ಲಡಾಖ್ ಮತ್ತು ಅಕ್ಸಾಯ್ ಚಿನ್ ಪ್ರದೇಶದಲ್ಲಿ ಚೀನಾ ಮಿಲಿಟರಿ ಚಟುವಟಿಕೆ ಪರಿಶೀಲಿಸಲು ಉನ್ನತ ಮಟ್ಟದ ಚೀನಾ ಅಧ್ಯಯನ ಗುಂಪು (ಸಿಎಸ್ಜಿ) ಸೋಮವಾರ ಸಭೆ ನಡೆಸಿದೆ. ಈಗಿರುವ ಪರಿಸ್ಥಿತಿಯ ಆಧಾರದಲ್ಲಿ ಭಾರತದೊಂದಿಗಿನ ರಾಜತಾಂತ್ರಿಕ ಸಂಬಂಧಗಳನ್ನು ಸುಧಾರಿಸಬೇಕೆನ್ನುವುದು ಚೀನಾದ ಅಭಿಪ್ರಾಯವಾಗಿದೆ. ಆದರೆ, ಲಡಾಖ್ ವಲಯದಿಂದ ಚೀನಾ ಸೇನೆ ಹಿಂದೆ ಸರಿಯುವ ವರೆಗೂ ಸಂಬಂಧ ಸುಧಾರಣೆ ಸಾಧ್ಯವಿಲ್ಲ. ಅದಕ್ಕಾಗಿ ಯಾವುದೇ ಕ್ರಮ ಕೈಗೊಳ್ಳಲು ಸಿದ್ಧ ಎಂದು ಭಾರತ ಹೇಳಿದೆ. ಲಡಾಖ್ನಲ್ಲಿನ 1597 ಕಿ.ಮೀ. ಉದ್ದದ ವಾಸ್ತವ ನಿಯಂತ್ರಣ ರೇಖೆಯ (ಎಲ್ಎಸಿ) ಮುಂಚೂಣಿ ನೆಲೆಗಳಲ್ಲಿ ಮುಂದುವರಿಯುವಂತೆ ಭಾರತೀಯ ಸೇನೆಗೆ ಸೂಚಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಭಾರತದ ಹಿರಿಯ ಸಚಿವರು, ಮಿಲಿಟರಿ ನಾಯಕರು ಮತ್ತು ಅಧಿಕಾರಿಗಳು ಸಿಎಸ್ಜಿಯ ಸದಸ್ಯರಾಗಿದ್ದಾರೆ. ಚೀನಾದ ವಿರುದ್ಧ ಕ್ರಮಗಳನ್ನು ಶಿಫಾರಸು ಮಾಡುವ ಸಮಿತಿ ಇದಾಗಿದೆ.
