ಮುಂಬೈ: ಎರಡು ಸಾವಿರ ಮುಖಬೆಲೆಯ ನೋಟುಗಳ ಚಲಾವಣೆಯನ್ನು ಹಿಂಪಡೆದು ಎರಡು ವರ್ಷಗಳಾಗುತ್ತ ಬಂದಿದ್ದು, ಈವರೆಗೆ 98.24ರಷ್ಟು ನೋಟುಗಳು ವಾಪಸ್ ಬಂದಿವೆ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಶುಕ್ರವಾರ ಹೇಳಿದೆ. 2 ಸಾವಿರ ಮುಖಬೆಲೆಯ ನೋಟುಗಳನ್ನು ಚಲಾವಣೆಯಿಂದ ಹಿಂಪಡೆಯುವುದಾಗಿ ಆರ್ಬಿಐ 2023ರ ಮೇ 19ರಂದು ಪ್ರಕಟಿಸಿತ್ತು. ಆದಾಗ್ಯೂ, ಇನ್ನೂ ಕೆಲ ನೋಟುಗಳು ಚಲಾವಣೆಯಲ್ಲಿವೆ. 2023ರ ಮೇ 19ರಂದು ಚಲಾವಣೆ ರದ್ದುಪಡಿಸಿದಾಗ ಚಾಲ್ತಿಯಲ್ಲಿದ್ದ 2 ಸಾವಿರ ಮುಖಬೆಲೆಯ ನೋಟುಗಳ ಮೊತ್ತ 3.56 ಲಕ್ಷ ಕೋಟಿ ರೂ.ಗಳಷ್ಟಿತ್ತು. 2025ರ ಏಪ್ರಿಲ್ 30ರ ವೇಳೆಗೆ 6,266 ಕೋಟಿ ರೂ. ಗೆ ಇಳಿದಿದೆ. 2 ಸಾವಿರ ಮುಖಬೆಲೆಯ ನೋಟುಗಳ ಪೈಕಿ ಈವರೆಗೆ ಶೇಕಡ 98.24ರಷ್ಟು ನೋಟುಗಳು ವಾಪಸ್ ಬಂದಿವೆ ಎಂದೂ ಆರ್ಬಿಐ ಹೇಳಿದೆ.
