ತಬ್ಲಿಘಿ ಜಮಾತ್​ ಧಾರ್ಮಿಕ ಸಭೆಯಲ್ಲಿ ಪಾಲ್ಗೊಂಡಿದ್ದವನ 9 ತಿಂಗಳ ಮಗುವಿಗೆ ಕರೊನಾ ಸೋಂಕು

ಡೆಹ್ರಾಡೂನ್​: ಮಹಾಮಾರಿ ಕರೊನಾ ವೈರಸ್​ ಪುಟ್ಟ ಮಕ್ಕಳನ್ನು, ನವಜಾತ ಶಿಶುಗಳನ್ನೂ ಬಿಡದ ಹಾಗೆ ಕಾಡುತ್ತಿದೆ. ಸದ್ಯ ಉತ್ತರಾಖಂಡದಲ್ಲಿ 9 ತಿಂಗಳ ಮಗುವಿನಲ್ಲಿ ಕರೊನಾ ಕಾಣಿಸಿಕೊಂಡಿದ್ದು, ಅದು ರಾಜ್ಯದಲ್ಲೇ ಅತ್ಯಂತ ಕಿರಿಯ ಕರೊನಾ ರೋಗಿ ಎನ್ನಲಾಗಿದೆ.

ಈ ಮಗುವಿಗೆ ಕರೊನಾ ವೈರಸ್​ ತಗುಲಿದ್ದು ಅದರ ತಂದೆಯಿಂದ. ಆತ ತಬ್ಲಿಘಿ ಜಮಾತ್​ ಸಮಾವೇಶದಲ್ಲಿ ಪಾಲ್ಗೊಂಡಿದ್ದರು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆದರೆ ಆ ಸಮಾವೇಶ ಎಲ್ಲಿ ನಡೆದಿತ್ತು ಎಂಬುದನ್ನು ಬಹಿರಂಗಪಡಿಸಿಲ್ಲ. ತಬ್ಲಿಘಿ ಜಮಾತ್ ಧಾರ್ಮಿಕ ಸಭೆಯಲ್ಲಿ ಪಾಲ್ಗೊಂಡು ವಾಪಸ್​ ಆಗಿದ್ದ ವ್ಯಕ್ತಿಯಲ್ಲಿ ಕರೊನಾ ಸೋಂಕು ದೃಢಪಟ್ಟಿತ್ತು. ಅದೀಗ ಮಗುವಿಗೂ ತಗುಲಿದೆ.

ಮಗುವಿನ ತಾಯಿಗೆ ಕೊವಿಡ್​ ಸೋಂಕು ತಗುಲಿಲ್ಲ. ಅವರನ್ನು ತಪಾಸಣೆಗೆ ಒಳಪಡಿಸಲಾಗಿತ್ತು. ಆದರೆ ನೆಗೆಟಿವ್​ ಎಂದು ವರದಿ ಬಂದಿದ್ದಾಗಿ ಆರೋಗ್ಯ ಇಲಾಖೆ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಇಂದು ಉತ್ತರಾಖಂಡದಲ್ಲಿ ಒಟ್ಟು ಮೂರು ಹೊಸ ಕರೊನಾ ಪ್ರಕರಣಗಳು ಪತ್ತೆಯಾಗಿವೆ. (ಏಜೆನ್ಸೀಸ್​)