ಅಮೆರಿಕ ಪಟ್ಟಣವೊಂದರ ಮೇಯರ್​ ಸ್ಥಾನಕ್ಕಾಗಿ ಚುನಾವಣಾ ಕಣಕ್ಕಿಳಿದ ಮೇಕೆ-ಶ್ವಾನ!

ವಾಷಿಂಗ್ಟನ್​: ಕಳೆದ ಡಿಸೆಂಬರ್​ನಲ್ಲಿ ಏಳು ವರ್ಷದ ಮಗುವೊಂದು ಟೆಕ್ಸಾಸ್​ ಪಟ್ಟಣವೊಂದರ ಮೇಯರ್​ ಗೌರವ ಪಡೆದುಕೊಂಡು ಎಲ್ಲರ ಹುಬ್ಬೇರಿಸಿತ್ತು.

ಮಗು ವಿಲಿಯಂ ಚಾರ್ಲ್ಸ್​ ಅಲಿಯಾಸ್​ ಚಾರ್ಲಿ ಮ್ಯಾಕ್​ಮಿಲನ್​ ವೈಟ್​ಹಾಲ್​ನ ಮೇಯರ್​ ಆಗಿ ಆಯ್ಕೆಯಾಗುವ ಮೂಲಕ ಅಮೆರಿಕದ ಮೇಯರ್​ ಇತಿಹಾಸದಲ್ಲಿ ಅತ್ಯಂತ ಕಿರಿಯ ಮೇಯರ್​ ಎಂಬ ಇತಿಹಾಸ ಬರೆದಿತ್ತು.

ಇದಾದ ಒಂದೇ ತಿಂಗಳಲ್ಲಿ ಅಮೆರಿಕದ ವರ್ಮಂಟ್​ ರಾಜ್ಯವು ಮೇಯರ್​ ಆಯ್ಕೆಯಲ್ಲಿ ವಿಚಿತ್ರ ಕ್ಷಣವೊಂದಕ್ಕೆ ಸಾಕ್ಷಿಯಾಗುತ್ತಿದೆ. ಲಿಂಕನ್​ ಹೆಸರಿನ ಮೇಕೆ ಮತ್ತು ಸ್ಯಾಮಿ ಹೆಸರಿನ ನಾಯಿಯು ವರ್ಮಂಟ್​ ರಾಜ್ಯದ ಪಟ್ಟಣವೊಂದರ ಮೇಯರ್​ ಚುನಾವಣೆಗೆ ಸ್ಪರ್ಧೆಗೆ ಇಳಿದಿವೆ.

ಸಮುದಾಯದ ಆಟದ ಮೈದಾನ ನಿರ್ಮಿಸಲು ನಿಧಿ ಸಂಗ್ರಹಕ್ಕಾಗಿ ಸಾಕು ಪ್ರಾಣಿ ಮೇಯರ್​ ಚುನಾವಣೆ ಕಲ್ಪನೆಯನ್ನು ಕಳೆದ ವರ್ಷ ಜಾರಿಗೆ ತರಲಾಯಿತು. ಕೆಳದ ವರ್ಷ ಸ್ಪರ್ಧಿಸಿದ್ದ ಲಿಂಕನ್​ ಮೇಕೆ ಮೇಯರ್​ ಗೌರವಕ್ಕೆ ಪಾತ್ರವಾಗಿತ್ತು. ಈ ವರ್ಷವು ತನ್ನ ಸ್ಥಾನವನ್ನು ಉಳಿಸಿಕೊಳ್ಳಲು ಸ್ಪರ್ಧಿಸಿದ್ದು, ಪ್ರತಿಸ್ಪರ್ಧಿಯಾಗಿ ಶ್ವಾನ ಸವಾಲೊಡ್ಡಿದೆ.

ಮೇಯರ್​ ಚುನಾವಣೆ ಮಾರ್ಚ್​ 3ರಂದು ನಡೆಯಲಿದೆ. ಅಲ್ಲದೆ, ಸಮುದಾಯ ಕ್ರೀಡಾ ಮೈದಾನಕ್ಕಾಗಿ ಗೋ ಫಂಡ್​ ಮಿ (GoFundMe) ಪೇಜ್​ ಅನ್ನು ಸಾಮಾಜಿಕ ಜಾಲತಾಣದಲ್ಲಿ ತೆರೆಯಲಾಗಿದೆ. ಮತದಾನ ಮಾಡುವ ಮುಂಚೆ ಪ್ರತಿಯೊಬ್ಬ ಸದಸ್ಯನು ಒಂದು ಡಾಲರ್​ ಕಾಣಿಕೆ ನೀಡಿ ಮತದಾನ ಮಾಡಬೇಕಾಗಿದೆ.

ಕ್ರೀಡಾ ಮೈದಾನ ನಿರ್ಮಿಸಲು 80 ಸಾವಿರ ಡಾಲರ್​ ಬೇಕಾಗಿದ್ದು, ಈವರೆಗೂ 10 ಸಾವಿರ ಡಾಲರ್​ ಸಂಗ್ರಹವಾಗಿದೆ. (ಏಜೆನ್ಸೀಸ್​)