ಮಹಿಳಾ ಜನ್​ಧನ್​ ಖಾತೆಗೆ ಮಾಸಿಕ ತಲಾ 500 ರೂ. ಪಾವತಿಸುವ ಪ್ರಕ್ರಿಯೆ ನಾಳೆಯಿಂದ ಆರಂಭ

ನವದೆಹಲಿ: ಪ್ರಧಾನ ಮಂತ್ರಿ ಜನ್​ಧನ್​ ಯೋಜನೆಯಡಿಯಲ್ಲಿ ಮಹಿಳೆಯರು ತೆರೆದಿರುವ ಜನ್​ಧನ್​ ಖಾತೆಗಳಿಗೆ ತಲಾ 500 ರೂ.ಗಳನ್ನು ಪಾವತಿ ಪ್ರಕ್ರಿಯೆ ಆರಂಭಿಸುವಂತೆ ಎಲ್ಲ ಬ್ಯಾಂಕ್​ಗಳಿಗೆ ಇಂಡಿಯನ್​ ಬ್ಯಾಂಕ್ಸ್​ ಅಸೋಸಿಯೇಷನ್​ ಸೂಚಿಸಿದೆ.

ಪ್ರಧಾನಮಂತ್ರಿ ಗರೀಬ್​ ಕಲ್ಯಾಣ ಯೋಜನೆಯಡಿಯಲ್ಲಿ ಘೋಷಿಸಲಾಗಿರುವಂತೆ ಜನಧನ್​ ಖಾತೆಗಳಿಗೆ ಮಾಸಿಕ 500 ರೂ.ಗಳನ್ನು ಪಾವತಿಸುವ ಪ್ರಕ್ರಿಯೆ ಏಪ್ರಿಲ್​ 3ರಿಂದ 9ರವರೆಗೆ ನಡೆಯಲಿದೆ ಎಂದು ಐಬಿಎ ತಿಳಿಸಿದೆ. ಜನ್​​ಧನ್​ ಖಾತೆಗಳಿಗೆ ಮುಂದಿನ ಮೂರು ತಿಂಗಳ ಅವಧಿಗೆ ಅಂದರೆ ಏಪ್ರಿಲ್​, ಮೇ, ಜೂನ್​ವರೆಗೆ ನಗದು ವರ್ಗಾವಣೆ ಮಾಡಲಾಗುತ್ತದೆ.

ದೇಶಾದ್ಯಂತ ಲಾಕ್​ಡೌನ್​ ಹಿನ್ನೆಲೆಯಲ್ಲಿ ಸಂಕಷ್ಟ ಅನುಭವಿಸುತ್ತಿರುವ ಬಡಜನರಿಗೆ ನೆರವಾಗಲು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್​ ಈ ಘೋಷಣೆ ಪ್ರಕಟಿಸಿದ್ದರು.

ಮಹಿಳೆಯರ ಖಾತೆಗಳ ಕೊನೆಯ ಅಂಕಿ ಸಮ- ಬೆಸ ಸಂಖ್ಯೆಗಳ ಆಧಾರದಲ್ಲಿ ಹಣ ವರ್ಗಾವಣೆ ಮಾಡಲಾಗುತ್ತದೆ. ಏಪ್ರಿಲ್​ 3ರಿಂದಲೇ ಖಾತೆಯಲ್ಲಿರುವ ಹಣ ಪಡೆಯಬಹುದು.

ಖಾತೆಯ ಕೊನೆಯ ಸಂಖ್ಯೆ 0-1 ಆಗಿದ್ದರೆ ಏಪ್ರಿಲ್​ 3ರಂದು ಹಣ ಪಡೆಯಬಹುದು. ಖಾತೆಯ ಕೊನೆಯ ಸಂಖ್ಯೆ 2-3 ಆಗಿದ್ದರೆ ಏಪ್ರಿಲ್​ 4, 4-5 ಆಗಿದ್ದರೆ ಏಪ್ರಿಲ್​ ಏಪ್ರಿಲ್​ 7ರಂದು ಹಾಗೂ ಖಾತೆಯ ಕೊನೆಯ ಸಂಖ್ಯೆ 6-7 ಆಗಿದ್ದರೆ ಏಪ್ರಿಲ್​ 8 ಮತ್ತು ಖಾತೆಯ ಕೊನೆಯ ಸಂಖ್ಯೆ 8-9 ಆಗಿದ್ದರೆ ಏಪ್ರಿಲ್​ 9ರಂದು ಹಣ ಪಡೆದುಕೊಳ್ಳಬಹುದು. ಏಪ್ರಿಲ್​ 9ರ ನಂತರ ಅವರಿಗೆ ಅನುಕೂಲವಾದ ದಿನದಿಂದ ಹಣ ಪಡೆಯಬಹುದು. ಸಾಮಾಜಿಕ ಅಂತರವನ್ನು ಕಾಯ್ದುವ ಹಿನ್ನೆಲೆಯಲ್ಲಿ ಈ ವ್ಯವಸ್ಥೆ ಮಾಡಲಾಗಿದೆ ಎಂದು ಎಬಿಎ ತಿಳಿಸಿದೆ.

https://www.vijayavani.net/will-share-a-video-message-at-9-am-tomorrow/