"ಮಿತ್ರಾವರಣ" ಅನಾವರಣ; ಫೆ.23ರಂದು ಪ್ರೊ.ಅ.ರಾ.ಮಿತ್ರ ಕೃತಿ ಅವಲೋಕನ ಮತ್ತು ಅಭಿನಂದನಾ ಸಮಾರಂಭ

ಬೆಂಗಳೂರು: ತೊಂಬತ್ತು ವಸಂತಗಳನ್ನು ಕಂಡ ಕನ್ನಡದ ಶ್ರೇಷ್ಠ ಸಾಹಿತಿ, ವಿಮರ್ಶಕ, ಭಾಷಣಕಾರರಾದ ಪ್ರೊ.ಅ.ರಾ.ಮಿತ್ರ ಅವರ ಕೃತಿ ಅವಲೋಕನ, ಅನಾವರಣ ಮತ್ತು ಅಭಿನಂದನಾ ಸಮಾರಂಭವನ್ನು ಇದೇ ಭಾನುವಾರದಂದು (ಫೆ. 23) ಬೆಂಗಳೂರಿನ ಭಾರತೀಯ ವಿದ್ಯಾ ಭವನದ ಖಿಂಚ ಸಭಾಂಗಣದಲ್ಲಿ ಏರ್ಪಡಿಸಲಾಗಿದೆ.

ಇದನ್ನೂ ಓದಿ: ಬೆಂಬಲ ಬೆಲೆ ಯೋಜನೆಯಡಿ ಬಿಳಿಜೋಳ ಖರೀದಿ; ಜಿಲ್ಲಾಧಿಕಾರಿ ಟಿ.ಭೂಬಾಲನ್

ಭಾರತೀಯ ವಿದ್ಯಾ ಭವನ ಹಾಗೂ ರಮಣಶ್ರೀ ಸಮೂಹ ಸಂಸ್ಥೆಗಳ ಸಹಯೋಗದಲ್ಲಿ ಮಿತ್ರವೃಂದದವರು ಅರ್ಪಿಸುತ್ತಿರುವ ವಿಶೇಷ ಕಾರ್ಯಕ್ರಮ, "ಮಿತ್ರಾವರಣ" ಭಾನುವಾರ ಬೆಳಗ್ಗೆ 9.30ರಿಂದ ಸಂಜೆ 5.30ರವರೆಗೆ ನಡೆಯಲಿದೆ. ಜ್ಞಾನಪೀಠ ಪ್ರಶಸ್ತಿ ಪುರಸ್ಕೃತ ಡಾ. ಚಂದ್ರಶೇಖರ ಕಂಬಾರರು ಮಿತ್ರೋತ್ಸವವನ್ನು ಉದ್ಘಾಟಿಸುವರು. ಖ್ಯಾತ ಸಾಹಿತಿ, ವಿಮರ್ಶಕ ಡಾ.ಟಿ.ವಿ.ವೆಂಕಟಾಚಲ ಶಾಸ್ತ್ರಿಗಳು "ಮಿತ್ರಾರ್ಜಿತ" ಅಭಿನಂದನ ಗ್ರಂಥವನ್ನು ಶತಾವಧಾನಿ ಡಾ.ರಾ.ಗಣೇಶರ ಜತೆಗೂಡಿ ಲೋಕಾರ್ಪಣೆಗೈಯುವರು.

ಕನ್ನಡ ನಾಡಿನ ಹೆಸರಾಂತ ಸಾಹಿತಿಗಳು, ಕಲಾವಿದರು, ದಿಗ್ಗಜರು ಈ ಸಂಭ್ರಮಾಚರಣೆಯಲ್ಲಿ ಪಾಲ್ಗೊಂಡು ಪ್ರೊ.ಅ.ರಾ.ಮಿತ್ರರ ಜೀವನ ಮತ್ತು ಸಾಧನೆಯ ಬಗ್ಗೆ ಬೆಳಕು ಚೆಲ್ಲುವರು. ಮಧ್ಯಾಹ್ನ ಗೀತ-ನೃತ್ಯ-ಕಲಾ ವೈದುಷ್ಯದ ಪ್ರದರ್ಶನವನ್ನು ಸಂಗೀತ ವಿದುಷಿ ಡಾ.ನಾಗವಲ್ಲಿ ನಾಗರಾಜ್, ನೃತ್ಯ ಗುರು ಡಾ.ಶೋಭಾ ಶಶಿಕುಮಾರ್ ಮತ್ತು ಚಿತ್ರ ಕಲಾವಿದೆ ಶ್ರೀಮತಿ.ಮಂಜುಳಾ ಪ್ರೇಮಕುಮಾರ್ ನಡೆಸಿಕೊಡುವರು.

ಇದನ್ನೂ ಓದಿ: FBI ನಿರ್ದೇಶಕರಾಗಿ ಭಾರತೀಯ ಮೂಲದ ಕಾಶ್ ಪಟೇಲ್ ನೇಮಕ; ಶ್ವೇತಭವನದಿಂದ ಬಾಲಿವುಡ್​​ ಸ್ಟೈಲ್​ನಲ್ಲಿ ವಿಶ್​​

ಸಂಜೆ 4.15ಕ್ಕೆ ಡಾ.ಎಸ್. ಆರ್. ಲೀಲಾ ಅವರಿಂದ ಅಭಿನಂದನಾ ನುಡಿಗಳು, ಪ್ರೊ.ಅ.ರಾ. ಮಿತ್ರರವರಿಗೆ ಸನ್ಮಾನ ಹಾಗೂ ಸ್ವಾಮಿ ಮುಕ್ತಿದಾನಂದ ಮಹಾರಾಜ್ ಮತ್ತು ನಾಡೋಜ ಡಾ.ಎಸ್.ಆರ್. ರಾಮಸ್ವಾಮಿಯವರ ಅಭಿನಂದನ ಭಾಷಣವಿರುವುದು. ನಂತರ ಪ್ರೊ.ಅ.ರಾ.ಮಿತ್ರರವರ ಕೃತಜ್ಞತಾ ನುಡಿಯೊಂದಿಗೆ ಮಿತ್ರಾವರಣ ಕಾರ್ಯಕ್ರಮ ಸಂಪನ್ನಗೊಳ್ಳುವುದು.

https://www.vijayavani.net/students-of-this-school-are-great-in-these-five-languages