ಅಹಮದಾಬಾದ್: ಆಸ್ಟ್ರೆಲಿಯಾದ ಆಲ್ರೌಂಡರ್ ಗ್ಲೆನ್ ಮ್ಯಾಕ್ಸ್ವೆಲ್ ಗಾಲ್ಫ್ ಕಾರ್ಟ್ನಿಂದ ಬಿದ್ದು ಗಾಯಗೊಂಡಿದ್ದಾರೆ. ಇದರಿಂದಾಗಿ ಅವರು ನವೆಂಬರ್ 4ರಂದು ನಡೆಯಲಿರುವ ಆಸ್ಟ್ರೇಲಿಯಾದ ಸಾಂಪ್ರದಾಯಿಕ ಎದುರಾಳಿ ಹಾಗೂ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ವಿರುದ್ಧದ ಮಹತ್ವದ ಪಂದ್ಯಕ್ಕೆ ಅಲಭ್ಯರಾಗಿದ್ದಾರೆ.
ಕ್ಲಬ್ಹೌಸ್ ಒಂದಕ್ಕೆ ತೆರಳಿದ್ದ ಮ್ಯಾಕ್ಸ್ವೆಲ್, ಗಾಲ್ಫ್ ಕಾರ್ಟ್ ಹಿಂಬದಿಯಲ್ಲಿ ಕುಳಿತು ಟೀಮ್ ಬಸ್ನತ್ತ ಮರಳಿ ಬರುವಾಗ ಬಿದ್ದಿದ್ದು, ಕೆಲ ತರಚಿದ ಗಾಯಗಳಾಗಿವೆ. ಜತೆಗೆ ಅವರ ತಲೆಗೂ ಪೆಟ್ಟಾಗಿರುವುದರಿಂದ, ಕನ್ಕಷನ್ ನಿಯಮದನ್ವಯ ಅವರು ಇನ್ನು ಕೆಲ ದಿನ ವೈದ್ಯರ ಮೇಲ್ವಿಚಾರಣೆಯಲ್ಲಿರಬೇಕಿದೆ. ಈಗಾಗಲೆ ಸ್ಪಿನ್ನರ್ಸ್ ಕೊರತೆ ಹೊಂದಿರುವ ಆಸೀಸ್ಗೆ ಮ್ಯಾಕ್ಸಿ ಗೈರು ಹಿನ್ನಡೆ ಎನಿಸಿದೆ.
ಆಶ್ಟನ್ ಅಗರ್ ಗಾಯದಿಂದಾಗಿ ವಿಶ್ವಕಪ್ನಿಂದ ಹೊರಬಿದ್ದ ಬಳಿಕ ಮತ್ತೋರ್ವ ಸ್ಪಿನ್ನರ್ ಬದಲು ಮಾರ್ನಸ್ ಲಬುಶೇನ್ರನ್ನು ತಂಡಕ್ಕೆ ಸೇರಿಸಿಕೊಂಡಿದ್ದ ಆಸೀಸ್, ಆಡಂ ಜಂಪಾಗೆ ಸಮರ್ಥ ಸ್ಪಿನ್ ಜತೆಗಾರರಿಲ್ಲದೆ ಪರದಾಡಿತ್ತು. ಅರೆಕಾಲಿಕ ಸ್ಪಿನ್ನರ್ ಆಗಿ ಮ್ಯಾಕ್ಸ್ವೆಲ್ ಒಬ್ಬರೇ ಸದ್ಯ ಜಂಪಾಗೆ ಒಂದಿಷ್ಟು ಬೆಂಬಲ ಒದಗಿಸುತ್ತ ಬಂದಿದ್ದರು. ಆಸೀಸ್ ವೇಗಿಗಳಿಗಿಂತ ಆಡಂ ಜಂಪಾ ಅವರೇ ಸದ್ಯ ವಿಶ್ವಕಪ್ನಲ್ಲಿ 16 ವಿಕೆಟ್ ಕಬಳಿಸಿ ಮುಂಚೂಣಿಯಲ್ಲಿದ್ದಾರೆ.
ಮ್ಯಾಕ್ಸ್ವೆಲ್ ಇತ್ತೀಚೆಗಿನ ದಿನಗಳಲ್ಲಿ 2ನೇ ಬಾರಿಗೆ ಈ ರೀತಿ, ಕ್ರಿಕೆಟ್ ಮೈದಾನದಿಂದ ಹೊರಗೆ ಆಕಸ್ಮಿಕ ಗಾಯಕ್ಕೀಡಾಗಿದ್ದಾರೆ. ಕಳೆದ ನವೆಂಬರ್ನಲ್ಲಿ ಅವರು ಮೆಲ್ಬೋರ್ನ್ನಲ್ಲಿ ಬರ್ತ್ಡೇ ಪಾರ್ಟಿಯಲ್ಲಿ ಬಿದ್ದು ಕಾಲು ಮುರಿದುಕೊಂಡಿದ್ದರು. ನಂತರ ಅವರು ಫಿಟ್ ಆಗಿ 2023ರ ಐಪಿಎಲ್ ವೇಳೆಗೆ ಮರಳಿ ಕಣಕ್ಕಿಳಿದಿದ್ದರು. ಇದೀಗ ವಿಶ್ವಕಪ್ನಲ್ಲಿ ಕಿವೀಸ್ ವಿರುದ್ಧದ ಪಂದ್ಯದ ಬಳಿಕ ಇಂಗ್ಲೆಂಡ್ ವಿರುದ್ಧದ ಪಂದ್ಯಕ್ಕೆ ಮುನ್ನ 1 ವಾರದ ಬಿಡುವು ಇದ್ದ ಕಾರಣ ಆಸೀಸ್ ಆಟಗಾರರು ಗಾಲ್ಫ್ ಆಡಲು ತೆರಳಿದ್ದಾಗ ಮ್ಯಾಕ್ಸ್ವೆಲ್ ಬಿದ್ದು ಮತ್ತೆ ಗಾಯಮಾಡಿಕೊಂಡಿದ್ದಾರೆ.
ರಾಷ್ಟ್ರೀಯ ಕ್ರೀಡಾಕೂಟದ ಈಜುಕೊಳದಲ್ಲಿ ಚಿನ್ನದ ಪದಕ ಗೆದ್ದು ಮಿಂಚಿದ ಪತಿ-ಪತ್ನಿ!