ವಿಶ್ವದ ಅತ್ಯಂತ ಹಳೆಯ ಆಲದ ಮರ ಪತ್ತೆ; 700 ವರ್ಷ ಹಳೆಯ ಮರ ಎಲ್ಲಿದೆ ಗೊತ್ತಾ?..Munger Banyan Tree

ಈ ಹಿಂದೆ ಆಚಾರ್ಯ ಜಗದೀಶ್‌ ಚಂದ್ರ ಬೋಸ್‌ ಇಂಡಿಯನ್‌ ಬೊಟಾನಿಕಲ್​ ಗಾರ್ಡನ್​ನಲ್ಲಿರುವ ಆಲದ ಮರವು ಹಳೆಯದು ಎಂದು ಪರಿಗಣಿಸಲಾಗಿತ್ತು. ಇದು 350 ವರ್ಷಗಳಷ್ಟು ಪುರಾತನ ಕಾಲದ್ದು ಎಂದು ಅಂದಾಜಿಸಲಾಗಿತ್ತು. ಆದರೆ ಈಗ ಬಿಹಾರದ ಮುಂಗೇರ್ ಜಿಲ್ಲೆಯಲ್ಲಿರುವ ಐತಿಹಾಸಿಕ ಆಲದ ಮರ ಜಗತ್ತಿನಲ್ಲೇ ಅತ್ಯಂತ ಹಳೆಯ ಆಲದ ಮರ ಎನ್ನಲಾಗಿದೆ. ಈ ಮರದ ವಯಸ್ಸನ್ನು ನಿಖರವಾಗಿ ಪತ್ತೆ ಹಚ್ಚಲಾಗಿದೆ. ವೈಜ್ಞಾನಿಕ ಸಂಶೋಧನೆಯ ಪ್ರಕಾರ ಈ ಮರಕ್ಕೆ ಬರೋಬ್ಬರಿ 700 ವರ್ಷ ವಯಸ್ಸಾಗಿದೆ ಎಂದು ಅಂದಾಜಿಸಲಾಗಿದೆ.

ವಿಜ್ಞಾನ ಮತ್ತು ತಂತ್ರಜ್ಞಾನ ಸಚಿವಾಲಯದ ಅಧಿಸೂಚನೆಯ ಪ್ರಕಾರ, ಮುಂಗೇರ್ ಆಲದ ಮರದ ವಯಸ್ಸನ್ನು ಕೇವಲ ಐತಿಹಾಸಿಕ ದಾಖಲೆಗಳು, ಜಾನಪದ ಕಥೆಗಳು ಅಥವಾ ಸ್ಥಳೀಯ ಸಂಪ್ರದಾಯಗಳ ಆಧಾರದ ಮೇಲೆ ನಿರ್ಧರಿಸಲಾಗಿಲ್ಲ. ಬದಲಾಗಿ, ಅತ್ಯಾಧುನಿಕ ಹಾಗೂ ಹೈ-ಪ್ರೆಸಿಶನ್ ರೇಡಿಯೋಕಾರ್ಬನ್ ಡೇಟಿಂಗ್ ತಂತ್ರಜ್ಞಾನದ ಮೂಲಕ ಇದನ್ನು ಸಾಬೀತುಪಡಿಸಲಾಗಿದೆ.

ಕೇಂದ್ರ ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆಯ ಅಡಿಯಲ್ಲಿ ಬರುವ ಸ್ವಾಯತ್ತ ಸಂಸ್ಥೆಯಾದ ಲಕ್ನೋದ 'ಬೀರ್ಬಲ್ ಸಾಹ್ನಿ ಇನ್‌ಸ್ಟಿಟ್ಯೂಟ್ ಆಫ್ ಪ್ಯಾಲಿಯೋಸೈನ್ಸಸ್'ನ ಡಾ. ತ್ರಿನಾ ಬೋಸ್ ನೇತೃತ್ವದಲ್ಲಿ ಈ ಸಂಶೋಧನೆ ನಡೆದಿದೆ. ಇವರೊಂದಿಗೆ ಸಂಶೋಧಕರಾದ ಡಾ. ಮಯಾಂಕ್ ಶೇಖರ್ ಮತ್ತು ಡಾ. ಅಖಿಲೇಶ್ ಕೆ. ಯಾದವ್ ಅವರು ಕೈಜೋಡಿಸಿದ್ದು, ಉಷ್ಣವಲಯದ ಅಗಲ ಎಲೆಯುಳ್ಳಮರಗಳ ವಯಸ್ಸನ್ನು ನಿಖರವಾಗಿ ಪತ್ತೆಹಚ್ಚಲು ಹೊಸ ವೈಜ್ಞಾನಿಕ ವಿಧಾನವನ್ನು ಅಭಿವೃದ್ಧಿಪಡಿಸಿದ್ದಾರೆ.

ಸಾಮಾನ್ಯವಾಗಿ ಮರದ ವಯಸ್ಸನ್ನು ಅದರ ಕಾಂಡವನ್ನು ಕಡಿದಾಗ ಕಾಣುವ ರಿಂಗ್​ಗಳನ್ನು ಎಣಿಸಿ ಪತ್ತೆ ಹಚ್ಚಲಾಗುತ್ತದೆ. ಆದರೆ ಉಷ್ಣವಲಯದ ಮರಗಳಲ್ಲಿ ಇಂತಹ ಸ್ಪಷ್ಟ ವಾರ್ಷಿಕ ಬೆಳವಣಿಗೆಯ ವರ್ತುಲಗಳು ಮೂಡುವುದಿಲ್ಲವಾದ್ದರಿಂದ ಈ ಸಾಂಪ್ರದಾಯಿಕ ವಿಧಾನ ವಿಫಲವಾಗಿತ್ತು. ಹೀಗಾಗಿ ವಿಜ್ಞಾನಿಗಳ ತಂಡ, ಮುಂಗೇರ್ ಆಲದ ಮರದ ದ್ವಿತೀಯಕ ಕಾಂಡ ಹಾಗೂ ಪ್ರಾಚೀನ ಮುಖ್ಯ ಕೊಂಬೆಯ ತಿರುಳಿನ ಭಾಗದಿಂದ ಮರದ ಮಾದರಿಗಳನ್ನು ಸಂಗ್ರಹಿಸಿತು. ಮರದ ಜೀವಕೋಶದ ಗೋಡೆಗಳಲ್ಲಿ ಅತ್ಯಂತ ಸ್ಥಿರವಾಗಿರುವ 'ಆಲ್ಫಾ-ಸೆಲ್ಯುಲೋಸ್' ಅನ್ನು ಬೇರ್ಪಡಿಸಿ, 'ಆಕ್ಸಿಲರೇಟರ್ ಮಾಸ್ ಸ್ಪೆಕ್ಟ್ರೋಮೆಟ್ರಿ' ರೇಡಿಯೋ ಕಾರ್ಬನ್​ ಡೇಟಿಂಗ್​ ಮೂಲಕ ವಿಶ್ಲೇಷಣೆ ನಡೆಸಿದೆ.

ಈ ಫಲಿತಾಂಶಗಳನ್ನು ಇತ್ತೀಚಿನ 'IntCal20' ಮಾಪನಾಂಕ ರೇಖೆ ಮತ್ತು 'OxCal' ಸಾಫ್ಟ್‌ವೇರ್ ಬಳಸಿ ಪರಿಶೀಲಿಸಿದಾಗ ಮರಕ್ಕೆ 700 ವರ್ಷ ವಯಸ್ಸಾಗಿರುವುದು ದೃಢಪಟ್ಟಿದೆ. ಈ ಆಲದ ಮರವನ್ನು ಸುಮಾರು 300 ರಿಂದ 350 ವರ್ಷಗಳ ಹಿಂದೆ ಅಲ್ಲಿನ ಐತಿಹಾಸಿಕ 'ಬುರ್ರಾ ಬಂಗ್ಲೋ' ಬಳಿ ನೆಡಲಾಗಿತ್ತು ಎಂಬ ನಂಬಿಕೆ ಇದುವರೆಗೆ ಇತ್ತು. ಆದರೆ ಈ ಹೊಸ ಸಂಶೋಧನೆಯು ಆ ನಂಬಿಕೆಯನ್ನು ಸುಳ್ಳಾಗಿಸಿದೆ. ಈ ಮರವು ಬುರ್ರಾ ಬಂಗ್ಲೋ ಕಟ್ಟಡ ನಿರ್ಮಾಣಕ್ಕಿಂತಲೂ ಮುಂಚಿನದ್ದಾಗಿದ್ದು, ಒಂದೊಮ್ಮೆ ಈ ಪ್ರದೇಶವನ್ನು ಆವರಿಸಿದ್ದ ನೈಸರ್ಗಿಕ ಕಾಡಿನ ಉಳಿದುಕೊಂಡಿರುವ ಏಕೈಕ ಪಳೆಯುಳಿಕೆ ಇದಾಗಿದೆ ಎಂದು ಅಧ್ಯಯನವು ಸೂಚಿಸಿದೆ,(ಏಜೆನ್ಸೀಸ್).