆ ಹಾಗೂ ಸುರಕ್ಷತಾ ವ್ಯವಸ್ಥೆಗಳ ಸಮಗ್ರ ಪರೀಕ್ಷೆ ನಡೆಸಲಾಗುವುದು ಎಂದು ಕಂಪನಿ ವಿವರಿಸಿದೆ. ತನ್ನ ಬ್ಯಾಟರಿ ವ್ಯವಸ್ಥೆಯು ಭಾರತದ ಇತ್ತೀಚಿನ ಮಾನದಂಡವಾದ ಎಐಎಸ್ 156ಕ್ಕೆ ಅನುಗುಣವಾಗಿ ಇದೆ. ಅದು ಐರೋಪ್ಯ ಸ್ಟಾಂಡರ್ಡ್ ಇಸಿಇ 136ಕ್ಕೂ ಅನುಗುಣವಾಗಿದೆ ಎಂದು ಓಲಾ ಹೇಳಿದೆ.
