ಬೆಂಗ್ಳೂರಲ್ಲೇ 40 ಯಾರ್ಡ್, ನೂರಾರು ಬಸ್

| ಕೀರ್ತಿನಾರಾಯಣ ಸಿ. ಬೆಂಗಳೂರು

ಬೆಂಗಳೂರಿನ ಕುಂಬಳಗೋಡು ಸಮೀಪದ ಗೋಣಿಪುರ ಹಾಗೂ ತಾವರೆಕೆರೆ ಬಳಿಯ 2 ಯಾರ್ಡ್​ಗಳಲ್ಲೇ 20 ಬಸ್ ಪತ್ತೆಯಾಗಿದ್ದು, 1.70 ಕೋಟಿ ರೂ. ತೆರಿಗೆ ಬಾಕಿ ಇದೆ. ಇದೇ ರೀತಿ ಕೆಲ ಬ್ಯಾಂಕ್​ಗಳು ಹಾಗೂ ಫೈನಾನ್ಸ್ ಸಂಸ್ಥೆಗಳು ಜಪ್ತಿ ಮಾಡಿರುವ ಬಸ್ ನಿಲ್ಲಿಸುವುದಕ್ಕಾಗಿಯೇ ರಾಜಧಾನಿಯಲ್ಲಿ 40 ಯಾರ್ಡ್​ಗಳಿರುವ ವಿಚಾರ ಆರ್​ಟಿಒ ಅಧಿಕಾರಿಗಳ ಪರಿಶೀಲನೆಯಲ್ಲಿ ಗೊತ್ತಾಗಿದೆ. ಇದೇ ರೀತಿ ರಾಜ್ಯಾದ್ಯಂತ ಸಾವಿರಾರು ಬಸ್​ಗಳಿದ್ದು, ಅವುಗಳಿಂದ ಕೋಟ್ಯಂತರ ರೂ. ತೆರಿಗೆ ಪಾವತಿ ಆಗಬೇಕಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ಬಸ್​ಗಳ ಪತ್ತೆಗೆ ವಿಶೇಷ ಕಾರ್ಯಾಚರಣೆ ಕೈಗೊಳ್ಳಲು ನಿರ್ಧರಿಸಿ, ರೂಪುರೇಷೆ ಸಿದ್ಧಪಡಿಸಲು ಸಾರಿಗೆ ಇಲಾಖೆ ಮುಂದಾಗಿದೆ. ಈ ಸಂಬಂಧ ಹೆಚ್ಚುವರಿ ಆಯುಕ್ತ ಜ್ಞಾನೇಂದ್ರಕುಮಾರ್ ಮಂಗಳವಾರ ಆರ್​ಟಿಒ ಅಧಿಕಾರಿಗಳ ಸಭೆ ಕರೆದಿದ್ದಾರೆ.‘

ಇದನ್ನೂ ಓದಿ: ‘ಕರೊನಾ ಮತ್ ರೋನಾ’ ಹಾಡು ಬಿಡುಗಡೆ ಮಾಡಿದ ಭಾಸ್ಕರ್​ರಾವ್

ಫೈನಾನ್ಸ್ ಸಂಸ್ಥೆಗಳು ಕಾರ್ಯಾಚರಣೆಗೆ ಅಡ್ಡಿಪಡಿಸುವ ಸಾಧ್ಯತೆ ಇರುವ ಹಿನ್ನೆಲೆಯಲ್ಲಿ ಸಿಸಿಬಿ ಅಧಿಕಾರಿಗಳ ನೆರವು ಪಡೆಯಲು ತೀರ್ವನಿಸಲಾಗಿದೆ.

ಅಧಿಕಾರಿಗಳಿಗೆ ಹಲ್ಲೆ ಭಯ: ಆರ್​ಟಿಒ ಅಧಿಕಾರಿಗಳಿಗೆ ಕೇಸ್ ದಾಖಲಿಸುವ ಅಥವಾ ತಪ್ಪಿತಸ್ಥರ ವಿಚಾರಣೆ ನಡೆಸುವ ಅಧಿಕಾರವಿಲ್ಲ. ಫೈನಾನ್ಸ್ ಸಂಸ್ಥೆಗಳು ಬಸ್​ಗಳ ಜಪ್ತಿ ಜವಾಬ್ದಾರಿಯನ್ನು ಏಜೆನ್ಸಿಗಳಿಗೆ

ಕೊಟ್ಟಿರುತ್ತವೆ. ಈ ಏಜೆನ್ಸಿಗಳು ಸ್ಥಳೀಯ ಯುವಕರನ್ನು ನೇಮಿಸಿಕೊಂಡು ಜಪ್ತಿ ಕಾರ್ಯಾಚರಣೆ ನಡೆಸುವುದರಿಂದ ಪರಿಶೀಲನೆಗೆ ಹೋಗುವ ಅಧಿಕಾರಿಗಳಿಗೆ ಹಲ್ಲೆಗೊಳಗಾಗುವ ಭೀತಿ ಕಾಡಿದೆ. ಹೀಗಾಗಿ ಸಿಸಿಬಿ ಅಧಿಕಾರಿಗಳ ನೆರವು ಪಡೆದು ಕಾರ್ಯಾಚರಣೆ ನಡೆಸುವುದು ಸೂಕ್ತ ಎಂದು ಹಿರಿಯ ಅಧಿಕಾರಿಗಳು ನಿರ್ಧರಿಸಿದ್ದಾರೆ.

ಐಪಿಎಸ್ ಅಧಿಕಾರಿ ಸಾರಿಗೆ ಇಲಾಖೆ ಕಮಿಷನರ್: ಸಾರಿಗೆ ಇಲಾಖೆ ಕಮಿಷನರ್ ಶಿವಕುಮಾರ್ ಐಪಿಎಸ್ ಅಧಿಕಾರಿಯೂ ಆಗಿರುವುದರಿಂದ ಆರ್​ಟಿಒ ಅಧಿಕಾರಿಗಳ ಕಾರ್ಯಾಚರಣೆ ವೇಳೆ ಎದುರಾಗಬಹುದಾದ ಸವಾಲು, ಅಪಾಯದ ಬಗ್ಗೆ ಮಾಹಿತಿ ಇದೆ. ನಗರ ಪೊಲೀಸ್ ಆಯುಕ್ತರ ಮುಖೇನ ಪೊಲೀಸ್ ಭದ್ರತೆಯಲ್ಲಿ ಕಾರ್ಯಾಚರಣೆ ನಡೆಸಬೇಕು. ತಪ್ಪಿತಸ್ಥ ಸಂಸ್ಥೆಗಳ ವಿರುದ್ಧ ಕ್ರಿಮಿನಲ್ ಕೇಸ್ ದಾಖಲಿಸಿ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಅಧಿಕಾರಿಗಳು ಮನವಿ ಮಾಡಿದ್ದಾರೆ.

ಪ್ರತಿ ಬಸ್​ನಿಂದ 4-8 ಲಕ್ಷ ರೂ. ಬಾಕಿ

ಸಾಲ ಕಟ್ಟದೆ ಸೀಜ್ ಮಾಡಿರುವ ಪ್ರತಿ ಬಸ್​ನಿಂದ ಸರಾಸರಿ 4 ರಿಂದ 8 ಲಕ್ಷ ರೂ. ತೆರಿಗೆ ಬಾಕಿ ಇದೆ. ವಾಹನ ಜಪ್ತಿ ಮಾಡಿದ ಬಳಿಕ ಆರ್​ಟಿಒ ಗಮನಕ್ಕೆ ತಾರದೆ ಫೈನಾನ್ಸ್ ಸಂಸ್ಥೆಗಳು ಮಧ್ಯವರ್ತಿಗಳ ಮುಖಾಂತರ ಕಳ್ಳದಾರಿಯಲ್ಲಿ ಬಸ್​ಗಳ ಮಾರಾಟ ಮಾಡುತ್ತಿರುವ ವಿಚಾರ ಈಗಾಗಲೇ ದೃಢಪಟ್ಟಿದೆ. ಈ ಬೆಳವಣಿಗೆ ತೆರಿಗೆ ನಷ್ಟ ತರುವ ಜತೆಗೆ ಜನರ ಜೀವಕ್ಕೂ ಅಪಾಯವಾಗುತ್ತಿರುವ ಹಿನ್ನೆಲೆಯಲ್ಲಿ ಸರ್ಕಾರ ಈ ವಿಚಾರವನ್ನು ಗಂಭೀರವಾಗಿ ತೆಗೆದುಕೊಂಡಿದೆ.