ದೇವಾಲಯದ ಸಂಕೀರ್ಣದ ಮೊದಲ ಮಹಡಿಯಲ್ಲಿ ರಾಮ ದರ್ಬಾರ್ ಪ್ರತಿಷ್ಠಾಪನೆ ಬಳಿಕ ಮಾತನಾಡಿದ ನೃಪೇಂದ್ರ ಮಿಶ್ರಾ, ತೆರಿಗೆಗಳನ್ನು ಹೊರತುಪಡಿಸಿ ದೇವಾಲಯದಲ್ಲಿ ಬಳಸಲಾಗಿರುವ ಚಿನ್ನದ ಅಂದಾಜು ಮೌಲ್ಯ ಸುಮಾರು 50 ಕೋಟಿ ರೂ. ಎಂದು ಹೇಳಿದ್ದಾರೆ. ದೇವಾಲಯದ ನೆಲಮಹಡಿಯಲ್ಲಿ ಮತ್ತು ಭಗವಾನ್ ರಾಮ ಸಿಂಹಾಸನದ ಬಾಗಿಲುಗಳಲ್ಲಿ ಚಿನ್ನವನ್ನು ವ್ಯಾಪಕವಾಗಿ ಬಳಸಲಾಗಿದೆ. ಶೇಷಾವತಾರ ದೇವಾಲಯದಲ್ಲಿ ಚಿನ್ನದ ಕೆಲಸ ಇನ್ನೂ ನಡೆಯುತ್ತಿದ್ದು, ರಾಮ ಮಂದಿರದ ಮುಖ್ಯ ರಚನೆ ಪೂರ್ಣಗೊಂಡಿದ್ದರೂ ಸಹ ವಸ್ತು ಸಂಗ್ರಹಾಲಯ, ಸಭಾಂಗಣ ಮತ್ತು ಅತಿಥಿ ಗೃಹ ಸೇರಿದಂತೆ ದೇವಾಲಯದ ಸಂಕೀರ್ಣದ ಇತರ ಭಾಗಗಳ ಕೆಲ ಕಾರ್ಯಗಳು ನಿರ್ಮಾಣ ಹಂತದಲ್ಲಿವೆ. ಡಿಸೆಂಬರ್ 2025 ರೊಳಗೆ ಈ ಎಲ್ಲಾ ಕಾರ್ಯಗಳು ಪೂರ್ಣಗೊಳ್ಳುವ ನಿರೀಕ್ಷೆಯಿದೆ ಎಂದಿದ್ದಾರೆ.
