ಅಮೆರಿಕದಲ್ಲಿ 2 ಲಕ್ಷ ಸರ್ಕಾರಿ ಕ್ರೆಡಿಟ್ ಕಾರ್ಡ್ ರದ್ದು; ಸರ್ಕಾರಿ ದಕ್ಷತಾ ಇಲಾಖೆ ಆದೇಶ

ವಾಷಿಂಗ್ಟನ್: ಉದ್ಯಮಿ ಎಲಾನ್ ಮಸ್ಕ್ ನೇತೃತ್ವದ ಸರ್ಕಾರಿ ದಕ್ಷತಾ ಇಲಾಖೆಯು ಅಮೆರಿಕ ಸರ್ಕಾರದ ವೆಚ್ಚವನ್ನು ಸುಗಮಗೊಳಿಸಲು ಸುಮಾರು 2 ಲಕ್ಷ ಕ್ರೆಡಿಟ್ ಕಾರ್ಡ್ ಗಳನ್ನು ನಿಷ್ಕ್ರಿಯಗೊಳಿಸಿದೆ. ಈಗಾಗಲೇ ಉದ್ಯೋಗಿ ಗಳ ಕಡಿತ ಮುಂತಾದವುಗಳ ಮೂಲಕ ಆಡಳಿತ ವೆಚ್ಚ ತಗ್ಗಿಸಲು ಮುಂದಾಗಿರುವ ಅಮೆರಿಕ ಸರ್ಕಾರ, ಈ ಮೂಲಕ ಇನ್ನೊಂದು ಹಂತದ ಖರ್ಚು ಕಡಿತಕ್ಕೆ ಅಣಿಯಾಗಿದೆ.

ಸರ್ಕಾರಿ ವೆಚ್ಚ ಕಡಿಮೆ ಮಾಡಲು ಮತ್ತು ಖರ್ಚುಗಳನ್ನು ಕೂಲಂಕಷವಾಗಿ ಪರಿಶೀಲಿಸುವ ಸಲುವಾಗಿ ಸರ್ಕಾರಿ ಕ್ರೆಡಿಟ್ ಕಾರ್ಡ್​ಗಳನ್ನು ಸರಳೀಕರಿಸಲು ಕೆಲಸ ಮಾಡಲಾಗುತ್ತಿದೆ ಎಂದು ಸರ್ಕಾರಿ ದಕ್ಷತಾ ಇಲಾಖೆ ಇತ್ತೀಚೆಗೆ ತಿಳಿಸಿತ್ತು. ಇದರ ಬೆನ್ನಲ್ಲೇ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಫೆಡರಲ್ ವೆಚ್ಚವನ್ನು ಮರು ರೂಪಿಸುವ ಆದೇಶಕ್ಕೆ ಸಹಿ ಹಾಕಿ, ಉದ್ಯೋಗಿಗಳ ಕ್ರೆಡಿಟ್ ಕಾರ್ಡ್​ಗಳನ್ನು 30 ದಿನ ಫ್ರೀಜ್ ಮಾಡಲಾಗಿದೆ.

ಪ್ರಸ್ತುತ ಅಮೆರಿಕದ ಸರ್ಕಾರದ ವಿವಿಧ ಇಲಾಖೆಗಳಲ್ಲಿ ಸುಮಾರು 46 ಲಕ್ಷ ಸಕ್ರಿಯ ಕ್ರೆಡಿಟ್ ಕಾರ್ಡ್​ಗಳಿದ್ದು, 16 ಇಲಾಖೆಗಳಲ್ಲಿ 3 ವಾರಗಳ ಲೆಕ್ಕಪರಿಶೋಧನೆಗಾಗಿ 2,04,801 ಲಕ್ಷ ಕ್ರೆಡಿಟ್ ಕಾರ್ಡ್​ಗಳನ್ನು ನಿಷ್ಕ್ರಿಯ ಗೊಳಿಸಲಾಗಿದೆ. ಇದರಲ್ಲಿ 1,71,120 ಟ್ರಾವೆಲ್ ಕಾರ್ಡ್ ಗಳಿದ್ದರೆ, 33,681 ಪರ್ಚೇಸ್ ಕಾರ್ಡ್​ಗಳಿವೆ ಎಂದು ಸರ್ಕಾರಿ ದಕ್ಷತಾ ಇಲಾಖೆ ತಿಳಿಸಿದೆ.

ಉದ್ಯೋಗಿಗಳಿಗೆ ಬಳಕೆ ಕಡ್ಡಾಯ: ಸರ್ಕಾರಿ ಕ್ರೆಡಿಟ್ ಕಾರ್ಡ್​ಗಳ ಮೂಲಕ 2024ರ ಆರ್ಥಿಕ ವರ್ಷದಲ್ಲಿ ಒಟ್ಟು 3.48 ಲಕ್ಷ ಕೋಟಿ ರೂ. (40 ಬಿಲಿಯನ್ ಡಾಲರ್) ಖರ್ಚು ಮಾಡಲಾಗಿದೆ. ಸಾಮಾನ್ಯವಾಗಿ ಈ ಕ್ರೆಡಿಟ್ ಕಾರ್ಡ್​ಗಳನ್ನು ಕಾನೂನು ಶುಲ್ಕ ನೀಡಲು, ಇಂಧನ ಭರ್ತಿ ಮತ್ತು ಸರ್ಕಾರಿ ಕಚೇರಿಗಳ ಖರ್ಚು-ವೆಚ್ಚಗಳಿಗಾಗಿ ಬಳಕೆ ಮಾಡಲಾಗುತ್ತದೆ. ಸರ್ಕಾರಿ ಕಾರ್ಯಗಳಿಗೆ ಉದ್ಯೋಗಿಗಳು ಇದೇ ಕಾರ್ಡ್​ಗಳನ್ನು ಬಳಸಬೇಕು, ಸ್ವಂತ ಕಾರ್ಡ್​ಗಳನ್ನು ಬಳಸುವಂತಿಲ್ಲ.

ತಪ್ಪೆಸಗಿದ ಎಲಾನ್ ಮಸ್ಕ್ ಉಪಾಧ್ಯಕ್ಷ ವ್ಯಾನ್ಸ್ ಆರೋಪ: ಸರ್ಕಾರಿ ಉದ್ಯೋಗಿಗಳನ್ನು ವಜಾಗೊಳಿಸುವ ವಿಚಾರವಾಗಿ ಎಲಾನ್ ಮಸ್ಕ್ ಕೆಲವೊಂದು ತಪು್ಪ ಎಸಗಿದ್ದಾರೆ ಎಂದು ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ಅಭಿಪ್ರಾಯ ಪಟ್ಟಿದ್ದಾರೆ. ಸರ್ಕಾರಿ ಇಲಾಖೆಗಳಲ್ಲಿ ಹಲವು ಒಳ್ಳೆಯ ಉದ್ಯೋಗಿಗಳಿದ್ದು ಉತ್ತಮವಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಸರ್ಕಾರಿ ಉದ್ಯೋಗಿಗಳ ಉತ್ತಮ ಕೆಲಸವನ್ನು ಪರಿಗಣಿಸಿ ಉದ್ಯೋಗಿಗಳ ವಜಾ ಪ್ರಕ್ರಿಯೆ ನಡೆಸಬೇಕು ಎಂದು ತಿಳಿಸಿದ್ದರು.

ಕಾರ್ಯನಿರ್ವಹಣೆ ಮೇಲೆ ಪರಿಣಾಮ?: ಡೊನಾಲ್ಡ್ ಟ್ರಂಪ್ ಮತ್ತು ಎಲಾನ್ ಮಸ್ಕ್ ಸರ್ಕಾರಿ ವೆಚ್ಚವನ್ನು ಕಡಿಮೆ ಮಾಡಲು ಪ್ರಯತ್ನಿಸುತ್ತಿರುವುದಾಗಿ ಹಲವು ತಿಂಗಳಿಂದ ಹೇಳುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಹಲವು ಇಲಾಖೆಗಳಲ್ಲಿ ಉದ್ಯೋಗ ಕಡಿತವನ್ನೂ ಮಾಡಲಾಗಿದೆ. ಈಗ ಕ್ರೆಡಿಟ್ ಕಾರ್ಡ್ ನಿಷ್ಕ್ರಿಯ ನಿರ್ಧಾರದಿಂದ ವಿಪತ್ತು ಪರಿಹಾರ, ನೈಸರ್ಗಿಕ ವಿಕೋಪ ನಿರ್ವಹಣೆ ಮತ್ತು ಇತರೆ ಏಜೆನ್ಸಿಗಳಲ್ಲಿರುವ ಉದ್ಯೋಗಿಗಳಿಗೆ ವಿನಾಯಿತಿ ನೀಡಲಾಗಿದೆ. ಆದರೆ ಈ ನಿರ್ಧಾರದಿಂದ ಇತರೆ ಏಜೆನ್ಸಿಗಳ ಕಾರ್ಯನಿರ್ವಹಣೆ ಮೇಲೆ ಪರಿಣಾಮ ಉಂಟಾಗಲಿದೆ ಎಂದು ಹೇಳಲಾಗುತ್ತಿದೆ.

ಸರ್ಕಾರಿ ಉದ್ಯೋಗಿಗಳ ಸಂಖ್ಯೆಗಿಂತ ಎರಡು ಪಟ್ಟು ಹೆಚ್ಚು ಕ್ರೆಡಿಟ್ ಕಾರ್ಡ್​ಗಳು ಬಳಕೆಯಲ್ಲಿವೆ. ಈ ಕಾರ್ಡ್​ಗಳ ಮಿತಿ 10 ಸಾವಿರ ಡಾಲರ್ ಇದೆ.

| ಎಲಾನ್ ಮಸ್ಕ್ ಅಮೆರಿಕ ಸರ್ಕಾರಿ ದಕ್ಷತಾ ಇಲಾಖೆ ಮುಖ್ಯಸ್ಥ

https://www.vijayavani.net/virat-kohli-discusses-retirement-recalls-conversation-with-rahul-dravid-on-finding-the-right-time

https://www.vijayavani.net/video-of-little-boy-playing-with-snake-sparks-outrage-online