ನಾಯಕನ ಗುಣ ಇರುವವನು ನಾಯಕನಾಗಿಯೇ ಬೆಳೆಯುತ್ತಾನೆ. ಜನ ಕೂಡ ಗುರುತಿಸುತ್ತಾರೆ. ಅದನ್ನು ಯಾರಿಂದಲೂ ಕೇಳಿ ಪಡೆಯುವಂಥದ್ದಲ್ಲ. ಶಕುಂತಲೆ ಕಣ್ವಾಶ್ರಮದಲ್ಲಿ ಜನ್ಮ ನೀಡಿದರೂ, ಅವಳ ಮಗ ಕಾಡಿನಲ್ಲೇ ಬೆಳೆದರೂ ಆತ ಚಕ್ರವರ್ತಿ ಆಗಲಿಲ್ಲವೇ? ಅವನಿಗೆ ಆ ಅರ್ಹತೆ ಇತ್ತು. ಸಿಂಹಕ್ಕೆ ಕಾಡಿನ ರಾಜ (ವನರಾಜ) ಎಂಬ ಪಟ್ಟ ಸಿಗುವುದು ಹಾಗೆಯೇ. ವಜ್ರ ಚಿಕ್ಕದಿದ್ದರೂ ಅದರ ಹೊಳಪು, ಗುಣ ಅದರದ್ದೇ ಎಂದಾದರೆ ಸಿಗಬೇಕಾದ ಜನಮನ್ನಣೆ ಎಲ್ಲಿ ಹೋದರೂ ಸಿಕ್ಕೆ ಸಿಗುತ್ತದೆ. ನಾವೂ ಹೇಗಿರಬೇಕೋ ಹಾಗಿದ್ದರೆ ನಮಗೆ ಸಿಗಬೇಕಾದುದು ಸಿಕ್ಕೆ ಸಿಗುತ್ತದೆ. ಆದರೆ ನಾವು ನಮಗೆ ಬೇಕಾದಂತೆ ಇದ್ದು, ಅದು ಸಿಗಲಿಲ್ಲ, ಇದು ಸಿಗಲಿಲ್ಲ ಎಂದು ಕೊರಗುವುದರಲ್ಲಿ ಅರ್ಥವಿದೆಯೇ? ಹಾಗಾಗಿ, ನಮ್ಮ ಸಾಮರ್ಥ್ಯ, ಪ್ರತಿಭೆ, ಅಂತಃಶಕ್ತಿಗಳನ್ನು ಅರ್ಥಮಾಡಿಕೊಂಡು ಸಾರ್ಥಕವಾಗಿ ಬದುಕೋಣ. ಬದುಕಿನಜಾತ್ರೆಯಲ್ಲಿ ಖುಷಿಯಿಂದ ಮುಂದೆ ಸಾಗೋಣ.
