48 ಗಂಟೆಗಳಲ್ಲಿ 19 ಸಾವು! ಬಿಹಾರಕ್ಕೆ ಅಪ್ಪಳಿಸಿದ ಬಿರುಗಾಳಿ ಮಳೆಗೆ ಜನಜೀವನ ತತ್ತರ, ಬೆಳೆಗಳು ನಾಶ | Bihar

ಪಾಟ್ನಾ: ಕಳೆದ 48 ಗಂಟೆಗಳಲ್ಲಿ ಭಾರೀ ಬಿರುಗಾಳಿಗೆ ಒಟ್ಟು 19 ಮಂದಿ ಬಲಿಯಾಗಿದ್ದು, ಬಿಹಾರದ (Bihar) ಹಲವು ಜಿಲ್ಲೆಗಳಲ್ಲಿ ಹವಾಮಾನದಲ್ಲಿನ ಹಠಾತ್ ಬದಲಾವಣೆಯು ವಿಪರೀತ ಹಾನಿಯನ್ನುಂಟುಮಾಡಿದೆ. ಈ ಹಿನ್ನೆಲೆ ರಾಜ್ಯದಲ್ಲಿ ಸಾವು-ನೋವು ಸಂಭವಿಸಿದ್ದು, ಅಪಾರ ಪ್ರಮಾಣದಲ್ಲಿ ಬೆಳೆಗಳು ಮತ್ತು ಆಸ್ತಿಗೆ ಹಾನಿಯಾಗಿದೆ.

ಇದನ್ನೂ ಓದಿ: AI ಬಳಸಿ 7 ಸೆಕೆಂಡ್​ನಲ್ಲಿ ಹೃದಯ ಕಾಯಿಲೆ ಪತ್ತೆ: ವೈದ್ಯಕೀಯ ಕ್ಷೇತ್ರದಲ್ಲಿ ಸಂಚಲನ ಮೂಡಿಸಿದ ಭಾರತೀಯ ಬಾಲಕ! Heart disease

ಗುಡುಗು, ಆಲಿಕಲ್ಲು ಮತ್ತು ಮಿಂಚಿನಿಂದ ಶುರುವಾದ ವಿಪತ್ತು ಜನರ ಜೀವನ ಮತ್ತು ಜೀವನೋಪಾಯ ಎರಡರ ಮೇಲೂ ತೀವ್ರ ಪರಿಣಾಮ ಬೀರಿದೆ. ಇತ್ತೀಚಿನ ವರದಿಗಳ ಪ್ರಕಾರ, ಕಳೆದ 48 ಗಂಟೆಗಳಲ್ಲಿ ಕನಿಷ್ಠ 19 ಜನರು ಬಿರುಗಾಳಿ ಹೊಡೆತಕ್ಕೆ ಸಿಲುಕಿ ಪ್ರಾಣ ಕಳೆದುಕೊಂಡಿದ್ದಾರೆ. ಈ ಪೈಕಿ ಬೇಗುಸರಾಯ್‌ನಲ್ಲಿ ಐವರು, ದರ್ಭಂಗಾದಲ್ಲಿ ಐವರು, ಮಧುಬನಿಯಲ್ಲಿ ಮೂವರು, ಸಹರ್ಸಾ ಮತ್ತು ಸಮಸ್ತಿಪುರದಲ್ಲಿ ತಲಾ ಇಬ್ಬರು ಮತ್ತು ಬಿಹಾರದ ಲಖಿಸರಾಯ್ ಮತ್ತು ಗಯಾ ಜಿಲ್ಲೆಗಳಲ್ಲಿ ತಲಾ ಒಬ್ಬರು ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದೆ.

ಆಲಿಕಲ್ಲು ಮತ್ತು ಬಲವಾದ ಗಾಳಿಯೊಂದಿಗೆ ಬೀಸಿದ ಬಿರುಗಾಳಿಗಳು, ದರ್ಭಂಗಾ, ಮಧುಬನಿ, ಸಮಸ್ತಿಪುರ, ಮುಜಫರ್‌ಪುರ, ಸೀತಾಮರ್ಹಿ, ಶಿವಹಾರ್ ಮತ್ತು ಪೂರ್ವ ಚಂಪಾರಣ್‌ಗಳಲ್ಲಿ ರಬಿ ಬೆಳೆಗಳಿಗೆ, ವಿಶೇಷವಾಗಿ ಗೋಧಿ, ಮಾವು ಮತ್ತು ಲಿಚಿಗೆ ದೊಡ್ಡ ಪ್ರಮಾಣದ ನಷ್ಟವನ್ನು ಉಂಟುಮಾಡಿದೆ. ಕೊಯ್ಲಿಗೆ ಕೆಲವೇ ವಾರಗಳ ಬಾಕಿ ಉಳಿದಿದ್ದ ಸಮಯದಲ್ಲಿ ರೈತರು ಭಾರೀ ನಷ್ಟವನ್ನು ಅನುಭವಿಸುವಂತಾಗಿದೆ.

ಇದನ್ನೂ ಓದಿ: 8.8 ಲಕ್ಷ ರೂ. ಉಂಡೇನಾಮ! ಸೈಬರ್​ ವಂಚಕರ ಬಲೆಗೆ ಸಿಕ್ಕಿಬಿದ್ದ ವೃದ್ಧ ಕಂಗಾಲು | Cyber Fraud

ಘಟನೆಗೆ ಪ್ರತಿಕ್ರಿಯಿಸಿದ ಬಿಹಾರ ಮುಖ್ಯಮಂತ್ರಿ ನಿತೀಶ್ ಕುಮಾರ್, ಪ್ರಕೃತಿ ವಿಕೋಪದಲ್ಲಿ ಸಾವಿಗೀಡಾದವರಿಗೆ ಸಂತಾಪ ಸೂಚಿಸಿ, ಮೃತರ ಕುಟುಂಬಗಳಿಗೆ ತಲಾ 4 ಲಕ್ಷ ರೂ.ಗಳ ಪರಿಹಾರವನ್ನು ನೀಡುವಂತೆ ಅಧಿಕಾರಿಗಳಿಗೆ ನಿರ್ದೇಶನ ನೀಡಿದ್ದಾರೆ. ಬೆಳೆ ಹಾನಿಯನ್ನು ನಿರ್ಣಯಿಸಲು ಮತ್ತು ಪರಿಹಾರ ಕ್ರಮಗಳನ್ನು ಸಿದ್ಧಪಡಿಸಲು ಜಿಲ್ಲಾಡಳಿತಗಳಿಗೆ ಸೂಚನೆ ನೀಡಿದ್ದಾರೆ.

ಹವಾಮಾನ ವರದಿ

ಬಿಹಾರದಾದ್ಯಂತ ಏಪ್ರಿಲ್ 12ರವರೆಗೆ ಮಿಂಚು ಮತ್ತು ಗುಡುಗು ಸಹಿತ ಭಾರೀ ಮಳೆಯಾಗುವ ಸಾಧ್ಯತೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ಎಚ್ಚರಿಸಿದೆ. ಕೆಲವು ಪ್ರದೇಶಗಳಲ್ಲಿ ಆಲಿಕಲ್ಲು ಮಳೆ ಮತ್ತು ಬಲವಾದ ಗಾಳಿ ಬೀಸುವ ನಿರೀಕ್ಷೆಯಿದೆ ಎಂದೂ ತಿಳಿಸಿದೆ. ಪಶ್ಚಿಮ-ಮಧ್ಯ ಬಂಗಾಳಕೊಲ್ಲಿಯಲ್ಲಿ ಕಡಿಮೆ ಒತ್ತಡದ ಪ್ರದೇಶದಿಂದ ಉಂಟಾಗುವ ಚಂಡಮಾರುತದ ಪ್ರಸರಣವು ತೀವ್ರ ಹವಾಮಾನ ಮಾದರಿಯ ಮೇಲೆ ಪ್ರಭಾವ ಬೀರುತ್ತಿದೆ ಎಂದು ಹೇಳಿದೆ,(ಏಜೆನ್ಸೀಸ್).

https://www.vijayavani.net/vineetha-murder-case-accused-rajendran-found-guilty