ದಾಳಿ ನಡೆದ ಪ್ರದೇಶದಲ್ಲಿ ತೆಲಂಗಾಣದ ಮಾವೋವಾದಿಗಳ ಮುಖಂಡರ ಚಲನವಲನ ಸಾಮಾನ್ಯವಾಗಿ ಇರುತ್ತದೆ. ಆದರೆ, ಈ ಸಾರಿ ನಕ್ಸಲರ ಬೃಹತ್ ಗುಂಪೊಂದು ಬೀಡುಬಿಟ್ಟರುವ ವರದಿ ಗುಪ್ತಚರ ದಳದಿಂದ ದೊರಕಿತು. ಹೀಗಾಗಿ ಜಂಟಿ ತಂಡದ 150 ಮಂದಿ ಐದು ಭಾಗಗಳಾಗಿ ಶೋಧ ಕಾರ್ಯಾಚರಣೆಗೆ ಇಳಿದರು ಎಂದು ಹೆಸರು ಹೇಳಲು ಬಯಸದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ. ಜಂಟಿ ತಂಡ ಶೋಧನಾ ಕಾರ್ಯದ ಬಗ್ಗೆ ನಕ್ಸಲರಿಗೆ ಸುಳಿವು ದೊರೆತು, ಅವರು ಹೆಚ್ಚು ಜಾಗೃತರಾದರು. ಜಂಟಿ ತಂಡದ ಮೊದಲ ಗುಂಪು ಕಾಸಲ್ಪಾಡ್ ಅರಣ್ಯದಲ್ಲಿ ಶೋಧಕಾರ್ಯ ನಡೆಸಿದಾಗ ನಕ್ಸಲರು ಅಥವಾ ದಾಳಿ ಎದುರಾಗಲಿಲ್ಲ. ಆದರೆ, ಕೊರಜ್ ಡೋಂಗ್ರಿ ಬಳಿ ನಕ್ಸಲರು ದೊಡ್ಡ ಮಟ್ಟದಲ್ಲಿ ದಾಳಿ ನಡೆಸಿದರು. ಇದನ್ನು ಮಾವೋವಾದಿ ಗುಂಪಿನ ನೂತನ ಮುಖ್ಯಸ್ಥ ಬಸವರಾಜು ಸೂಚನೆ ಮೇಲೆ ನಡೆಸಲಾಗಿದೆ ಎನ್ನಲಾಗಿದೆ. ದಾಳಿಯ ವಾರ್ತೆ ತಿಳಿಯುತ್ತಿದ್ದಂತೆ ಸಿಆರ್ಪಿಎಫ್ನ ಒಂದು ತುಕಡಿಯನ್ನು ಯೋಧರ ರಕ್ಷಣೆಗಾಗಿ ಕಳುಹಿಸಲಾಯಿತು ಎಂದು ಹೇಳಿದ್ದಾರೆ.
