ಚೆನ್ನೈ : ಪಶ್ಚಿಮ ಬಂಗಾಳದ ಸಿಎಂ ಮಮತಾ ಬ್ಯಾನರ್ಜಿ ಅವರಿಗೂ ಮಾರ್ಕ್ಸ್ವಾದಿ ಎಡಪಕ್ಷಗಳಿಗೂ ಕಟ್ಟಾ ವಿರೋಧವಿರಬಹುದು. ಆದರೆ ತಮಿಳುನಾಡಿನ ಸೇಲಂನಲ್ಲಿ ಅದೇ ಹೆಸರಿನ ಯುವತಿಯು ‘ಸೋಷಿಯಲಿಸಂ’ ಎಂಬ ಹೆಸರಿನ ಯುವಕನನ್ನು ವರಿಸಿದ್ದಾಳೆ!
ಇಂದು ನಡೆದ ವಿವಾಹೋತ್ಸವದಲ್ಲಿ ಪಿ.ಮಮತಾ ಬ್ಯಾನರ್ಜಿ ಎಂಬ ವಧುವು ಎ.ಎಂ.ಸೋಷಿಯಲಿಸಂ ಎಂಬ ವರನ ಕೈಹಿಡಿದಳು. ಈ ಸರಳ ಸಮಾರಂಭದಲ್ಲಿ ತಮಿಳುನಾಡು ಸಿಪಿಐ ಅಧ್ಯಕ್ಷ ಆರ್.ಮುತ್ತರಸನ್, ಸಂಸದ ತಿರುಪ್ಪುರ್ ಕೆ.ಸುಬ್ಬರಾಯನ್ ಸೇರಿದಂತೆ ಹಲವು ಎಡಪಕ್ಷದ ನಾಯಕರು ಭಾಗವಹಿಸಿದ್ದರು. ವಧುವರರ ಹೆಸರಿನ ವಿಶಿಷ್ಟತೆಯಿಂದಾಗಿ ಕೆಲವು ದಿನಗಳಿಂದ ಇವರ ಮದುವೆ ಆಮಂತ್ರಣ ಪತ್ರಿಕೆಯು ವೈರಲ್ ಆಗಿ, ನೆಟ್ಟಿಗರ ಗಮನ ಸೆಳೆದಿತ್ತು.
ಇದನ್ನೂ ಓದಿ: ಇಂಧನ ಬೆಲೆ ಏರಿಕೆ : ಜನಹಿತ ಯೋಜನೆಗಳಿಗಾಗಿ ಹಣ ಉಳಿಸುತ್ತಿದ್ದೇವೆ ಎಂದ ತೈಲ ಸಚಿವ
ಇಂಗ್ಲೀಷ್ ಲಿಟರೇಚರ್ನಲ್ಲಿ ಪದವಿ ಹೊಂದಿರುವ ಈ ಮಮತಾ, ಕಾಂಗ್ರೆಸ್ ಬೆಂಬಲಿಗರ ಕುಟುಂಬಕ್ಕೆ ಸೇರಿದವಳು. ಅವರ ತಂದೆತಾಯಿ ತೃಣಮೂಲ ಕಾಂಗ್ರೆಸ್ ನಾಯಕಿ ಮಮತಾ ಬ್ಯಾನರ್ಜಿಯಿಂದ ಪ್ರೇರಿತರಾಗಿ ಈ ಹೆಸರು ಇಟ್ಟಿದ್ದಾರೆ ಎನ್ನಲಾಗಿದೆ.
29 ವರ್ಷದ ವರನು ಸಿಪಿಐನ ಸೇಲಂ ಜಿಲ್ಲಾ ಕಾರ್ಯದರ್ಶಿ ಎ.ಮೋಹನ್ ಅವರ ಮಗ. ಸೋವಿಯತ್ ಯೂನಿಯನ್ನ ಅಂತ್ಯದ ವೇಳೆ ಹುಟ್ಟಿದ ಅವನಿಗೆ ಸೋಷಿಯಲಿಸಂ ಎಂದು ಹೆಸರು ನೀಡಿದ್ದಾರೆ. ಇನ್ನು ಅವನ ಸೋದರರ ಹೆಸರು ಕಮ್ಯುನಿಸಂ ಮತ್ತು ಲೆನಿನಿಸಂ. ಇವರ ಕುಟುಂಬವಿಡೀ ಸಿಪಿಐ ಬೆಂಬಲಿಗರಿಂದ ತುಂಬಿದೆ ಎನ್ನಲಾಗಿದೆ. (ಏಜೆನ್ಸೀಸ್)
VIDEO | ನೀರುತುಂಬಿದ ರಸ್ತೆಯಲ್ಲಿ ಕೂರಿಸಿ ಕಂಟ್ರಾಕ್ಟರ್ಗೆ ಕಸದ ಅಭಿಷೇಕ!