ಲುಧಿಯಾನಾದ ಹಣಕಾಸು ಸಂಸ್ಥೆಯಲ್ಲಿ ಸಿನಿಮೀಯ ಶೈಲಿಯಲ್ಲಿ ದರೋಡೆ; ಬರೋಬ್ಬರಿ 30 ಕೆಜಿ ಚಿನ್ನಾಭರಣ ಕದ್ದೊಯ್ದ ದರೋಡೆಕೋರರು

ಲುಧಿಯಾನಾ: ಇಲ್ಲಿನ ಹಣಕಾಸು ಸಂಸ್ಥೆಯೊಂದಕ್ಕೆ ನುಗ್ಗಿದ ಐವರು ಸಶಸ್ತ್ರ ಸಹಿತ ದರೋಡೆಕೋರರು ಸುಮಾರು 12 ಕೋಟಿ ರೂ.ಮೌಲ್ಯದ 30 ಕೆಜಿ ಚಿನ್ನಾಭರಣಗಳು ಮತ್ತು 3 ಲಕ್ಷ ರೂಪಾಯಿ ನಗದನ್ನು ಲೂಟಿ ಮಾಡಿದ್ದಾರೆ.

ಪಂಜಾಬ್​ನ ಲುಧಿಯಾನಾದ ಗಿಲ್​ ರಸ್ತೆಯಲ್ಲಿರುವ ಇಂಡಿಯಾ ಇನ್​ಫೊಲಿನ್​ ಫೈನಾನ್ಸ್​ ಲಿಮಿಟೆಡ್​(IIFL)ನಲ್ಲಿ ಸೋಮವಾರ ಬೆಳಗ್ಗೆ ದೊಡ್ಡ ಮಟ್ಟದ ದರೋಡೆ ನಡೆದಿದ್ದು, ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.

ಸಿಸಿಟಿವಿಯಲ್ಲಿ ಕಂಡ ದೃಶ್ಯದ ಪ್ರಕಾರ, ಸಂಸ್ಥೆಗೆ ನುಗ್ಗಿದ ಐವರಲ್ಲಿ ಇಬ್ಬರು ಮುಸುಕು ಹಾಕಿಕೊಂಡಿದ್ದರು. ನಾಲ್ವರು ಮಾತ್ರ ಒಳಗೆ ಹೋಗಿ ಅಲ್ಲಿನ ಉದ್ಯೋಗಿಗಳಿಗೆ ಗನ್​ ತೋರಿಸಿ ಬೆದರಿಸಿ ಲೂಟಿ ಮಾಡಿದ್ದಾರೆ. ಹೊರಗಡೆ ಒಬ್ಬ ಮಾರುತಿ ಸುಜುಕಿ ಕಾರನ್ನು ಸಿದ್ಧ ಮಾಡಿಟ್ಟುಕೊಂಡಿದ್ದ. ಹಣ, ಒಡವೆ ದೋಚಿಕೊಂಡು ಆ ವಾಹನದಲ್ಲಿ ಮರ್ಲೆಕೋಟ್ಲಾ ರಸ್ತೆ ಮೂಲಕ ಪರಾರಿಯಾಗಿದ್ದಾರೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಈ ದರೋಡೆ ಕೋರರು ಡಿಜಿಟಲ್​ ವಿಡಿಯೋ ರೆಕಾರ್ಡರ್​ (ಡಿವಿಆರ್​)ನ್ನು ಕೂಡ ತೆಗೆದುಕೊಂಡು ಹೋಗಿದ್ದಾರೆ. ಕಂಪನಿಯಲ್ಲಿ ಕೆಲಸ ಮಾಡುವವರದ್ದೇ ಕೈವಾಡ ಇರುವ ಬಗ್ಗೆ ಸಂಶಯ ಉಂಟಾಗಿದೆ ಎಂದು ಹೇಳಿದ್ದಾರೆ.

ಪಂಜಾಬ್​ ಪೊಲೀಸ್​ ಅಪರಾಧ ಮತ್ತು ತನಿಖಾ ದಳದ ಕಚೇರಿಯ ಎದುರು ಸ್ವಲ್ಪೇ ದೂರದಲ್ಲಿ ಈ ಘಟನೆ ನಡೆದಿದೆ. ದರೋಡೆಕೋರರು ಸೋಮವಾರ ಬೆಳಗ್ಗೆ 9.45ರ ಸುಮಾರಿಗೆ ಈ ಹಣಕಾಸು ಸಂಸ್ಥೆಯನ್ನು ಹೊಕ್ಕಿದ್ದಾರೆ. ಆಗ ಅಲ್ಲಿದ್ದ ಐವರು ಉದ್ಯೋಗಿಗಳಿಗೂ ಗನ್​ ತೋರಿಸಿ ಬೆದರಿಸಿದ್ದಾರೆ. ಆ ಸಮಯದಲ್ಲಿ ಯಾರೂ ಗ್ರಾಹಕರು ಇರಲಿಲ್ಲ. ಹಾಗೇ ಸೆಕ್ಯೂರಿಟಿ ಗಾರ್ಡ್​ಗಳೂ ಇರಲಿಲ್ಲ ಎನ್ನಲಾಗಿದೆ.

ನಮ್ಮನ್ನು ಕ್ಯಾಬಿನ್​ನಲ್ಲಿ ಕೂಡಿ ಹಾಕಿದ ದರೋಡೆಕೋರರು ನಾಲ್ಕು ಬ್ಯಾಗ್​ಗಳಲ್ಲಿ ಚಿನ್ನ ತೆಗೆದುಕೊಂಡು ಹೋಗಿದ್ದಾರೆ ಎಂದು ಸಂಸ್ಥೆಯ ಬ್ರ್ಯಾಂಚ್​ ಮ್ಯಾನೇಜರ್​ ಹರ್ಪೀತ್​ ಸಿಂಗ್​ ತಿಳಿಸಿದ್ದಾರೆ.

ನಾನು ಎಂದಿನಂತೆ 10 ಗಂಟೆಗೆ ಬಂದೆ. ಹೊರಗಿನಿಂದ ಏನೂ ಗೊತ್ತಾಗುತ್ತಿರಲಿಲ್ಲ. ಒಳಗೆ ಬಂದ ತಕ್ಷಣೆ ನನ್ನ ಸಹೋದ್ಯೋಗಿಗಳತ್ತ ಗನ್ ಹಿಡಿದು ನಿಂತಿರುವ ಲೂಟಿಕೋರರು ಕಂಡರು ಎಂದು ಉದ್ಯೋಗಿಯೋರ್ವರು ತಿಳಿಸಿದ್ದಾರೆ. ಅವರು ನನ್ನ ಮೊಬೈಲ್​ ಕಿತ್ತುಕೊಂಡರು. ನನಗೂ ಗನ್ ತೋರಿಸಿ ಕ್ಯಾಬಿನ್​ನಲ್ಲಿ ಕೂಡಿ ಹಾಕಿದರು ಎಂದು ಹೇಳಿದ್ದಾರೆ.

ಈ ದರೋಡೆಕೋರರು ಹೋಗುವಾಗ ಕಚೇರಿಯ ಮುಖ್ಯಗೇಟ್​ಗೆ ಬೀಗ ಹಾಕಿ ಹೋಗಿದ್ದರು. ಬಳಿಕ ಆ ಕಟ್ಟಡದ ಮಾಲೀಕನಿಗೆ ವಿಷಯ ತಿಳಿಸಿ, ಕೀ ತೆಗೆಸಲಾಯಿತು ಎಂದು ತಿಳಿಸಿದ್ದಾರೆ.(ಏಜೆನ್ಸೀಸ್​)