ಮುಂಬೈ ನೌಕಾ ನೆಲೆಯಲ್ಲಿ ಕರೊನಾ ಆತಂಕ: ನೌಕಾಪಡೆಯ 21 ಸೈನಿಕರಲ್ಲಿ ಸೋಂಕು ದೃಢ, ಯಾವುದೇ ಲಕ್ಷಣಗಳೂ ಗೋಚರಿಸುತ್ತಿಲ್ಲ..

ನವದೆಹಲಿ: ಭಾರತೀಯ ಸೇನೆಯ ಎಂಟು ಸಿಬ್ಬಂದಿಗೆ ಕರೊನಾ ವೈರಸ್​ ಇರುವುದು ದೃಢಪಟ್ಟ ಬೆನ್ನಲ್ಲೇ ಇನ್ನೊಂದು ಆತಂಕಕಾಗಿ ವಿಚಾರ ಹೊರಬಿದ್ದಿದೆ.

ಭಾರತೀಯ ನೌಕಾಪಡೆಯ 21 ಸೈನಿಕರಲ್ಲಿ ಕರೊನಾ ವೈರಸ್​ ದೃಢಪಟ್ಟಿದೆ. ಮುಂಬೈನ ನೌಕಾ ನೆಲೆಯಲ್ಲಿ ಕರ್ತವ್ಯ ನಿರ್ವಹಿಸುತ್ತಿರುವ ಈ 21 ಮಂದಿಗೆ ಕರೊನಾ ಪಾಸಿಟಿವ್​ ಆಗಿದ್ದು, ಉಳಿದ ಸಿಬ್ಬಂದಿಯಲ್ಲೂ ಆತಂಕ ಶುರುವಾಗಿದೆ.

ಕರೊನಾ ಸೋಂಕಿತರಲ್ಲಿ 20 ಮಂದಿ ಐಎನ್​​ಎಸ್​ ಆ್ಯಂಗ್ರೆ​ ನೌಕಾ ಹಡಗಿನಲ್ಲಿ ನಾವಿಕರು. 21 ಮಂದಿಯಲ್ಲಿ ಕರೊನಾ ಕಾಣಿಸಿಕೊಂಡ ಬೆನ್ನಲ್ಲೇ ಇನ್ನೂ ಅನೇಕರನ್ನು ತಪಾಸಣೆಗೆ ಒಳಪಡಿಸಲಾಗಿದೆ. ಸಂಖ್ಯೆ ಹೆಚ್ಚಾಗುವ ಸಾಧ್ಯತೆ ಅಧಿಕವಾಗಿದೆ.

ಭಾರತೀಯ ನೌಕಾನೆಲೆಯಲ್ಲಿ ಕರೊನಾ ಭೀತಿ ಶುರುವಾಗಿದೆ.

ಏಪ್ರಿಲ್​ 7ರಂದು ಓರ್ವ ಸಿಬ್ಬಂದಿಯಲ್ಲಿ ಕರೊನಾ ವೈರಸ್​ ದೃಢಪಟ್ಟಿತ್ತು. ಆತನ ಪ್ರಾಥಮಿಕ ಸಂಪರ್ಕಕ್ಕೆ ಹೋದವರನ್ನೆಲ್ಲ ತಪಾಸಣೆಗೆ ಒಳಪಡಿಸಲಾಗಿತ್ತು. ಈ 21ಜನರಲ್ಲಿ ಕರೊನಾ ಸೋಂಕು ಪಾಸಿಟಿವ್​ ಎಂದು ಬಂದಿದ್ದರೂ ಅವರಲ್ಲಿ ಯಾವುದೇ ಲಕ್ಷಣಗಳೂ ಗೋಚರ ಆಗುತ್ತಿಲ್ಲ. ಹಾಗಾಗಿ ಎಲ್ಲರನ್ನೂ ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸುವುದು ಅನಿವಾರ್ಯವಾಗಿದೆ.

ಈ ನೌಕಾನೆಲೆಯನ್ನು ಕರೊನಾ ಅಪಾಯ ಮಟ್ಟದಲ್ಲಿರುವ ವಲಯ ಎಂದು ಗುರುತಿಸಲಾಗಿದ್ದು, ಐಎನ್​ಎಸ್​ ಆ್ಯಂಗ್ರೆ ಹಡಗನ್ನು ಸಂಪೂರ್ಣ ಬಂದ್​ ಮಾಡಲಾಗಿದೆ.

ಈ ಹಡಗಿನಿಂದ ಕೆಲವೇ ಮೀಟರ್​ ಅಂತದಲ್ಲಿ ಇದ್ದ ಯುದ್ಧ ನೌಕೆಗಳು ಮತ್ತು ಜಲಾಂತರ್ಗಾಮಿ ಹಡಗುಗಳಿಗೆ ಸದ್ಯಕ್ಕೆ ಯಾವುದೇ ಅಪಾಯವಿಲ್ಲ ಎಂದು ಹೇಳಲಾಗಿದೆ.(ಏಜೆನ್ಸೀಸ್​)