ಪಂಜಾಬ್ನಲ್ಲಿ ಮೊದಲ ಕರೊನಾ ಕೇಸು ಬೆಳಕಿಗೆ ಬಂದಿದ್ದು ಮಾರ್ಚ್ 9ರಂದು. ಇಟಲಿಯಿಂದ ರಾಜ್ಯಕ್ಕೆ ವಾಪಸಾದ ವ್ಯಕ್ತಿಯೊಬ್ಬರಿಗೆ ತಗುಲಿದ ಸೋಂಕು ಬೇರೆಯವರಿಗೂ ಹಬ್ಬಿತ್ತು. ಸದ್ಯ 256 ಸೋಂಕಿತರು ರಾಜ್ಯದಲ್ಲಿದ್ದು, 49 ಮಂದಿ ಗುಣಮುಖರಾಗಿದ್ದಾರೆ. 16 ಮಂದಿ ಮೃತಪಟ್ಟಿದ್ದಾರೆ. ಏತನ್ಮಧ್ಯೆ, ಪಂಜಾಬಿನ 98 ವರ್ಷದ ವೃದ್ಧೆ ಮಾಸ್ಕ್ ತಯಾರಿಕೆಯಲ್ಲಿ ತೊಡಗಿಕೊಂಡಿರುವುದು ರಾಜ್ಯವ್ಯಾಪಿ ಮೆಚ್ಚುಗೆಗೆ ಪಾತ್ರವಾಗಿದೆ. ಮೊಂಗಾ ಎಂಬ ಪ್ರದೇಶದ ವೃದ್ಧೆ ಗುರುದೇವ್ ಕೌರ್ ತನ್ನ ಕುಟುಂಬದೊಂದಿಗೆ ಸೇರಿ ಮಾಸ್ಕ್ ತಯಾರಿಸಿ ಜನರಿಗೆ ಉಚಿತವಾಗಿ ನೀಡುತ್ತಿದ್ದಾರೆ. ಪ್ರಾರ್ಥನೆ ಯೊಂದಿಗೆ ತನ್ನ ದಿನ ಆರಂಭಿಸುವ ಗುರುದೇವ್ ಕೌರ್, ನಂತರ 4 ಗಂಟೆಗಳ ಕಾಲ ಮಾಸ್ಕ್ ತಯಾರಿಕೆಯಲ್ಲಿ ತೊಡಗುತ್ತಾರೆ. ಈ ಬಗ್ಗೆ ಖುದ್ದು ಸಿಎಂ ಅಮರಿಂದರ್ ಸಿಂಗ್ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ. ಪಂಜಾಬ್ ಜನರು ಎಷ್ಟು ಪ್ರಬಲರು ಎಂಬುದಕ್ಕೆ ಇವರೇ ಉದಾಹರಣೆ ಮತ್ತು ಕರೊನಾ ಸವಾಲನ್ನು ಮೀರಿ ನಾವು ಮುನ್ನಡೆಯಲಿದ್ದೇವೆ ಎಂದು ಸಿಎಂ ಭರವಸೆ ವ್ಯಕ್ತಪಡಿಸಿದ್ದಾರೆ. ‘ನಾವಿರುವ ಪ್ರದೇಶದಲ್ಲಿ ತರಕಾರಿ ಮಾರುವವರು ಮಾಸ್ಕ್ ಧರಿಸುತ್ತಿರಲಿಲ್ಲ. ನೂರಿನ್ನೂರು ರೂಪಾಯಿ ಕೊಟ್ಟು ಮಾಸ್ಕ್ ಧರಿಸಬೇಕೇ ಎಂಬುದು ಅವರ ಪ್ರಶ್ನೆಯಾಗಿತ್ತು. ದಿನದಲ್ಲಿ ಸಿಕ್ಕ ಹಣವನ್ನು ಮಾಸ್ಕ್ಗೆ ಹೇಗೆ ಕೊಡಲಿ ಎನ್ನುತ್ತಿದ್ದರು. ಹೀಗಾಗಿ ಬಡವರಿಗೆ ಮಾಸ್ಕ್ ತಯಾರಿಸಿಕೊಡಲು ನಿರ್ಧರಿಸಿದೆವು’ ಎಂದು ಗುರುದೇವ್ ಕೌರ್ ಅವರ ಪುತ್ರಿ ಹೇಳುತ್ತಾರೆ. ಅನೇಕ ಮಂದಿ ಗುರುದೇವ್ ಕೌರ್ ಅವರ ಸೇವೆಗೆ ಸಾಥ್ ನೀಡಲು ಮುಂದಾಗಿದ್ದು, ಹಣಕಾಸಿನ ನೆರವನ್ನೂ ಒದಗಿಸುತ್ತಿದ್ದಾರೆ.
