ಕೋವಿಡ್ ಲಾಕ್ಡೌನ್ ಮತ್ತು ಆನಂತರ ಜನರಿಗೆ ಎದುರಾದ ಆರ್ಥಿಕ ಸಂಕಷ್ಟವನ್ನೇ ಲಾಭ ಮಾಡಿಕೊಂಡು ಕೆಲವೇ ಕ್ಷಣದಲ್ಲಿ ಸಾಲ ಕೊಡುವ ಲೋನ್ ಆಪ್ಗಳನ್ನು ಕೆಲವರು ಪರಿಚಯಿಸಿದ್ದರು. ಮೊಬೈಲ್ನಲ್ಲಿ ಆಪ್ ಡೌನ್ಲೋಡ್ ಮಾಡಿಕೊಂಡು ಬರೀ ಆಧಾರ್ ಕಾರ್ಡ್ ಹಾಗೂ ಪಾನ್ ಕಾರ್ಡ್ ವಿವರ ನಮೂದಿಸಿದರೆ ಸಾಕು, 10 ಸಾವಿರದಿಂದ -ಠಿ;1 ಲಕ್ಷವರೆಗೂ ಸಾಲ ಕೊಡುತ್ತಾರೆ. ಸಾಲ ತೀರಿಸಿದರೂ ಮೊಬೈಲ್ನಲ್ಲಿರುವ ಗ್ರಾಹಕರ ವೈಯಕ್ತಿಕ ಮಾಹಿತಿ ಕದ್ದು, ದುಬಾರಿ ಬಡ್ಡಿ ಸುಲಿಗೆ ಮಾಡುತ್ತಾರೆ. ಹಣ ಕೊಡದಿದ್ದರೆ ವೈಯಕ್ತಿಕ ಫೋಟೋಗಳನ್ನು ಅಶ್ಲೀಲವಾಗಿ ಎಡಿಟ್ ಮಾಡಿದ ಸ್ನೇಹಿತರು, ಪರಿಚಯಸ್ಥರು, ಸಂಬಂಧಿಕರ ಮೊಬೈಲ್ಗೆ ಕಳುಹಿಸಿ ಮಾನ ತೆಗೆಯುತ್ತಾರೆ. ಲೋನ್ ಆಪ್ಗಳ ಕಿರುಕುಳಕ್ಕೆ ಒಳಗಾದ ಅದೆಷ್ಟೋ ಮಂದಿ ಆತ್ಮಹತ್ಯೆ ಮಾಡಿಕೊಂಡಿದ್ದೂ ಉಂಟು. ಸರ್ಕಾರ, ಪೊಲಿಸ್ ಇಲಾಖೆ, ಆರ್ಬಿಐ, ಇತರ ಬ್ಯಾಂಕ್ಗಳು ಹಲವು ಸುರಕ್ಷತಾ ಕ್ರಮಗಳನ್ನು ಕೈಗೊಂಡರೂ ಈ ವಂಚನೆ ನಿಲ್ಲದಿರುವುದು ದುರದೃಷ್ಟಕರ.
