ವಿಜಯವಾಣಿ ಸುದ್ದಿಜಾಲ ಆನೇಕಲ್
ಬನ್ನೇರುಘಟ್ಟ ಜೈವಿಕ ಉದ್ಯಾನದಲ್ಲಿ 7 ಚಿರತೆ ಮರಿಗಳು ಸಾವಿಗೀಡಾದ ಬೆನ್ನಲ್ಲೇ 15 ಜಿಂಕೆಗಳು ಮೃತಪಟ್ಟಿರುವುದು ತೀವ್ರ ಆತಂಕಕ್ಕೆ ಕಾರಣವಾಗಿದೆ.
ತಿಂಗಳ ಹಿಂದೆ ಬೆಂಗಳೂರಿನ ಸೇಂಟ್ ಜಾನ್ಸ್ ಆಸ್ಪತ್ರೆ ಉದ್ಯಾನದಲ್ಲಿದ್ದ 37 ಜಿಂಕೆಗಳನ್ನು ಸೂಕ್ತ ಪೋಷಣೆ ಇಲ್ಲವೆಂದು ಬನ್ನೇರುಘಟ್ಟ ಪಾರ್ಕ್ಗೆ ತಂದು ಉದ್ಯಾನದ ಅರಣ್ಯ ವ್ಯಾಪ್ತಿಯ ಸಫಾರಿಯ ಕ್ವಾರಂಟೈನ್ ಕೇಜ್ ಬಳಿ ಬಿಡಲಾಗಿತ್ತು. ಈ ಪೈಕಿ 15 ಜಿಂಕೆಗಳು ಮೃತಪಟ್ಟಿವೆ.
ಬೇರೆಡೆಯಿಂದ ತಂದ ಪ್ರಾಣಿಗಳನ್ನು ಕನಿಷ್ಠ ತಿಂಗಳ ಕಾಲ ಕ್ವಾರಂಟೈನ್ ಮಾಡಿ, ಆರೋಗ್ಯ, ಆಹಾರ, ಔಷಧೋಪಚಾರ ಬಗ್ಗೆ ನಿಗಾವಹಿಸಬೇಕು. ಆದರೆ ಜಿಂಕೆಗಳ ಬಗ್ಗೆ ಕಾಳಜಿ ವಹಿಸದ ಹಿನ್ನೆಲೆಯಲ್ಲಿ ಒಂದಕ್ಕೊಂದು ಕಿತ್ತಾಡಿಕೊಂಡಿರುವ ಜತೆಗೆ ಸರಿಯಾದ ಆಹಾರ ದೊರಕದೆ ಅನಾರೋಗ್ಯ ಪೀಡಿತವಾಗಿ ಮೃತಪಟ್ಟಿರುವ ಸಾಧ್ಯತೆ ಇದೆ ಎನ್ನಲಾಗಿದೆ.
ಬೆಂಗಳೂರಿನಿಂದ ತರಲಾದ ಜಿಂಕೆಗಳ ಆಹಾರ ಪದ್ಧತಿ ಬದಲಾದ ಹಿನ್ನೆಲೆಯಲ್ಲಿ ಅವುಗಳ ಜೀರ್ಣಕ್ರಿಯೆಯಲ್ಲಿ ತೊಂದರೆಯಾಗಿ ಸಾವನ್ನಪ್ಪುತ್ತಿರುವ ಸಾಧ್ಯತೆ ಹೆಚ್ಚಾಗಿದ್ದು, ಉಳಿದ ಜಿಂಕೆಗಳ ಬಗ್ಗೆಯಾದರೂ ಕಾಳಜಿ ವಹಿಸಬೇಕು ಎಂದು ಪ್ರಾಣಿಪ್ರಿಯರು ಒತ್ತಾಯಿಸಿದ್ದಾರೆ.
