ಕಂಪನಿಯಿಂದಲೇ ನ್ಯೂನತೆ: ದೂರಿನ ಸಂಬಂಧ ಓಲಾ ಕಂಪನಿ ಹಾಗೂ ಆರ್ಟಿಒಗೆ ಗ್ರಾಹಕ ನ್ಯಾಯಾಲಯ ನೋಟಿಸ್ ನೀಡಿತ್ತು. ಆರ್ಟಿಒ ವಿಚಾರಣೆಗೆ ಗೈರಾಗಿತ್ತು. ಓಲಾ ಕಂಪನಿ ವಕೀಲರ ಮೂಲಕ ಪ್ರಕರಣವನ್ನು ಪ್ರತಿನಿಧಿಸಿದರೂ ಯಾವುದೇ ಹೇಳಿಕೆ ಸಲ್ಲಿಸಿರಲಿಲ್ಲ. ದೂರುದಾರರು ಇ.ವಿ. ಖರೀದಿಸಿದ ರಸೀದಿ, ಫ್ಯಾನ್ಸಿ ನಂಬರ್ಗಾಗಿ ಪಾವತಿಸಿದ್ದ ಹಣಕ್ಕೆ ಆರ್ಟಿಒ ನೀಡಿದ್ದ ರಸೀದಿ, ಕಂಪನಿಗೆ ನೀಡಿದ್ದ ಲೀಗಲ್ ನೋಟಿಸ್ ಸೇರಿ ಹಲವು ದಾಖಲೆಗಳನ್ನು ನ್ಯಾಯಾಲಯಕ್ಕೆ ಒದಗಿಸಿದ್ದರು. ದಾಖಲೆಗಳನ್ನು ಪರಿಶೀಲಿಸಿದ ನ್ಯಾಯಾಲಯ, ಫ್ಯಾನ್ಸಿ ನಂಬರ್ ನೋಂದಣಿಗಾಗಿ ದೂರುದಾರರು ಆರ್ಟಿಒಗೆ ಹೆಚ್ಚುವರಿ 25 ಸಾವಿರ ರೂ. ಪಾವತಿಸಿದ್ದಾರೆ. ಆದರೆ, ಫ್ಯಾನ್ಸಿ ನಂಬರ್ ವಿಚಾರದಲ್ಲಿ ಸರಿಯಾದ ಸೇವೆ ಒದಗಿಸಲು ಕಂಪನಿ ವಿಫಲವಾಗಿದೆ. ವಾಹನ ಮಾರಾಟಗಾರರಾಗಿ ಕಂಪನಿಯು ಗ್ರಾಹಕರ ಬೇಡಿಕೆಯ ಬಗ್ಗೆ ಗಮನ ಹರಿಸದೆ ಸೇವಾ ನ್ಯೂನತೆ ಎಸಗಿದೆ. ಆದ್ದರಿಂದ, ಪರಿಹಾರ ಪಾವತಿಸುವ ಹೊಣೆ ಕಂಪನಿಯ ಮೇಲಿದೆ ಎಂದು ಹೇಳಿದೆ. ಆರ್ಟಿಒ ರಾಜ್ಯ ಸರ್ಕಾರದ ನೋಂದಣಿ ಪ್ರಾಧಿಕಾರವಾಗಿದ್ದು, ಈ ಪ್ರಕರಣದಲ್ಲಿ ಅದರ ಪಾತ್ರವಿಲ್ಲ. ದೂರುದಾರರೂ ಸಹ ಅದರ ವಿರುದ್ಧ ಯಾವುದೇ ಆರೋಪ ಮಾಡಿಲ್ಲ. ಆದ್ದರಿಂದ, ಆರ್ಟಿಒ ವಿರುದ್ಧದ ದೂರನ್ನು ರದ್ದುಪಡಿಸಲಾಗುತ್ತಿದ್ದು, ಸೇವಾ ನ್ಯೂನತೆ ಎಸಗಿರುವ ಕಂಪನಿಯೇ ದೂರುದಾರ ರಿಗೆ 25 ಸಾವಿರ ರೂ.ಗಳನ್ನು ಮರುಪಾವತಿಸಬೇಕು ಎಂದು ಗ್ರಾಹಕ ನ್ಯಾಯಾಲಯ ಆದೇಶಿಸಿದೆ.
