ಮಹಾಭಾರತದ ರೋಚಕ ಪ್ರಸಂಗ. ಕೌರವ-ಪಾಂಡವರೆಲ್ಲರೂ ಗುರು ದ್ರೋಣಾಚಾರ್ಯರಿಂದ ಕಲಿತ ಅಸ್ತ್ರ-ಶಸ್ತ್ರಗಳ ವಿದ್ಯೆಗಳನ್ನು ಎಲ್ಲರೆದುರು ಪ್ರದರ್ಶನ ಮಾಡುವ ಸಂದರ್ಭ. ಒಬ್ಬರಿಗಿಂತ ಒಬ್ಬರು ಮಿಗಿಲಾಗಿ ವಿದ್ಯಾಪ್ರಾವೀಣ್ಯವನ್ನು ತೋರಿಸುತ್ತಿದ್ದಾರೆ. ಈ ಸಂದರ್ಭದಲ್ಲಿ ಕರ್ಣನ ರಂಗಪ್ರವೇಶ. ತಾನು ಪರಶುರಾಮರಿಂದ ಕಲಿತ ವಿದ್ಯೆಯನ್ನು ಪ್ರದರ್ಶಿಸಲು ಮುಂದಾದ. ರಾಜಪುತ್ರರಿಗೆ ಮಾತ್ರ ವಿದ್ಯಾಪ್ರದರ್ಶನದ ಅವಕಾಶವೆಂಬ ಮಾತು ಕೇಳಿಬಂದಾಗ, ಅರ್ಜುನನಿಗೆ ಸರಿಸಾಟಿ ಧನುರ್ಧಾರಿಯನ್ನು ಹುಡುಕುತ್ತಿದ್ದ ದುರ್ಯೋಧನ ಆ ಸಂದರ್ಭದಲ್ಲೇ ಕರ್ಣನಿಗೆ ಪಟ್ಟಾಭಿಷೇಕ ಮಾಡಿ ಅಂಗದೇಶದ ರಾಜನನ್ನಾಗಿ ಮಾಡಿದ. ಕರ್ಣನ ಸಾಕುತಂದೆ ಅಧಿರಥ. ಒಬ್ಬ ಸೂತ. ತನ್ನ ಮಗನಿಗೆ ಪಟ್ಟಾಭಿಷೇಕವಾಗುತ್ತಿರುವ ವಾರ್ತೆ ಕೇಳಿ, ನೋಡಬೇಕೆಂಬ ಹಂಬಲದಿಂದ ಧಾವಿಸಿ ಬಂದ. ತಂದೆ ಬಂದುದನ್ನು ದೂರದಿಂದಲೇ ಗಮನಿಸಿದ ಕರ್ಣ, ಯಾವ ಸಂಕೋಚ ಮಾಡಿಕೊಳ್ಳದೆ, ಸಿಂಹಾಸನದಿಂದ ಧರಧರನೇ ಇಳಿದುಬಂದು ಎಲ್ಲರೆದುರು ತಂದೆಗೆ ನಮಸ್ಕರಿಸಿದ. ಆ ದೃಶ್ಯ ಕಂಡು ಎಲ್ಲರೂ ಪುಳಕಿತರಾದರು.
