ಶ್ರೀಕ್ಷೇತ್ರ ಧರ್ಮಸ್ಥಳದ ಮಂಜುನಾಥಸ್ವಾಮಿ ದೇವಸ್ಥಾನದಲ್ಲಿ ನಂದಾದೀಪ ಆರಿದೆ, ಎಲ್ಲರೂ ತಮ್ಮ ಮನೆಗಳ ಮುಂದೆ ದೀಪ ಹಚ್ಚಬೇಕೆಂದು ಗುರುವಾರ ರಾತ್ರಿ ಫೇಸ್ಬುಕ್ನಲ್ಲಿ ಶೇರ್ ಆಗಿದ್ದ ವದಂತಿ ನಂಬಿದ ದಾವಣಗೆರೆ, ಚಿತ್ರದುರ್ಗ ಇತರ ಜಿಲ್ಲೆಗಳ ಜನರು ಜಾಗರಣೆ ಮಾಡಿದರು. ಶುಕ್ರವಾರ ನಸುಕಿನಲ್ಲೇ ಮನೆ ಎದುರು ರಂಗೋಲಿ ಹಾಕಿ ನಂದಾದೀಪ ಬೆಳಗಿದ್ದರು. ಈ ವದಂತಿ ಹಬ್ಬಿಸಿದ್ದ ಹೊನ್ನಾಳಿ ತಾಲೂಕು ಸುಂಕದಕಟ್ಟೆಯ ಮಧು, ಸಾಮಾಜಿಕ ಜಾಲತಾಣದಲ್ಲೇ ತಪ್ಪೊಪ್ಪಿಕೊಂಡಿದ್ದು, ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆಯವರ ಕ್ಷಮೆ ಯಾಚಿಸಿದ್ದಾನೆ. ಅರ್ಚಕನಾಗಿದ್ದ ಮಧು ಕ್ಷಮೆ ಕೇಳಿರುವುದರಿಂದ ದೂರು ಸಲ್ಲಿಸದಿರಲು ಶ್ರೀಧರ್ಮಸ್ಥಳ ಗ್ರಾಮಾಭಿವೃದ್ಧಿ ಸಂಘದವರು ನಿರ್ಧರಿಸಿದ್ದಾರೆ. ಶ್ರೀಕ್ಷೇತ್ರದಲ್ಲಿ ನಂದಾದೀಪ ಆರಿ ಹೋಗಿದೆ ಎಂಬ ವದಂತಿಗೆ ಕಿವಿಗೊಡಬೇಡಿ ಎಂದು ಡಾ.ಡಿ.ವೀರೇಂದ್ರ ಹೆಗ್ಗಡೆ ತಿಳಿಸಿದ್ದಾರೆ.
